1 Coríntios 11 - Tradução Bíblica Pacaas Novos

¹ Je ca tomi' xuhu' ca': An xiho' xine me. Win ne ca an xiho' ton Cristo ca'.

Ca hu tococwa pain ca in ac cocon Iri' Jam

² Tomi' querec te inuhu' pain ca tama' mam' pe wet hwein ca tomi' xuhu' pane, tomi' querec te inuhu' pain ca tama' tomi' ha' mahu' pain ca tomi' hwet xuhu' pain ca ara je capari' Iri' Jam quem.

³ Tomi' querec te paxi' inuhu' pain, ane ma' ma' wet ne i ca' ca taraju pa' je xuhu' ca' ne. Ca' na: Wirico Cristo co taramaxicon pe ho' non tarama' ma', taramaxicon pe ho' taramaxicon pe ho' xam' tata pain ca tarama' nucucun. Wirico tarama' co taramaxicon pe ho' nam narima' ma'. Wirico Iri' Jam co taramaxicon pe ho' non Cristo ma' quem.

⁴ Tarama' co mam' tatep pa' nain winacon con wom ma', mo ta tomi' ton con Iri' Jam, mo ta pijim' hwet tain cain capijacon ca' quem, pain ca tatep pa' cain winacon ma', ac ca om tomi' ha' con na Cristo co taramaxicon ne ca ma', ac ca om querec pin' con na pain ca hwara' opa nucun.

⁵ Narima' co om tatep pa' nain winacam ma' iri na ne, mo ta tomi' ton con Iri' Jam ma', mo ta pijim' hwet tain camain capijacon quem, pain ca om tatep pa' camain winacam ma', ac ca om tomi' ha' con na taxicam co taramaxicon ne cama, om ca querec pin' con pain ca hwara' opa nucun quem. An xiho' nam caxicam narima' co wijac pi' pin wa tenenequem ma'.

⁶ Mo ta om tatep pa' ra na camain winacam ma', pain ca tomi' ton con Iri' Jam ma', je pain ca pijim' hwet tain camain capijacon quem, na e' na pain ca wijac pin camain tenenequem quem. Wijac wijac pi' pin tarain, wixipa' ac cama tara. Mo ta noc camain ca wixipa' wa, tatep pa' ac camain tara winacam ta.

⁷ Tarama' ma', om ca na ne pain ca tatep pa' cain winacon pain ca tomi' ton con Iri' Jam, je pain ca tomi' hwet tain cain capijacon quem. Xi an xiho' ara con Iri' Jam co taramaxicon. An hwet nain ca hwara' opa nucun Iri' Jam. Narima' ma' iri na ne, an hwet nain ca hwara' opa nucun taxicam quem.

⁸ Xi quep tarama' xine tocoxicam narima' ta. Quep narima' pan ta tocoxicon tarama', maqui' non tarama' narima'.

⁹ Om ca quep mi' cam con tarama' narima' Iri' Jam pane quem. Quep mi' pan non cam narima' tarama', ma' ta quep xiho' mon tarama' nem ta nam.

¹⁰ Je ca na e' ne pain ca tatep pa' camain winacam narima' ma'. Xi querec ara cacam oro jam co taramaja mi' nonon Iri' Jam ta. Tatep pa' iri tarain winacam ne, querec pin' ac tacama tara pain ca tomi' ha' con taxicam.

¹¹ Ane na e' ne pain ca quep xiho' xijexi' pain ca howa xun Taramaxicon nexi' ne. Ca tarama' nexi' ca', ma' xira na irim narima' co quep xiho' napari'. Ca narima' nequequem ma' quem, ma' xira na napari' pain ca tarama' nexi' ca' quem, pain ca quep xiho' xixim quem.

¹² Quep narima' paxi' ta tocoxicon tarama' pain ca xo' quep qui' tacama pain cara pane. Ane wijima con tarama' narima' ma' ne. Wirico Iri' Jam co ara nain i ma' pari', quep non tarama', quep nam narima' quem.

¹³ Cain' cain' ne ca coromicat nuhu' ma' quem? Mo ta tomi' ton con Iri' Jam narima' ma', hohot na pain ca om mam' tatep pa' camain winacam ra?

¹⁴ Je ca tomi' xuhu' ca'. Mo ta quiji' ne tenenexi' pain ca tarama' nexi' ca', wixipa' ac iri' na, je cwerein pari'.

¹⁵ Ane querec awi ne ca quiji' ne tenenequequem oro narima' ma' ne. Je ca mi' tacacama pain ca quiji' ne tenenequequem. Mam' tatep pa' ara xi' nanain winacacam.

¹⁶ Je i ma'. Je ca pijim' taxipa' urut ca'. Ac i ma' taxipa' nana co win howa iri' pain ca cut in xucucun pain ca howa cocon Iri' Jam ma', pain ca tatep pa' cacamain winacacam oro narima'. Mo ta ma' caca wari' co noc nanain ca tomi' ne ca', om ca na ne pain ca tomi' ximama' caca.

Ca to' i'ina xucucun pain ca toc xin comi memem caca

¹⁷ Hu xim inuhu' pain i ca' quem. Om ca tomi' querec te xuhu' pain, xi quep xiho' xujuhu' pain ca cut in xujuhu' ta. To' i'ina e' xujuhu'.

¹⁸ Je i ca' ca tomi' xim xuhu' ca': Ma' nana co tomi' hwet nanapa' pahu', pain ca coromicat ni ca' xujuhu' pain ca cut in xujuhu' ma'. Tomi' caracan xucucun ta nanapa' pahu'. Ac ca iri'o' ne cocon na quem. Iri'o' paxi' tara pahu'.

