1 Coríntios 14 - Tradução Bíblica Pacaas Novos

Ca tomi' xo' tococwa pain ca pijim' hwet taxi' wa capijacon Iri' Jam, je pain ca tomi' taxi' xine xijein ca capija wa ca om wara taxi' xine ma'

¹ Je ca tomi' xuhu' ca': Ta noc huhun oro win ma' nuhu' me. Jain jain jujun, tomi' querec te jujun. Param jein oro ca taramaja taxi' wa ca mi' ne Tamataracon Iri' Jam ma' quem, jain jain jein quem. Hohot paxi' na pain ca param hwein oro xijein ca taramaja taxi' wa ca mi' ne Tamataracon Iri' Jam ma', ane hohot tamana pan ne ca param hwein ca pijim' hwet taxi' wa xocori capijacon Iri' Jam ne. Je tara ca win xumu tamana pan hwe ta. Jain jain tamana pan jein ca pijim' hwet taxi' wa xocori capijacon Iri' Jam ta.

² Tomi' pan ara xi' non Iri' Jam wari' co tomi' nain xijein ca capija wa ca om wara tomi' taxi' ca ma'. Om ca tomi' tococwa oro wari', xi ha' cocon pain ca taraju pa' wa ta. Tamataracon Iri' Jam paxi' na ca mi' non pain ca tomi' nucun ma', ane om taraju pa' caca co taraju nonon ne, xi an hwet cain ca tomi' mao nein Iri' Jam ta.

³ Ane om ac i ma' ne con wari' co pijim' hwet nain xocori capijacon Iri' Jam ne. Tomi' nonon oro wari'. Quep xiho' nonon, to' hwara' opa nonon, ja' tomi' querec te nonon quem.

⁴ Wari' co tomi' nain xijein ca capija wa ca om wara tomi' taxi' ca ma', quep xiho' e' pan xucun. Wari' co pijim' hwet nain xocori capijacon Iri' Jam ma' iri na ne, quep xiho' nonon oro co cut in xucucun pain ca howa cocon Iri' Jam ma'.

⁵ Param paxi' inuhu' pain ca tomi' tomi' pi' pin hwein oro xijein ca capija wa ca om wara tomi' taxi' hwe ma'. Ane param tamana xuhu' pain ca pijim' hwet hwein xocori capijacon Iri' Jam ne. Wari' co pijim' hwet nain xocori capijacon Iri' Jam ma', wirico co quep xiho' tamana nonon co howa nonon Iri' Jam. Wari' co tomi' nain xijein ca capija wa ca om wara tomi' taxi' ca ma' iri na ne, quep xiho' wijimain e' na co ma'. Mo ta ma' ca xucun wari' co tomi' xo' taxi' nain ca tomi' nucun ma', quep xiho' ac tococwa na co howa nonon Iri' Jam.

⁶ Je ca tomi' xuhu' ca' xere: Mo ta hwet xuhu', mo ta tomi' e' xuhu' pain xijein ca capija wa ca om taraju pa' hwe ma', ha' tarapa' pain ca quep xiho' xuhu' ra? Om na, om ca quep xiho' xuhu'. Quep xiho' e' xuxuhu' pain ca tomi' hwet xo' xuhu' pain ca tomi' capa' Iri' Jam. Quep xiho' e' xuxuhu' pain ca tomi' hwet xo' xuhu' pain ca taraju pa' ne ca'. Quep xiho' e' xuxuhu' pain ca pijim' hwet xo' xuhu' pain ca ca' na xuhu' pain capijacon quem.

⁷ Win ne pain ca on xine caji xuwiwio' ma', je pain ca tao' xine caji violão ma' quem. Mo ta om on xo' cain ca ac xuwiwio' wari' ma', om ca taraju pa' xin tamara' ca on ca. Mo ta om tao' xo' cain caji violão ma' quem, om ca taraju pa' xin tamara' ca tao' ca quem.

⁸ Win caca oro soldado ma' quem, mo ta on tain cain caji taracom soldado ma', pain ca on cut in cocon oro win soldado ca pain ca maji mixita xi' caca ma'. Mo ta om on xo' cain, mo ta om taraju pa' cacain oro win soldado ca ma', om ta cut cacain oro too nucucun, om ta maji mixita xi' caca quem.

