1 Coríntios 12 - Tradução Bíblica Pacaas Novos

Ca mi' capari' pain ca taramaja taxi' wa Tamataracon Iri' Jam

¹ Tomi' xo' ho' xuhu' pain carawa ca mi' capari' Tamataracon Iri' Jam ta xere, pain ca mi' capari' pain ca taramaja mi' taxi' xun Taramaxicon nexi' ca'. Taraju pa' je e'.

² Pain ca om howa querec nuhu' pane, ha' ximama' hun Caxicon Jam, ac ca joc wat cuhu' na pane, wara taxi' ara xi' hwein i ma' ta. Howa jein oro caji pacun ca Iri' Jam xi' ma hwe ma' iri nuhu' ne, howa ximama' ac hwein na oro caji pacun ca om e' ma', ca om capijain ma' quem.

³ Je ca tomi' xuhu' ca', taraju pa' jein i ca': Wari' co tomi' noro non Jeju ma', om na Tamataracon Iri' Jam ca tomi' wi non ma', om na. Wari' co tomi' hwet nain ca Iri' Jam nucun Jeju ma' quem, pain ca Iri' Taramaxicon na Jeju ta ca ma', xica' pe na Tamataracon Iri' Jam ca tomi' wi non ma' quem.

⁴ Ni paxi' na oro ca taramaja taxi' wa ca mi' capari' Tamataracon Iri' Jam, ane xica' pe pan ne Tamataracon ca mi' napari' pain ne.

⁵ Ni paxi' na oro ca taramaja taxi' wa pain ca taramaja mi' xun Taramaxicon nexi' ca', ane xica' pe ca Taramaxicon nexi' co taramaja mi' iri' ne.

⁶ Ni paxi' na oro ca taramaja nexi' ca' quem, ane xica' pe ca Iri' Jam co quep xiho' napari' pain ne. Mi' mi' xam' napari' pain ca hwara' opa wa pain ca taramaja mi' xun ca'.

⁷ Mi' mi' xam' napari' pain ca taramaja taxi' wa Iri' Jam. Mi' napari' pain ca hwara' opa nein Tamataracon quem, ma' ta quep xiho' xujuhu' ta napari'.

⁸ Ma' nana co mi' wawa pain ca tomi' hwet taxi' cacain xocori ca coromicat nucun Iri' Jam ma'. Je Tamataracon ca mi' pan nain i ma'. Ma' nana xucucun co mi' wawa pain ca tomi' xo' taxi' cacain xocori capijacon ca taraju pa' je capari' ma' quem. Je Tamataracon ca mi' nain i ma' quem, om na xijein ca mi' nain.

⁹ Ma' nana xucucun co mi' wawa pain ca howa tamana wa pain ca querec pin' cacain ca hwara' opa nucun Iri' Jam ma'. Je Tamataracon ca mi' nain i ma', om na xijein. Ma' nana xucucun co mi' wawa pain ca quep xio taxi' cocon co caxi nana ma'. Je Tamataracon Iri' Jam ca mi' nain i ma' quem, om na xijein.

¹⁰ Ma' nana xucucun co mi' wawa pain ca an hwet taxi' cacain ca hwara' opa nucun Iri' Jam ma', pain ca ara taxi' cacain oro ca om ara taxi' ne ca wari' wa ma'. Ma' nana xucucun co mi' wawa pain ca pijim' hwet taxi' cacain xocori capijacon Iri' Jam ma' quem. Ma' nana xucucun co mi' wawa pain ca querec pin' taxi' cocon co pijim' xo' nana ma'. Am Tamataracon Iri' Jam ne ca tomi' wi nonon ma', am Caxicon Jam ca co tomi' wi nonon ma', querec pin' ac tococwa na pain. Ma' nana xucucun co mi' wawa pain ca tomi' taxi' cacain xijein ca capija wa ca om wara taxi' caca ma'. Ma' nana xucucun co mi' wawa pain ca taraju pa' wa quem, pain ca tomi' xo' taxi' cacain ca tomi' nucucun ma' quem.

