1 Coríntios 3 - Tradução Bíblica Pacaas Novos

Ca ac ximicocon hwijima' caca co howa to nanain Corinto

¹ Je ca tomi' xuhu' ca' xere: Pijim' paxi' inuhu' pane. Ane om ha' capa' pain ca pijim' hwet xuhu' pain capijacon Iri' Jam ne, xi ac ximicon hwanana hwe pain ca om tomi' ha' hwein Tamataracon Iri' Jam ta. Ac ximicocon wari' co ara e' nanain ca param pan nucucun hwe, ac ximicocon hwijima' e' hwe pain ca howa hun Cristo ta.

² Pain ca pijim' xuhu' pane, pijim' wixite inuhu', ac ca mi' e' xuhu' na pain leite, ac je na. Win cama jicon pije' ma', pain ca mi' e' con pain catat cawinacam ma'. Om ca mi' con pain iri' cwerein carawa. Ac i ma' inuhu' quem, om ca pijim' mi' ac xuhu' pain oro capijacon Iri' Jam ca om taraju pa' ac hwe ma', ca an xiho' nain cwerein carawa ma'. Xi horon querec hwe pain ca howa hun Cristo pane ta. Ac i ma' ac i ma' wet ara xi' hwe pain xocori ca' quem, om ca horon querec hwe pain xocori ca' quem.

³ Xi an xiho' ara huhun oro wari' co ara e' nanain ca param pan nucucun ta. Noc mi' xujuhu' pain oro ca ara hwe ma', mana' caracan xujuhu' quem. Je ca querec pin' xihwe pain ca an xiho' huhun oro wari' co ara e' nanain ca param pan nucucun ma'. An xiho' e' huhun oro wari' co om howa nonon Iri' Jam ma'.

⁴ Ma' ara xi' nana oro win ma' nuhu' co tomi' ca' nana: Param urut con Paulo ta nana. Om na, wirico Apolo co param urut ta ac caca na oro xucucun ma' pahu'. Je ca tomi' xuhu' ca': An xiho' huhun oro wari' co om howa nonon Iri' Jam ta.

⁵ Cain' cain' xihwe quem? Cain' ca wari' ca Apolo ma'? Cain' ca wari' ta' pain ca Paulo ta' ca' quem? Om ca taramaja mi' e' urut con Iri' Jam ra? Taramaja mi' e' urut con ca' ira. Pijim' urut pahu' pane, howa pin ac hun na Taramaxicon nexi'. Je ca taramaja nuxut. Ara urut pain ca taramaja nuxut ca ara je ara je xam' caparut Taramaxicon nexi' ta.

⁶ An xiho' urut cocon oro wari' co taramaja nanain xitot ma'. Wata' co oin' nain tocwi pain xumuhu'. Apolo ma' iri na ne, wirico co cam xo' nain. Ane Iri' Jam pan ca co to' tarama' nain ne.

⁷ Je ca tomi' xuhu' ca': Wari' co oin' nain tocwi ma', om xi in ac tocwa. Wari' co cam xo' nain ma' quem, om xi in ac tocwa quem. Iri' Jam pan xira co in ac wa pain ca to' tarama' cain ta.

⁸ Pain ca oin' tain tocwi pain xumuhu' ma', pain ca cam xo' cain Apolo ma' quem, quep xiho' xujuxut. An an ari xijein ca param nuxut pain ca taramaja nuxut ca' pahu'. Mi' mi' xam' taraparut pain oro ca awi wa Iri' Jam ta. Mi' taraparut pain carawa pain ca taramaja mi' urut con ca'.

⁹ Je ca tomi' xuhu' ca': Taramaja wi urut con Iri' Jam cwa'. Wahu' iri na ne, ac totacon hwe pain ca taramaja mi' urut pahu'. Ac xiricon hwe quem.

¹⁰ Ac ca quep tain xiricon ta' na pahu' pain ca xo' pijim' ten qui' xuhu' pain capijacon Iri' Jam pane. Wirico Iri' Jam co quep xiho' napa' pain ca ca' rain capa' pain ca taramaja ne pane. An xiho' inon wari' co tara quep nain xirim ma', pain ca cut in xo' cain pacun pain caximain xirim ma', ma' ta teren ne nain. Ac i ma' na ca pijim' mi' xo' xuhu' pain capijacon Iri' Jam pane quem. Oro xerexi' co pijim' nunuhu' pa'ao' ma' iri na ne, an xiho' nonon oro wari' co quep xam' pin nanain xirim pa'ao' quem. Na e' na pain ca taramaja xo' taramaja xo' xam' caca pain ca pijim' mi' xo' cucuhu' con Jeju Cristo quem.

¹¹ Xi ma' ca xucun co pijim' wa ta, ma' xica' pe na Jeju Cristo co an xiho' nain iri' pacun pain caximain xirim ma', wirico co to' teren napari' pain ca howa nexi' quem. Om ca na ne pain ca pijim' xun xucun wari'.

