1 Coríntios 15 - Tradução Bíblica Pacaas Novos

Ca e' mami' nucun Cristo

¹ Xirao' mi' ho' xuhu' pain i ca' quem xere: Mam' pe wet jein capijacon Iri' Jam ca pijim' xuhu' pane, pain ca pijim' hwet xuhu' pain ca to' witan pin xim cuhu' Jeju pane. Je ca howa hwe pane, howa cara hwein quem.

² Capijacon Iri' Jam con Jeju ca', je ca mam' to' witan xihwe quem. Howa cara iri hwein ne, witan ac hwe na. Tara pahu', mo ta om howa cara hwein, howa ximama' ac hwe na quem.

³ Pijim' hwet inuhu' pain capijacon Iri' Jam ca wara tomi' hwet capa' pane. Awi tiquin' ca' nain oro xijein capijacon ta. Ca' na con: Mi' pin caho' napari' Cristo, ma' ta om wap xihwe pain ca caracat nuhu' ta napari'. Win ne ca xirao' pe xine pain capijacon pane.

⁴ An corom pe pin ac cacain na curucun pain manain pacun. Ma' 3 pin iri na xec pain ca an corom pe xine curucun ne, to' e' mami' ac con na Iri' Jam. Win ne ca xirao' pe xine pain capijacon pane.

⁵ Hwet pa' ac con na Pedro, aram aram hwet pa' ac tococwa na oro xucucun apóstolo ma', pain ca ma' 12 nucucun ma' quem.

⁶ Aram aram hwet pa' ac tococwa na oro co howa nonon ma', pain ca cut in to nucucun ma' quem. Mija nana, tiquin' ca' nanain ca 500 nucucun pane. To wet nana quem, mija nana co e' e' wet nana pain xocori ca'. Ma' paric ca' e' paxi' nana co cono' pin nana, to wet nana oro xucucun.

⁷ Aram aram hwet pa' ac tocwa na Tiago, aram aram hwet pa' hwet pa' pi' pin ac tococwa na oro xucucun apóstolo.

⁸ Ja' tawuru ac toton na pain ca querec ton pain ca hwet pa' capa' pane, pain ca ac caxicon pije' co pan' orowaxicon ca' nam jicon ta' na pane.

⁹ Xi awi ta' pane ta. Awi tiquin' ca' nanapa' oro xucucun apóstolo. Om xi apóstolo ra capa' Iri' Jam pane, om xi pijim' hwet rain capija camain' capa' pane. Xi quep em' taxipa' ara toton oro co howa nonon Iri' Jam con Jeju pane ta.

¹⁰ Ane xiram pa' e' capa' Iri' Jam ne. Wirico co mi' napa' pain ca pijim' wa capijacon. Xiram pa' napa'. Je ca ha' capa' pain ca pijim' tamana tain capijacon ca'. Taramaja tiquin' ca' inonon oro xucucun apóstolo. Om paxi' na ca wata' ne co taramaja cwa'. Wirico Iri' Jam co xiram pa' napa' pain ca taramaja wi capa' ca'.

¹¹ Je ca tomi' xuhu' ca': Am ca pijim' ne pahu', am ca pijim' nucucun oro xucucun apóstolo pahu', an an ari xijein ca pijim' nuxut pain ca pijim' mi' urut pahu' pain capijacon Iri' Jam con Jeju. Howa hwein ca pijim' nuxut quem.

Ca e' mami' xi' iri' pain ca howa xun Jeju

¹² Je ca tomi' xuhu' ca': Ma' nana oro win ma' nuhu' co tomi' ca' nana: Om ta e' mami' caca co wara cono' nana ta nana. Cain' cain' xirara quem? Para tomi' ac i ma' caca quem? Win ne ca pijim' hwet urut pahu' pain ca to' e' mami' con Cristo Iri' Jam pane.

¹³ Mo xi om iri'o' ne ca to' e' mami' toton cocon oro wari' Iri' Jam ma', om xi to' e' mami' con Cristo quem.

¹⁴ Mo xi om iri'o' ne ca to' e' mami' con Cristo ma', pijim' ximama' ac urut xira, howa ximama' ac hwe xira quem.

¹⁵ Mixein hwe ta ac cacaparut xira oro wari' quem, xi pijim' taxipa' ara urut pain ca to' e' mami' non Cristo Iri' Jam ta urut ca'. Mo xi om iri'o' ne ca to' e' mami' toton cocon oro wari' Iri' Jam, om xi to' e' mami' con Cristo quem.

¹⁶ Mo xi om iri'o' ne ca to' e' mami' toton cocon oro wari' Iri' Jam ma', om xi e' mami' ca Cristo quem.

¹⁷ Mo xi om iri'o' ne ca to' e' mami' con Cristo Iri' Jam pane, howa ximama' ac hwe xira, om om wet ac ne xira ca witan ca' hwein ca caracat nuhu' quem.