¹¹ Je Tamataracon Iri' Jam ca ara nain i ma' pari', ara ara pi' pin nain. Je Tamataracon Iri' Jam ma', om na xijein. Mi' napari' pain ca ara taxi' xin ca param nein. Mi' ni mi' ni xam' napari' pain oro ca taramaja taxi' wa pain ca taramaja mi' xun Iri' Jam.

Ca mija ne coximinain cwerexi'

¹² Ma' xica' pe paxi' na cwerexi' ca', ane mija ne oro coximinain ne. Ma' na araxi', ma' na taparaxi', ma' na caximaxi', mija paxi' na oro xijein coximinain cwerexi'. Ane xica' pe ne cwerexi' ne. Ac i ma' na curucun Cristo quem. Mija na oro xijein coximinain curucun.

¹³ Ac i ma' iri' pain ca curucun Cristo iri' quem. Mija paxi' iri'. Ma' nana co judeu nana. Ma' nana co om judeu nana. Ma' nana co taramaja mi' e' nonon oro xucucun wari'. Ma' nana co om taramaja mi' nonon oro xucucun wari'. Mija paxi' iri', ane cut corom to cut corom to xam' capari' pain curucun Cristo Tamataracon Iri' Jam ne. An xiho' nain ca ja' iri' com pane, pain ca cut corom to mi' capari' pain curucun Cristo. Ma' xica' pe na Tamataracon Iri' Jam ca cut corom to mi' napari' pain curucun Cristo, om na xijein. Pe ho' pe ho' xam' napari' quem.

¹⁴ Win ne cwerexi' ca', pain ca mija ne oro coximinain cwerexi' ca'. Om ca ma' xica' pe ne coximinain. Ma' mija na.

¹⁵ Mo xi tomi' ca' capari' caximaxi': Om xi pe tain cwerem, xi quep taxi' ta' ta, taxi' e' inain ca xut wa, om ca quep taxi' ta', je xi om pe qui' tain cwerem ca', am tomi' ac i ma' paxi' capari' caximaxi'. Ane pe cara nein cwerexi' ne.

¹⁶ Tomi' xin tarajixi' quem, mo xi tomi' ca' capari' tarajixi': Om xi pe tain cwerem, xi querec taxi' ta' ta, taxi' e' inain ca taraju wa, om ca querec taxi' ta', je xi om pe qui' tain cwerem ca', am tomi' ac i ma' paxi' capari' tarajixi'. Ane pe cara nein cwerexi' ne.

¹⁷ Mo xi om ne oro xijein coximinain cwerexi' ca', mo xi ma' e' ne tocoxi' ca', om xi taraju ac iri'. Mo xi om ne werexi' ca', mo xi ma' e' ne tarajixi' ca', om xi nac ac iri' quem.

¹⁸ Je ca tomi' xuhu' ca': Wirico Iri' Jam co mi' napari' pain oro coximinain cwerexi', an to xo' an to xo' xam' nain pain cwerexi'. Maqui' nain ximicon quem, wirico pan co an to xo' mi' napari' pain, ara nain ca param pan nucun.

¹⁹ Cain' cain' xira quem? Mo xi om mija ne oro coximinain cwerexi' ca', mo xi xica' pe e' ne coximinain ca', om xi ma' ac ne cwerexi' ta.

²⁰ Je ca tomi' xuhu' ca': Xica' pe paxi' na cwerexi', ane mija ne oro coximinain ne.

²¹ Je ca tomi' xuhu' ca': Om ca na ne pain ca tomi' ca' nein mixi' tocoxi' ca': Noc inem pain ca quep xiho' mapa', xica' ara pan tain ta, om ca tomi' ac i ma' ac ne ta. Om ca na ne pain ca tomi' ca' nein winaxi' caximaxi' ca' quem: Noc inem pain ca quep xiho' mapa', xica' xut pan ta' ta, om ca na ne pain ca tomi' ac i ma' ne quem.

²² Oro coximinain cwerexi' ca om hwara' opa homa ma', je ca quep xiho' tamana capari' ca'. Ma' xirapari' na irin.