¹² Wari' co pijim' ma', pain ca ac ca quep pe cain ne xirim pain iri' pacun pain caximain ma', mo ta mam' quep xam' cain carawa ca awi tamana ma', ca om tom ra ha' ma', am mam' quep cain pain ouro je prata je oro pacun ca awi tamana ma'. Mo ta mam' quep xam' cain pain carawa ca om awi ma', ca tom hap ma' quem, am mam' quep cain pain caji pana je tahot quem.

¹³ Aram aram querec pin' ac xine tara oro ca taramaja nucun pain ca quep xam' pin cain xirim ma'. Ac i ma' tara pain xec nein ca aram aram maqui' ta' ca Cristo quem. Maqui' iri tara ne, ac ca tom tain cain ne oro ca taramaja nucucun co pijim' nanain capijacon Iri' Jam, querec pin' ac xine tara quem. Am awi ne ca taramaja nucucun, am om awi ne cocon, querec pin' querec pin' xam' ac xine tara oro ca taramaja nucucun.

¹⁴ Tom querec tarain ca taramaja nucucun Iri' Jam, ac je tara. Mo ta hohot ne ca taramaja nucucun pain ca pijim' nucucun ma', mo ta om tom pin ne, mi' ac tococwa tara pain oro ca awi wa.

¹⁵ Mo ta om hohot ne, mo ta tom pi' pin ne oro ca taramaja nucucun ma', om ta mi' tococwa pain carawa ca awi. Witan paxi' tatara, ane tom tom pi' pin ta' ne oro ca taramaja nucucun ne. An xiho' ac cocon tara wari' co tom pa' non xiricon ma', co wiran mao paxi' ma' quem.

¹⁶ Om ca xiricon Iri' Jam hwe ra? Om ca corom pe ho' cuhu' Tamataracon ra? Xiricon Iri' Jam hwe ma' ira. Corom pe ho' nuhu' Tamataracon ma' quem, wara taxi' ara xi' hwein i ma' ta.

¹⁷ Mo ta to' em' pin cain xiricon Iri' Jam wari' ma', wap pan ac con tara Iri' Jam. Xi iri' xuru ara cain xiricon ta. Wahu' pan co xuru ta cuhu' ma' ira.

¹⁸ Ma' tara xumuhu' me, coromicat xo' je. Howa maho' jein oro ca coromicat ximama' nuhu' ma'. Mo ta ma' ca win ma' nuhu' co taraju pa' ina xi' ma ma', pain ca an xiho' cain ca coromicat nucucun oro wari' co om howa nonon Iri' Jam ma', na e' na pain ca an pe pin cain ca coromicat ximao nucun. Ac ca an xiho' pin tococwa tara co tamanain nana ta caca oro wari' co om howa nonon Iri' Jam ma'. Taraju pa' iri'o' pin ac ca tara quem.

¹⁹ Xi taraju pa' caca oro wari' co taraju pa' urut xi' ma nana pain macan' ca' ta na Iri' Jam. Taraju pa' urut xi' ma paxi' nana, ane tamanain hwe ta pan cocon Iri' Jam ne. Xi xirao' pe ara xine pain capijacon Iri' Jam ta. Ca' na con pane: Taraju pa' urut xi' ma nana pain ca coromicat ximama' nucucun pain ca mixein nucucun. Ane to' i'ina pan cocon Iri' Jam ne. Mam' to' i'ina pan nonon pain ca mixein pan nucucun. Hehe pin ac cocon na ta. Ac i ma' na ca xirao' pe xine pain capijacon Iri' Jam.

²⁰ Ma' na xijein ca xirao' pe xine pain capijacon quem. Ca' na con: Querec pin' nonon oro wari' Iri' Jam ma', pain ca taraju pa' urut xi' ma caca ma'. Querec pin' nain oro ca coromicat nucucun. Coromicat ximama' nana ta. Ac i ma' na ca xirao' pe xine ca tomi' nucun Iri' Jam pain capijacon.

²¹ Je ca tomi' xuhu' ca': Ta tomi' xec xec hwe me, pain ca coromicat ni ca' xujuhu' pain ca param paxica' huhun oro wari' ma'. Xi xiram pa' pan ara cuhu' Iri' Jam ta. Mi' mi' pi' pin nuhu' pain oro carawa quem, mi' mi' pi' pin nuhu' cocon oro co ca' na nunuhu' pain capijacon quem. Ma' ta quep xiho' xihwe nuhu'.

²² Wata', Apolo, Pedro, wari' ne maparut con, taramaja mi' jujun ta naparut Iri' Jam pahu'. Oro carawa pain macan' ca' quem, mi' nuhu' pain, mene hwein, ma' ta quep xiho' xuhu' ta nuhu'. Ca e' wa ca', ca cono' wa ca', oro carawa ca ara nuhu' pain xocori ca', oro carawa ca om ara querec nuhu' ma' quem, mi' nuhu' pain, mene hwein. Ma' ta quep xiho' xuhu' ta nuhu'.

²³ Mene pan nuhu' Cristo. Mene non Cristo Iri' Jam quem.