¹⁸ Mo xi ac i ma' ne, mo xi om to' e' mami' toton cocon oro wari' co wara cono' nana ma', co wara howa nonon Cristo pane, pan' ara'am ac caca xira quem.

¹⁹ Mo xi howa paxi' xun Cristo, mo xi winim' e' xun pain ca xiram pa' capari' pain ca e' e' wet nexi' pain macan' ca'. Ximin ac iri' xira, ximin tiquin' ca' ac xuxun xira oro xucucun wari' pain oro xijein macan' ca'.

²⁰ Ane to' e' mami' con Cristo Iri' Jam ne. Iri'o' na, wirico co to' e' mami' cain' wa pane. Je ca taxi' xuxun oro wari' co howa nonon ma' quem. Cono' paxi' nana, ane to' e' mami' xun tococwa ne.

²¹ To' cono' ara xi' napari' wari' co xica' xat pane, wirico Adão cara pane. Je ca to' e' mami' capari' xucun wari' co xica' xat pane quem, wirico Cristo.

²² Wari' pain ca hwanana ne xun Adão cara pane, cono' cono' pi' pin xi' iri', xi om ne ca caracat pan ara ca pane ta. Wari' pain ca win cwere xun Cristo cwa' iri na ne, to' e' mami' to' e' mami' pi' pin ac capari' tara Iri' Jam ta.

²³ Om ca maqui' querec ne xec nein ca to' e' mami' xim capari', ame hwe e'. To' e' mami' cain' non Cristo pane, maqui' ac ne tara xec nein ca in qui' ta' nucun, to' e' mami' ac capari' tara pain ca wari' ne capari' ca' quem.

²⁴ Aram aram maqui' ac ne tara oro xec nein ca to' om pin tain cain ca hwara' opa nucucun oro jam cocon oro taramaxicon co taramaxicon to nanain oro xijein macan' ma' quem. To' om to' om pi' pin tarain ca hwara' opa nucucun. Pi' pin ac ne tara macan' quem. Je i ma' tara xec nein ca tomi' ton con Cote ca quem. Tomi' ca' toron: Taramaxicon pe rain maxu ta Te ac con tara, mi' ac con pain tara ca taramaxicon pe cain maxicon.

²⁵ Xi na e' ara ne pain ca taramaxicon taramaxicon cara cain' ca ta, aram aram maqui' pa' ac con tara xec nein ca to' quiji' pin toton cocon oro taramaxicon co noc nonon ma', wiricoco oro jam, wiricoco oro wari' quem, wiricoco oro co noc nonon ma' quem, to' quiji' pin ac tococwa tara.

²⁶ To' quiji' pin to' quiji' pin, wara ca' tara ca cono' wa ma', to' quiji' pin ac cain tara quem. Om pin ac ne tara ta.

²⁷ Je ca xirao' pe xine pain capijacon Iri' Jam ca': Wirico Iri' Jam co mi' non pain ca taramaxicon wa Cristo, mi' non pain ca taramaxicon pe ho' taramaxicon pe ho' pi' pin cocon oro wari', wiricoco oro jam, wiricoco oro taramaxicon, je oro carawa jimao ta na ca xirao' pe xine con. Pain ca tomi' cain i ma' Iri' Jam ma', om ca tomi' pan xucun, om na. Xi taramaxicon pe ho' con Iri' Jam Cristo ta. Wirico Iri' Jam pan ara xi' na co mi' nain ca taramaxicon wa. Mi' non pain Panxica ta.

²⁸ Taramaxicon pe ho' iri totoron oro wari' cocon oro taramaxicon cocon oro jam je oro carawa jimao ne, tomi' ac con tara Cote ca co mi' non pain ca taramaxicon wa. Maho' tain ca taramaxicon wa ta Te, wum tara co taramaxicon pe ho' napa' ta toron, taramaxicon cara ac ca tara Iri' Jam. Taramaxicon pe ho' taramaxicon pe ho' pi' pin totoron oro wari' cocon oro taramaxicon cocon oro jam je oro carawa jimao. Iri' taramaxicon pin ac ca tara ta.

Ca om na ne pain ca tomi' ximama' iri' pain ca om ta e' mami' xi' iri' ca'

²⁹ Cain' cain' xira cocon oro wari' co ja' wawa pain com pain maxicocon co wara cono' nana ma' quem? Mo xi om e' mami' xi' caca co wara cono' nana ma', je xi om ja' qui' tococwa cocon quem?

³⁰ Noro xut pain ca to' i'ina caparut oro carawa ca' quem. Mo xi iri'o' ne ca om e' mami' xi' caca co wara cono' nana ma', je xi narain ho' qui' urut pain curuxut ca' quem? Mija ara xi' na oro carawa ca to' cono' pin xim naparut, pain xim, pain xec quem.