⁹ Ac i ma' na pain ca tomi' nuhu' ma' quem. Mo ta tomi' hwein xijein ca capija wa ca om taraju pa' caca oro wari' ma', mo ta om cuhu' xucun wari' co tomi' an hwet taxi' nain ca tomi' nuhu' ma'. Ma' tara ca taraju pa' ac cucuhu' oro wari' ra? Om na, om ta taraju pa' ac cucuhu'. Ac ca tomi' ximama' e' hwe tara ta.

¹⁰ Ma' mija na oro xijein ca capija wa pain oro xijein macan'. Oro wari' co tomi' nanain ma', taraju pa' taraju pa' pi' pin nanain.

¹¹ Mo ta om taraju pa' xin capijacon wari' co tomi' napari' ma', tatirim na ta urun. Ac i ma' napari' quem, tatirim hwe ta napari' quem.

¹² Je ca tomi' xuhu' ca': Win ne ca param hwein oro ca taramaja taxi' wa ca mi' ne Tamataracon Iri' Jam ma'. Na e' na pain ca param hwein ca taramaja taxi' wa ca to' hwara' opa nonon oro co win howa hwe ma' quem.

¹³ Je ca tomi' ca' xuhu' ca': Wari' co tomi' nain xijein ca capija wa ca om wara tomi' taxi' ca ma', na e' na pain ca tomi' ca' con Iri' Jam: Mi' ne pain ca tomi' xo' taxi' tain ca tomi' ne ca', tomi' hwet ac toton tara pain oro win howa ta' cwa' toron.

¹⁴ Taraju wet je e'. Mo ta tomi' xun Iri' Jam cwa', mo ta tomi' xun pain xijein ca capija wa ca om wara tomi' taxi' iri' ca'. Je paxi' na Tamataracon ca mi' napari' pain ca tomi' wa ca'. Ane om taraju pa' pan iri' ne. Om ca mam' tomi' irin ca coromicat nexi'.

¹⁵ Cain' cain' xixi' quem? Mo ta tomi' xun Iri' Jam iri', na e' na pain ca mi' pan capari' pain ca tomi' wa Tamataracon ma'. Na e' na pain ca taraju pa' cacain ca tomi' nexi' oro win ma' nexi' quem. Mo ta com mi' xun pain tamara' Iri' Jam iri' quem, na e' na pain ca mi' pan capari' pain ca com wa Tamataracon ma'. Na e' na pain ca taraju pa' cacain ca com nexi' oro win ma' nexi' quem.

¹⁶ Mo ta tomi' xun Iri' Jam pain ca in ac xun quem, mo ta tomi' e' xun pain xijein ca capija wa ca om wara tomi' taxi' iri' ca'. Mo ta pe ho' capari' wari' co om taraju pa' ma'. Ha' tara ca amém ac ca pain ca tomi' nexi' ra? Xi taraju pa' capari' pain ca tomi' nexi' ta.

¹⁷ Hohot paxi' tara ca tomi' nexi' pain ca tomi' xun Iri' Jam pain ca in ac xun ca', pain ca tomi' xun pain xijein ca capija wa ca om wara tomi' taxi' iri' ca'. Ane om quep xiho' xun wari' co om taraju pa' napari' ne.

¹⁸ Tomi' querec te inon Iri' Jam pain ca tomi' taxi' tain oro xijein ca capija wa ca om wara tomi' taxi' ta' ca'. Tomi' taxi' tiquin' tomi' taxi' tiquin' pi' pin ca' paxi' inuhu' pain.

¹⁹ Ane om hohot capa' ca tomi' wa xijein ca capija wa ca om wara tomi' taxi' ta' pain ca cut in xijexi' ne. Hohot napa' pain ca tomi' wijimain e' tain ca capija wa ca taraju pa' pan caca oro wari'. Ma' ta quep xiho' toton ina. Noc inain ca tomi' tamana e' wa xijein ca capija wa ca om taraju pa' caca ma'.

²⁰ Taraju pa' je ta xere. Ta ximicon pije' mami' hwe pain ca om taraju pa' nuhu' pain ca mi' capari' pain oro ca taramaja taxi' wa Tamataracon Iri' Jam ta. Ximicon hwanana je pain ca coromicat xo' nuhu'. An xiho' e' jujun oro pije' pain ca om coromicat pan teretem nucucun.

