1 Coríntios 2 - Tradução Bíblica Pacaas Novos

Ca pijim' e' tocwa Cristo co mi' pin pe nain pana

¹ Je ca tomi' xuhu' ca' xere: Hwet iri inuhu' pane ne, pain ca pijim' hwet xim xuhu' pain capijacon Iri' Jam ca om taraju pa' querec wa con Jeju ira, om ca pijim' xuhu' pain ca taxi' tamana ne pain ca coromicat ne pane, om na.

² Xi noc ara tain ca pijim' hwet xuhu' pain oro xijein ca pijim' wa pain ca pe ho' qui' xuhu' pane ta, ac i ma' na ca wara an pe xo' tain ca coromicat ne pahu' pane. Param e' inain ca pijim' hwet xuhu' con Jeju Cristo co tatatain pe wa pain pana pane.

³ Om ca hwara' opa ta' pain ca pe ho' qui' xuhu' pane. Jin' inain ca pijim' ximao wa pane. Ac ca pijim' cocoroc tamana ta' na pahu' pane.

⁴ Noc inain ca mam' pijim' pijim' na xuhu' pain ca pijim' taxi' tamana wa pane. Om ca tomi' ca' xuhu': Pijim' aramao xuhu' pain ca coromicat ne, ma' ta querec pin' hwein ca iri'o' nein ca pijim' ne xuhu' ca', om ca pijim' ac i ma' xuhu' pane. Pijim' aramao iri inuhu' pane ne, an hwet mi' ac xuhu' na pain ca hwara' opa nein Tamataracon Iri' Jam. Querec pin' ac hwein na ca iri'o' nein ca pijim' ne quem.

⁵ Pijim' ac i ma' inuhu' pane. Ma' ta om howa hwein ca coromicat pan nucucun oro wari' ta inuhu'. Ma' ta howa hwein ca hwara' opa nucun Iri' Jam ta inuhu', je ca pijim' ac i ma' xuhu' pane.

Ca coromicat nucun Iri' Jam

⁶ Ane pijim' hwet urut cocon pain ca coromicat nucun Iri' Jam oro wari' co hwara' opa nana pain ca howa cocon ma' ne, co ac ximicon hwanana nana pain ca howa nucucun ma', pijim' aramao ac urut cocon na pain iri' ca coromicat nucun Iri' Jam. Om ca pijim' aramao urut cocon pain ca coromicat pan nucucun oro wari'. Om ca pijim' aramao urut cocon pain ca coromicat pan nucucun oro taramaxicon co om howa nana cwa' quem, xi om pin ta' ara ne ca hwara' opa nucucun ta.

⁷ Je ca tomi' xuhu' ca': Tomi' hwet jein ca coromicat ne naparut Iri' Jam ma', pain ca param mi' capari' pain carawa ca awi tamana ca quep xiho' xim napari'. Om ca an hwet querec cain ira. Wara coromicat xo' qui' nain pain cara pane, pain ca om ma' querec ne macan' pane.

⁸ Om ca taraju pa' caca oro taramaxicon co om howa nana cwa', om ca ma' camain' ca taramaxicon co taraju pa' nain ca coromicat nucun Iri' Jam. Mo xi taraju pa' cacain, om xi tatatain mi' qui' cocon pain pana Taramaxicon nexi' co awi tamana pain ca om caracat nucun pain ca hwara' opa tamana nucun.

⁹ Win ne ca xirao' pe xine pain capijacon pane. Ca' na con pane: Oro carawa ca awi ca an to xo' mi' capari' Iri' Jam ma', pain ca om noc xun ca', om na wari' co querec nain. Om na wari' co taraju nain. Om na wari' co coromicat nain quem. Ac i ma' na ca xirao' pe xine pain capijacon Iri' Jam ca'.

¹⁰ Ane an hwet mi' capari' pain ca wara coromicat xo' nucun Iri' Jam ne. Je Tamataracon ca an hwet mi' napari' pain. Xi taxi' taxi' xam' pan ara cain oro ca coromicat nucun ta. Taxi' taxi' xam' pan nain oro ca wara coromicat nucun ca joc xim ca pane quem.

¹¹ Win ca wari' pain ca coromicat nucun ma'. Taxi' nain xucun wari' ra? Taxi' nain ca coromicat nucun ra? Om na ta. Xica' pe na wari' co coromicat ma', wirico pan na co taxi' nain ca coromicat pan nucun, je tamataracon pan ca pe ho' non ma', je ca taxi' nein ca coromicat nucun. Ac i ma' na con Iri' Jam quem. Om na wari' co taxi' nain ca coromicat nucun. Xica' pe pan na Tamataracon ca taxi' nain.

¹² Om ca mi' capari' pain ca an xiho' xuxun oro wari' pain ca coromicat nucucun co om howa nonon Iri' Jam cwa'. Mi' napari' pain Tamataracon quem. Ma' ta querec pin' hwein oro caramaju ca mi' xuhu' ca' napari'.

¹³ Pain ca tomi' hwet urut pain carawa ca mi' capari' Iri' Jam ca', je Tamataracon ca mi' naparut pain ca pijim' taxi' urut pain. Om ca maqui' nein ca coromicat pan nuxut. An hwet mi' naparut pain, tomi' xo' ac urut pain na ca tomi' nein pain ca tomi' xut cocon oro wari' co ma' nonon Tamataracon Iri' Jam.

¹⁴ Om ca howa je na caca oro wari' co om nonon Tamataracon Iri' Jam. Om ca howa je na cacain ca tomi' nein. Xi tomi' ximao na ta ara cacain ta. Om ca taraju pa' ac cacain quem, xi ma' cocon Tamataracon Iri' Jam ca to' taraju pa' nonon ta.

¹⁵ Wari' pain ca ma' capari' Tamataracon Iri' Jam ca' iri na ne, taraju pa' taraju pa' pi' pin irin oro ca querec pin' ca Iri' Jam ma'. Querec pin' irin oro ca awi wa, querec pin' irin oro ca om awi wa quem. Oro xucucun co om howa nana ma' iri na ne, om ca taraju pa' cacapari'. Om ca querec pin' cacapari' pain ca xuruxut xo' nexi' pain Tamataracon Iri' Jam.

¹⁶ Je ca xirao' pe xine pain capijacon Iri' Jam ca'. Ca' na con pane: Ma' tara wari' co querec pin' nain ca coromicat nucun Taramaxicon Iri' Jam ra? Ma' tara wari' co hu taxi' non ra? Om na ta. Ac i ma' na ca xirao' pe xine con pane. Wari' iri na ne, pain ca ma' capari' Tamataracon Iri' Jam ca', an xiho' pan urun Cristo pain ca coromicat nucun ta.