¹⁹ Taxi' ara xi' irin i ca' quem, pain ca na e' ne pain ca coromicat ni ca' xujuhu' pain ca tomi' caracan xujuhu' ma'. Ma' ta querec pin' tococwa oro co win howa hwe pain ca hohot cocon Iri' Jam ta.

²⁰ Cut in iri xujuhu' ne, pain ca mam' pe wet xin hwein ca mi' pin nucun Taramaxicon nexi' hwe ma', om na capam' nucun Taramaxicon nexi' ca cao' xi' hwe ma'. Om na comi memem nucun ca toc xi' hwe ma' quem.

²¹ Capam' nuhu' pan ca cao' xi' hwe ma'. Comi memem nuhu' pan ca toc xi' hwe ma' quem. Xi wara cao' harahap ara hwein carawa ca cut qui' pan hwe ma'. Om ca winim' xujuhu' pain. Ma' ac caca na co pe' pe' wet nana, ma' ac caca na co toc tamanain to nana quem.

²² Cain' cain' xihwe quem? Om nuhu' xirim ca cao' to hwe ra? Om nuhu' xirim ca toc to hwe ra? Ac ca noc xujuhu' a xira pain ca howa hun Iri' Jam ma', ara wixipa' pin ac hwehwem na co om nanam carawa. Cain' cain' xuhu' quem? Tomi' querec te xuxuhu' pain ra? Om ca tomi' querec te xuhu' pain ta.

Ca toc xine comi memem

²³ Wara tomi' hwet ara xi' inuhu' pain ca tomi' xo' capa' Taramaxicon nexi' pane, pain ca toc xine comi memem ca'. Ca' inuhu' pane: Xim pin iri na con ne, pain ca quep xiho' toton cocon oro taramaxicon Judas pain ca quep xun cocon pane, an pan ac cain na capam' Taramaxicon nexi' Jeju.

²⁴ Tomi' ac con na Cote ca: Tomi' querec te urut pum pain ca mi' maparut pain capam' ca' quem Te iri non ne, jicat caracan ac cain na, tomi' ac cocon na quem: Capam' ca', an xiho' nain cwere ca'. Om ca narain ho' xuhu' pain. Cao' jein, tama' ara cara jein. Ma' ta mam' pe wet mahu' pain ca mi' pin caho' xim xuhu' ca' inuhu' ta na ca tomi' cocon pane.

²⁵ Ac i ma' nain comi memem quem. Cao' cao' pi' pin iri nana ne, an ac cain na ca mam' toc wa. Tomi' ac cocon na: Comi memem ca ji'ao pe xine pain ca mam' toc wa ca', an xiho' nain cocu ca' quem. Ao mao ho' tara cocu. Ac i ma' tara ca hwet pin ne xocori ca tomi' an pe xo' mi' cuhu' Te cwa', pain ca to' witan pin xim cuhu' ca'. Toc xin iri jein ne, toc ac hwein tara. Ma' ta mam' pe wet mahu' pain ca ji'ao mi' xim xuhu' pain cocu ca' inuhu' ta na ca tomi' cocon pane.

²⁶ Je ca tomi' xuhu' ca': Cao' xin iri hwein capam' ca an xiho' nain curucun Jeju ca' ne. Toc xin iri hwein comi memem ca an xiho' nain quicon ma' quem ne. Ac ca pijim' hwet huhun na oro wari' pain ca mi' pin caho' cuhu' Taramaxicon nexi' quem. Xi om ne ca an hwet mi' ara huhun pain capam' je comi memem ca tomi' mi' nain ca mi' pin nucun ta. Ara cara jein quem. Ara ara maqui' pa' ac cuhu' ma' tara ta.

²⁷ Je ca tomi' xuhu' ca': Oro wari' co cao' ximama' nanain capam' nucun Taramaxicon nexi' ma', oro wari' co toc ximama' nanain comi memem nucun ma' quem, caracat ac caca na. Xi waraju ara cacain curucun pain quicon ta.

²⁸ Cao' xin iri nanain ne. Toc xin iri nanain ne. Noro noro xam' ac cacain tara ximicocon. Am coromicat xo' cocon Taramaxicon nexi' pain. Am om coromicat xo' cocon pain. Mo ta hohot ne ximicocon pain ca coromicat xo' cocon ma', cao' ac cacain tara, toc ac cacain tara quem.

²⁹ Mo ta cao' waraju hwein. Mo ta toc waraju hwein quem. Ac ca wap xut me ac hun na Iri' Jam. Xi querec pin' hwein curucun Taramaxicon nexi' ta.

³⁰ Je ca mija caca oro win ma' nuhu' co om hwara' opa nana ma', co caxi nana pahu' quem. Je ca ma' caca co cono' nana pahu' quem.

³¹ Je ca tomi' xuhu' ca'. Mo xi noro pan xin ximixi' ca', mo xi querec pin' xin ca coromicat nexi' pain ca toc xin comi memem ca', om xi wap capari' Iri' Jam.

³² Ane wap capari' Taramaxicon nexi' ne. Wap iri napari' ne, hu ac capari' na. Ma' ta om wap wi xihwe cocon oro caracat co om howa nanapa' ta napari'.

³³ Je ca tomi' xuhu' ca' xere: Cut in xijexi' iri je ne, cao' xin iri jein capam' nucun Taramaxicon nexi' ne, toc xin iri jein comi memem nucun ma' ne, winim' ac xujuhu' tara.

³⁴ Mo ta ma' ca win ma' nuhu' co pe' ma', cao' cain' tara pain xiricon. Ma' ta om wap xihwe pain ca cut in xujuhu' ma'. Ma' ma' wet paxi' na oro ca tomi' xo' xim xuhu' ca'. Winim' cain' xine e'. Main tomi' xo' xuhu' pain ca aram aram hwet xuhu' ta.