²³ Ma' na oro coximinain cwerexi' ca pe caho' iri' con wom. Om ca querec ac cacain oro xucucun wari'. Oro xijein ca to' wixipa' napari' ca' iri na ne, ara xite irin, narain ho' irin. Ma' ta om to' wixipa' capari' ta iri'.

²⁴ Oro xijein coximinain cwerexi' ca om to' wixipa' napari' ca' iri na ne, om ca ara xite xin, om ca narain ho' xin quem. Wirico Iri' Jam co quep ac i ma' nain cwerexi', ma' ta ara xite hwein oro coximinain curuhu' ca om querec awi homa ta napari'.

²⁵ Ma' ta om ari xijein oro coximinain curuhu' ta napari'. Ma' ta tomi' querec te xijein, ma' ta quep xiho' quep xiho' pi' pin xijein ta napari'.

²⁶ Ma' xica' pe iri na coximinain cwerexi' ca caxi ca' ne, caxi caxi pi' pin ac ne na oro xijein. Ma' xica' pe iri na coximinain cwerexi' ca ara xite iri' ca' ne, hohot hohot pi' pin ac ne na oro xijein quem.

²⁷ Je ca tomi' xuhu' ca': Curucun Cristo iri' pain ca jao jao ma' xijexi'. Coximinain curucun Cristo coximinain Cristo xam' iri'.

²⁸ Wirico Iri' Jam co an to xo' napari' pain ca coximinain curucun Cristo iri' ca', pain ca cut in xijexi' pain ca howa xun ca'. An to xo' an to xo' pi' pin napari' pain curucun Cristo. Mo nana: Mi' cain' napari' cocon oro apóstolo co tomi' hwet nanapari' pain capijacon con Jeju. Ma' ac caca na co pijim' hwet nanain capijacon Iri' Jam. Ma' ac caca na co tomi' xo' nanain quem. Ma' ac caca na oro xucucun quem, co an hwet taxi' nanain ca hwara' opa nucun Iri' Jam pain ca ara taxi' cacain oro ca om ara taxi' ne ca wari' wa ma'. Ma' ac caca na co to' xio taxi' nonon co caxi nana, co quep xiho' taxi' nana quem, co taramaxicon taxi' nana, co tomi' taxi' nanain xijein ca capija wa ca om wara tomi' taxi' caca, ac i ma' iri' pain ca coximinain curucun Cristo iri' ca'.

²⁹ Apóstolo apóstolo pi' pin iri' ra? Om na. Pijim' hwet pijim' hwet pi' pin irin capijacon Iri' Jam ra? Ca' na ca' na pi' pin irin quem ra? Om na quem. An hwet taxi' an hwet taxi' pi' pin irin ca hwara' opa nucun Iri' Jam pain ca ara taxi' xin oro ca om ara taxi' ne ca wari' wa quem ra? Om na quem.

³⁰ To' xio taxi' to' xio taxi' pi' pin ururun co caxi nana ra? Tomi' taxi' tomi' taxi' pi' pin irin oro xijein ca capija wa ca om wara tomi' taxi' iri' ra? Tomi' xo' taxi' tomi' xo' taxi' pi' pin irin ca tomi' mao nein oro xijein ca capija wa ca tomi' hwet caca oro win ma' nexi' quem ra? Om na quem.

³¹ Je ca tomi' xuhu' ca': Na e' na pain ca jain jain hwein ca taramaja taxi' wa ca quep xiho' tamana nonon co win howa hwe ma'. Win xumu jein ta. An hwet mi' ho' xuhu' pain ca taramaja taxi' wa ca awi tamana, awi tamana tiquin' ca' nain oro xijein ca taramaja taxi' wa ca mi' xim capari' Tamataracon Iri' Jam. Mo ta an xiho' hwein ca tomi' xuhu' ca', ara xo' ac hwein tara ca taramaja nuhu' ca mi' xim cuhu' Tamataracon Iri' Jam. Taraju wet je e'.