³¹ Mi' pin ta' mi' pin ta' ma' ina pain oro xijein xec ira. Tomi' iri'o' inuhu' ta xere. Win ne ca tomi' querec te iri'o' xuhu' pain ca howa hun Taramaxicon nexi' Cristo Jeju cwa'.

³² To' i'ina tamana nanapa' oro wari' pain Éfeso pane quem. Ximin ina cocon. Ac oro caxicon copacao' nana pain ca mana' cacapa' pane. Mo xi an xiho' toton oro wari' pain ca om howa cacain ca e' mami' xi' caca ma', je i ma' xira ca om quereme qui' tain ca mana' cacapa' pain ca noc cacapa' quem? Mo xi om e' mami' xi' caca co wara cono' nana ma', na ac ne xira pain ca tomi' ximama' xijexi'. Ca' xixi': Cao' cao' ma'am xi', toc tamanain to xi', xi om ne ca xec cono' pin ara xi' iri' ta, pan' ara'am ac xi' tara ta, ac i ma' xira ca tomi' ximama' nexi' ta.

³³ Ma' tara xumuhu' me, coromicat xo' je cocon oro wari' co tomi' ximama' ac i ma' nana. Mo ta taxipa' huhun, ja' em' pin ac hwein tara ca xuruxut xo' nuhu'.

³⁴ Ma' tara xumuhu' me. Caracat maho' je. Ma' nana oro win ma' nuhu' co om coromicat xo' camain' nonon Iri' Jam. Om ca querec pin' cocon. Wixipa' xihwe pain ca om coromicat xo' nucucun pain ca om querec pin' cocon Iri' Jam ta.

Cwerexi' pain ca e' mami' xi' iri'

³⁵ Am ma' caca oro win ma' nuhu' co tomi' querec ca' nana quem: Cain' ca e' mami' xi' caca co cono' nana quem? Cain' xi querec ne curucucun quem? Am ac i ma' ne ca tomi' querec nucucun ma'.

³⁶ Xi coromicat xo' caca co tomi' querec ac i ma' nana ta. Taraju pa' je e'. Win ne tocwi trigo ca oin' wa ma'. Oin' ta, memerem mao ac ne na, ac ca mi' pin ne na quem. Mo ta om memerem ne, om ac ne tara ca orot ne. Memerem iri na ne, orot ac ne na quem.

³⁷ Tocwi e' na ca oin' iri' ca'. Am tocwi trigo, am xijein tocwi. Tocwi e' na, om ca an xiho' nein arain pain ca orot nein quem.

³⁸ Wirico Iri' Jam pan na co mi' nain tocwi pain ca orot nein. Mi' nain ca param nucun. Orot ni orot ni xam' na.

³⁹ Jimama' na oro ca cwere wa quem. Cwere jimao na wari', cwere jimao na carawa, cwere jimao na me, cwere jimao na hwam.

⁴⁰ Ac i ma' na oro carawa ca to nain pawin quem, wirico xina con panawo' con oro pijo' ma' quem. Ane om an xiho' nein oro carawa ca to nain macan' ca' ne. Jimao na ca awi nein pawin cain, jimao na ca awi nein macan' ca' quem.

⁴¹ Jimao na ca toha nucun xina, jimao na ca toha nucun panawo', jimao na ca toha nucun pijo' quem. Om ca an xiho' xucun oro pijo' ma' quem. Jimama' na oro ca toha nucun.

⁴² Ac i ma' tara cwerexi' pain ca to' e' mami' xim capari' Iri' Jam quem. An xiho' tarain tocwi trigo ca oin' xine ma'. Maram mao ac ne tara, cunu pin ac iri' tara quem. E' mami' iri xi' ne, om ta cunu mami' iri', om ta cono' mami' iri'.

⁴³ Om ta awi ne cwerexi' pain ca cunu pin nein ma'. E' mami' xi' iri iri' ne, awi pin ac ne tara. Om ta hwara' opa ne cwerexi' pain ca cunu nein ma'. E' mami' xi' iri iri' ne, hwara' opa ac ne tara quem.

⁴⁴ Cwerexi' ca e' pe nain macan' ca', main cunu pin tara. Xocori cwerexi' ca e' mami' ta' ma' iri na ne, e' pe tarain pawin cain quem, xi om ne Tamataracon Iri' Jam ta. Je ca tomi' xuhu' ca'. Ma' ara xi' na xocori cwerexi' ca e' pe nain pawin cain, ma' na wara cwerexi' ca e' pe nain macan' ca' quem.