²¹ Je ca xirao' pe xine pain capijacon Iri' Jam pane. Tomi' ca' na Taramaxicon Iri' Jam. Tomi' toton oro wari' ne co judeu nana cwa', mam' tomi' toton pain xijein ca capija wa, mam' tomi' toton pain capijacocon oro co om judeu nana ma'. Tomi' ac i ma' paxi' toton, ane ari cara xim cacapa' ne. Om ta taraju wet camain' cacapa' ta. Ac i ma' na ca xirao' pe xine ca tomi' nucun Taramaxicon Iri' Jam pane.

²² Je ca tomi' xuhu' ca': Tomi' iri xin xijein ca capija wa ca om wara tomi' taxi' iri' ca' ne, wirico Iri' Jam co mi' napari' pain. Ma' ta querec pin' cacapa' pain ca hwara' opa ne oro wari' co om howa nanapa' ma' pahu' napari'. Ma' ta querec pin' xucucun pain ca na e' ne pain ca tomi' ha' cacapa' ta nonon. Om ca tomi' capari' pain ca howa iri' ca', tomi' e' tata co om howa nonon. Ca pijim' hwet taxi' wa xocori capijacon ca' iri na ne, je ca mam' tomi' capari' pain ca howa iri' ca' quem. Ma' ta querec pin' mahu' pain ca hwara' opa ne napari'. Om ca tomi' tococwa co om howa nonon ma'.

²³ Je ca tomi' xuhu' ca': Mo ta cut in xujuhu', mo ta tomi' tomi' pi' pin hwein xijein ca capija wa ca om wara tomi' taxi' hwe ma'. Mo ta corom caca co om taraju pa' nana ma', co om howa nana ma', tamanain hwe ta ac cucuhu' tara.

²⁴ Ane om ac i ma' ne pain ca pijim' hwet hwein capijacon Iri' Jam ma' ne. Mo ta pijim' hwet pijim' hwet pi' pin hwein capijacon Iri' Jam ma', mo ta corom ca wari' co om howa ma', co om taraju pa' ma'. Corom ac ca tara, taraju ac cuhu' tara, querec pin' ac cain tara ca caracat nucun. Wap xim napa' xin Iri' Jam ne ac ca tara pahu'.

²⁵ Coromicat ac ca tara: Om paxi' na ca querec pin' cacapa' pain ca pan tem ne oro win ma' ne cwa', ane taxi' pan capa' pain Iri' Jam ne, ac i ma' tara ca tomi' ca ma'. Pe torotop tucu hwet mi' tarain macan', tomi' querec te ac con tara Iri' Jam pain ca in ac con ma'. Pe ho' momon caram cwa' co howa nenem cwa' ira ac con tara quem.

Ca om na ne pain ca ja' teretem xijexi' pain ca cut in xijexi'

²⁶ Je ca tomi' xuhu' ca' xere: Ara ac i ca' ara ac i ca' xam' je pain ca cut in xujuhu' ma'. Com tara tamara' xucun. Pijim' ac cain tara capijacon Iri' Jam xucun. Tomi' hwet ac cain tara xocori ca tomi' nucun Iri' Jam xucun. Tomi' ac cain tara xijein ca capija wa ca om wara tomi' taxi' ca xucun. Tomi' xo' ac cain tara xucun quem. Na e' na pain ca quep xiho' xujuhu' pain oro ca ara nuhu' pain ca cut in xujuhu' ma'. Ma' ta to' hwara' opa xujuhu' con Taramaxicon nexi' ta.

²⁷ Mo ta ma' caca co tomi' xin nanain xijein ca capija wa ca om wara tomi' taxi' caca ma', om ta tamana caca. Mo ta tomi' 2 xi' caca, mo ta tomi' 3 xi' caca, om ta tiquin' ca' cacain ca 3 nucucun. Tomi' cain' tara xucun, maqui' ho' ac caca pa'ao' tara oro xucucun, ac i ma' tara ca ja' corom mao xucucun. Ma' ac ca tara xucun co tomi' xo' nain ca tomi' nucucun quem.

