1 Coríntios 16 - Tradução Bíblica Pacaas Novos

Ca mi' xuxun pain dinheiro tococwa oro co howa to nanain Jerusalém

¹ Tomi' ho' xuhu' pain dinheiro ca cut mi' xun huhun oro wari' nucun Iri' Jam co to nanain Jerusalém. Ara jein ca ara je toton oro xerexi' co howa to nanain Galácia ma'.

² Je ca tomi' xuhu' ca': Pain oro xijein domingo ma', an to xo' jein dinheiro ca mi' xi' hwe. Ara ara xam' jein. Mo ta hwara' ne dinheiro ca cut hwe pain ca taramaja nuhu' ma', an to hwara' ac hwein tara. Mo ta om hwara' ne dinheiro ca cut hwe pain ca taramaja nuhu' ma', an to wijimain ac hwein tara quem. An to xo' ac hwein tara. Mo ta ara ac i ma' hwe, wara ma' turuhu' dinheiro ca mi' xi' hwe ma'. Om ac ne tara ca i'ina ne xumuhu' pain ca wajim' hap xujuhu' pain ca aram aram hwet xuhu' ta.

³ Hwet iri xuhu' ne, tomi' xo' ac toton tara co tora' pan hwe ma'. Cut mi' jujun pain dinheiro oro xerexi' co to nanain Jerusalém ta toton, main ca' oro ca xirao' ne ca' quem ac toton tara. Cut mi' jujun pain, ma' ta querec pin' cucuhu' pain ca cut mi' huhun pain dinheiro ca' ac toton tara, mama' je e' ac toton tara, mama' ac caca tara quem.

⁴ Mo ta param mahu' pain ca mao ta' quem, ja' ja' ac cacapa' tara.

Ca coromicat xo' nucun Paulo

⁵ Mao iri tain oro xijein cidade pain macarain Macedônia ne, mo querec ac xuhu' tara pain ca aram aram mao tain cidade nuhu' ta.

⁶ Am pe ho' wijimain xuhu', am pi' pin pa' capa' xowi' pahu'. Ma' ta quep xiho' mahu' pain ca mao tain ta' oro xijein cidade ca mao ta' ta' quem.

⁷ Je ca om hwet ho' xuhu' ca'. Mo xi hwet ho' xuhu' pain xocori ca', na e' xirapa' pain ca pe ho' wijimain e' xuhu', tiquin' ca' hap ac xuhu' xira. Noc inain i ma' ta. Mo ta param capa' pain Taramaxicon nexi', mon to wet ho' ac xuhu' tara ta.

⁸ Ac i ma' paxi' na ca wara coromicat an pe xo' ne ca'. Ane mon to wet cain' tain Éfeso ca' ne. Maqui' pa' ac capa' tara xec nein ca tomi' querec te nucucun oro wari' pain Pentecostes.

⁹ Mija ara xi' nana oro wari' co param nanapa' pain ca pijim' wa pain i ca' quem. Ac ca howa xi' caca na. Mija paxi' nana co noc nanapa' pain ca pijim' wa quem, ane jain jain tamana pan cacain capijacon Iri' Jam co howa xin nana ne.

Ca tomi' xo' tococwa con Timóteo con Apolo

¹⁰ Mo ta hwet cuhu' Timóteo, querec wet xo' jun pain ca pe ho' cuhu', ma' ta wa pin ne ximicon pain ca querec pin' cuhu' pain ca tomi' querec te hun ma'. Xi om ne ca taramaja mi' ara con Taramaxicon nexi' ta. Win ta' ca'.

¹¹ Taraju wet jun, ta miri'om hun me ta. Paca' xim iri turuhu' ne, quep xiho' ac hun tara. Ma' ta tomi' querec te ca pain ca in hwet xim capa'. Winim' ton quem. Maqui' wi tara cocon oro xerexi' co in hwet xim nanapa' ma' quem.

¹² Tomi' hwet ho' xuhu' con coxari' Apolo cwa' quem. Mo querec roron pain Corinto ta paxi' inon pahu', ja' ja' roron oro xerexi' co mama' xin nanain Corinto paxi' inon. Tomi' mip paxi' inon pahu'. Ane noc inain capa' pain xocori ca' ne. Ha' iri tarapa' ne, hwet ac toton tara ta napa' pahu'.

Ca pi' pin ta' ne ca xirao' nucun Paulo

¹³ Ma' tara xumuhu' me, hwara' opa cara je pain ca howa hun Jeju Cristo. Ac ximicon hwanana je. Hwara' opa cara je con Iri' Jam.

¹⁴ Oro carawa ca ara xi' hwe ma', an hwet pe ac hwein tara ca om noc caracan xujuhu' pain ca ara hwein quem.

¹⁵ Taxi' huhun Estéfanas cocon oro ca nari nucun ma'. Wiricoco co howa cain' nana pain Acaia pane. Quep xiho' tamana nonon oro wari' nucun Iri' Jam pain xocori ca', win xumu tamana nonon. Je ca tomi' mip xuhu' ca' xere:

¹⁶ Tomi' ha' jujun oro wari' co an xiho' nonon pain ca taramaja nucucun me. Tomi' ha' jujun oro xucucun co taramaja wi nonon quem.

¹⁷ Tomi' querec te inonon Estéfanas con Fortunato con Acaico cwa', tomi' querec te inonon pain ca maqui' nucucun. Pain ca om na cuhu' pain ca mo querec xut pum mahu' ma', mo querec xut pum pan ac cacapa' na pahu'.

¹⁸ Wa pin ac ne na xumu pain ca ja' tomi' querec te cacapa' quem. Win ne ca ja' tomi' querec te cucuhu' ma' quem. Querec pin' jujun oro wari' co an xiho' nonon pain ca taramaja nucucun ta.

¹⁹ Tomi' nunuhu' oro xerexi' co cut in xucucun pain macarain Ásia ca'. Mam' pe wet urut pahu' ta nunuhu'. Tomi' nuhu' Áquila cam Priscila cwa', wiricoco oro xerexi' co cut in to xucucun pain xiricacam cwa' quem. Mam' pe wet urut pahu' ta nunuhu'. Tomi' querec te tamana urut pahu' pain ca win cwere wi xun Taramaxicon nexi' ta nunuhu'.

²⁰ Tomi' tomi' pi' pin nunuhu' oro xerexi' pain i ca' quem: Mam' pe wet urut pahu' ta nunuhu'. An hwet mi' xujuhu' pain ca tomi' querec te xujuhu' ma'.

²¹ Wata' pain ca Paulo ta' ca', xirao' pan inain wuxu pain tawirinain ca xirao' ne ca', pain ca mam' pe wet inuhu' ta xuhu' ca'.

²² Oro wari' co noc nonon Taramaxicon nexi' ma', na e' na pain ca tomi' noro tococwa, to ni ca' xine ta pan totoron Iri' Jam. Param inon Taramaxicon nexi' pain ca maqui' hap ca quem!

²³ Param inon Taramaxicon nexi' Jeju pain ca xiram pa' cuhu' ma', pain ca mi' e' cuhu' pain ca param pan nucun.

²⁴ Om ca noc camain' xuhu', xi win cwere ara xijexi' con Cristo Jeju ta. Amém, iri'o' na ca xirao' ne ta. Je i ca' ca xirao' ne ca'.