⁴⁵ Je ca xirao' pe xine pain capijacon Iri' Jam ca'. Ca' na con: Adão cara pane, co quep cain' ca Iri' Jam pane, quep wari' ac tocwa na, to' e' ac tocwa na quem. Ma' ta ha' quem pain ca e' pe main macan' ta non. Xucun wari' co maqui' pa'ao' ma' iri na ne, wirico Cristo ma', jimao na co ma'. Jam na. Wirico co mi' napari' pain ca om pi' ra ha' ne ca e' wa ca'. Ma' ta ha' cuhu' pain ca e' to hwein pawin ta napari' quem.

⁴⁶ Om ca mi' cain' capari' pain cwerexi' ca e' pe tain nain pawin cain, om na. Mi' cain' napari' pain cwerexi' ca e' pe nain macan' ca'. Aram aram mi' ac capari' tara pain cwerexi' ca e' pe tain nain pawin cain.

⁴⁷ Wari' co ma' cain' pane, wirico Adão cara pane, maqui' nain macan'. Xucun wari' co maqui' pa'ao' ma' iri na ne, wirico Cristo ma', maqui' nain pawin.

⁴⁸ Oro wari' co to nanain macan' ca', cwere an xiho' nonon wari' co macan' curucun cara pane. Oro wari' co to nanain pawin ma' iri nana ne, cwere an xiho' nonon wari' co maqui' nain pawin pane quem.

⁴⁹ Main cwere an xiho' pin xun wari' co maqui' nain pawin pane. Win ne ca cwere an xiho' xun wari' co macan' curucun pane quem.

⁵⁰ Je ca tomi' xuhu' ca' xere: Oro cwerexi' ca', pain ca ma' ne cwerexi' pain quixi' ca', om ta mama' ac nein ca taramaxicon pe ca Iri' Jam pain pawin cain. Oro cwerexi' ca cono' taxipa' ca', om ta mama' ac nein i cain. Xi cono' ra ha' wa pain i cain ta.

⁵¹ Taraju wet jein ca tomi' xuhu' ca'. Tomi' hwet xuhu' pain ca coromicat nucun Iri' Jam ca om an hwet querec ca pane ira. Om paxi' tara ca cono' cono' pi' pin xi'. Ane to' jimama' to' jimama' pi' pin toton capari' Iri' Jam ne.

⁵² To' jimama' hap tarapari'. Ac ca hap ne ca xopin' xopin' ne ca tucu wa ma' tara pain ca to' jimama' hap xim capari'. On iri tara caji taracom ne, pain ca win pi' pin ne ca on nein ma', e' mami' ac caca tara co wara cono' nana ma'. Om ta cono' mami' caca. To' jimama' ac capari' tara quem.

⁵³ Xi cono' taxipa' ara ne cwerexi' ca mam' quep xine pain macan' ta. Cono' taxipa' iri', cunu taxipa' iri' quem. Je ca na e' ne pain ca to' jimama' pin capari' ta. Om ac ne tara ca cono' iri', om ac ne tara ca cunu iri' quem. Ac ca horohot xun xoworicon wom cwa' tara pain ca to' jimama' toton capari', ac ca to xun xocoricon wom tara quem, ac i ma' tara pain ca to' jimama' toton capari' ca'.

⁵⁴ To' jimama' iri tarain cwerexi' ca cono' taxipa' ca' ne, e' cara ac iri' tara. Om ta cono' mami' iri'. Je tara ca win hwet pin tain cain capijacon Iri' Jam ca xirao' pe xine pane. Ca' na con: To' quiji' pin inain ca cono' wa, om ta cono' mami' wa ta.

⁵⁵ Ma' tara ca to' quiji' pin mami' ac capari' ca cono' wa ra? Om na. Ma' tara ca to' em' mami' ac capari' ca hwara' opa nein ra? Om na quem. Ac i ma' na ca xirao' pe xine con pane.

⁵⁶ Cono' taxipa' iri', xi om ne ca caracat ara iri' ta. Caracat taxipa' iri' quem, xi tomi' ha' xin capijacon Iri' Jam ca an hwet mi' capari' pain ca caracat nexi' ta.

⁵⁷ Ane xiram pa' pan capari' Iri' Jam ne. Tomi' querec te xun ta. Mi' ara xi' napari' pain ca to' quiji' pin xin ca cono' wa ta. Om ta jin' mami' xin. To' witan ca' napari' pain. Xi om ca Taramaxicon nexi' Jeju Cristo co xic am pin nain ca caracat nexi' ta.

⁵⁸ Je ca tomi' xuhu' pain ca tomi' querec te xuhu' ca' xere: Hwara' opa cara je. Howa cara jun Taramaxicon nexi', ta an to camain' hwein ca howa wa me. Tama' taramaja mi' jun quem, win xumu jein ca taramaja nuhu' con. Xi taxi' ara hwein i ca' ta: Taramaja mi' xun iri hun Taramaxicon nexi' ne, om ta taramaja ximama' hwe ta.