²⁸ Mo ta om ca wari' co tomi' xo' taxi' nain ca tomi' nucucun ma', tacana to ac caca tara. Om ta tomi' hwet cacain ca coromicat nucucun pain ca cut in xujuhu' ma'. Na e' na pain ca tomi' pan cocon Iri' Jam pain ca coromicat pan nucucun ta.

²⁹ Co pijim' hwet xin nanain ca tomi' nucun Iri' Jam ma', mo ta tomi' 2 xi' caca, mo ta tomi' 3 xi' caca, tomi' ac caca tara. Taraju wet ac caca tara oro xucucun. Am hohot ne ca tomi' nucucun, am om hohot ne, ac i ma' tatara co taraju wet nonon ma'.

³⁰ Mo ta tomi' con xucun wari' Iri' Jam ma', pain ca xao pe xao pe wet nucun ma', mo ta tomi' hwet rain ca tomi' xim ca' con, tacana pe pin ac ca tara co wara tomi' ma' quem. Na ra, tomi' hwet rain ta toron, xao pe pin ac ca tara quem.

³¹ Ac i ma' tara ca pijim' hwet pijim' hwet xam' hwein capijacon Iri' Jam. Pijim' cain' tara xucun, pijim' ac ca tara xucun, pijim' ac ca tara xucun quem. Ma' ta taxi' taxi' pi' pin hwe, ma' ta hwara' opa hwara' opa pi' pin hwe ta inuhu'.

³² Wari' co pijim' hwet tain nain capijacon Iri' Jam ma', na e' na pain ca winim' con win ma' ca co wara pijim' ma'. Om ta tomi' am pin con.

³³ Xi ja' teretem xujuhu' ta capari' Iri' Jam ta. Noc napari' pain ca teretem caracan xijexi' pain ca pijim' xijexi'. Tomi' querec te xujuhu', ta to' i'ina xujuhu' me ta napari'. An xiho' jujun oro wari' nucun Iri' Jam co cut in xucucun pain ca howa caca ma',

³⁴ cacam oro narima' ma'. Tacana to tatara oro narima' pain ca cut in xujuhu' ma'. Tomi' caho' tata pain ca tomi' am pin cocon co pijim' nana ma', pain ca tomi' querec cocon pain ca om taraju pa' nequequem. Tomi' ha' e' totoron waram taxicacam. Win ne ca xirao' pe ca Moisés cara pane.

³⁵ Mo ta om taraju pa' cacama, mo ta taraju pa' xi' cacama quem, tomi' querec ac cocon tara waram taxicacam pain ca aram aram in mama' cacamain xiricacam. Xi hohot ne pain ca tomi' cacama pain ca cut in to xujuhu' ta.

³⁶ Cain' cain' xihwe quem? Wahu' tara co pijim' hwet cain' nanain capijacon Iri' Jam ra, coromicat ac i ma' hwe ra? Xica' to urut co taraju nanain capijacon Iri' Jam ta, ac i ma' na ca coromicat nuhu' ra?

³⁷ Mo ta ma' cuhu' co pijim' hwet taxi' inain xi' ma nain capijacon Iri' Jam ma', mo ta ma' cuhu' co mi' napa' pain oro xijein ca taramaja wa xi' ma hwein Tamataracon Iri' Jam ma' quem. Na e' na pain ca querec pin' cain oro ca xirao' mi' xuhu' ca'. Wirico Taramaxicon nexi' co xirao' rain napa'. Tomi' ha' jein ta napari'.

³⁸ Mo ta om tomi' ha' cain, mo ta miri'om cain ca xirao' ne, om ta ha' hun quem. Miri'om jun.

³⁹ Je ca tomi' xuhu' ca' xere: Win xumu jein ca pijim' hwet wa capijacon Iri' Jam. Param tamana jein. Hohot paxi' na pain ca om narain ho' xujuhu' pain ca tomi' wa xijein ca capija wa ca om wara tomi' taxi' hwe ma'.

⁴⁰ Ane tomi' xuhu' pain i ca' ne: Om ca ha' ne pain ca teretem caracan xujuhu' pain ca cut in xujuhu' ta. Oro ca ara hwe pain ca cut in xujuhu' ma', na e' na pain ca ara awi hwein. Na e' na pain ca ara xo' hwein quem.