1 Coríntios 10 - Tradução Bíblica Pacaas Novos

Ca hu tococwa pain ca pe torotop mi' xine caji pacun ca Iri' Jam xi' ma caca oro wari' ma'

¹ Mam' pe wet jujun oro hwanana nexi' co ja' ja' nonon Moisés pane ta xere. Taraju pa' jein ca ara nonon pane. O o pi' pin nonon tajain nanawin nucun Iri' Jam. Witan witan pi' pin nana pain ca xuruxut xom tacaracam' mama' cacain Cote ne Com Ca Paca' ma', je i ma' wixinain com cocon.

² Tatep pa' iri nonon tajain nanawin ne, xuruxut xom tacaracam' mama' iri nanain cote ne com ne, ac ca ja' ja' pi' pin tococwa na pain com. Xi om ne ca taxipa' pin ara cocon Moisés pane.

³ Cao' cao' pi' pin nanain capam' ca mi' cocon Iri' Jam, om na xijein capam' ca cao' caca, cao' e' nanain capam' ca mi' cocon Iri' Jam.

⁴ Ac i ma' nanain com quem, toc toc pi' pin nanain com ca mi' cocon Iri' Jam quem. Om na xijein com ca toc caca, toc e' nanain com ca mi' cocon Iri' Jam pane, ca weweweo qui' nein pacun con Iri' Jam pane. Taraju wet je e', pacun ca weweweo qui' ne com pane, an xiho' non Cristo co tama' ja' ja' nonon pane. Wirico co querec wet nonon pane.

⁵ Ac i ma' paxi' nana pane, ane om hohot cocon Iri' Jam ne. Mija nana co om hohot nonon, ma' paric ca' e' nana co hohot nonon pane. Je ca to' parapa' pin tococwa pane, cono' to ac cacain na mahweri pane quem.

⁶ Tomi' xin oro carawa ca ara nonon hwanana pane. Para ara cocon quem? Om na, ma' ta ma' ne xumuhu' pain xocori ca' napari' Iri' Jam. Ma' ta om an xiho' huhun pain ca param ximama' cacain carawa ca om awi ta napari'.

⁷ Ma' nana co pe torotop mi' querec te nanain oro caji pacun ca Iri' Jam xi' ma caca pane. Win ne ca xirao' pe xine pain capijacon Iri' Jam pane. Ca' na con: Cao' xi' nana, toc xi' nana, xao to ac caca na, cao' ac caca na, toc ac caca na quem. Maji waraju xi' nana, waraju waraju ac caca na, pi' ximama' ac caca na quem. Ac i ma' na ca xirao' pe xine pain capijacon Iri' Jam pain ca pe torotop mi' querec te cacain oro caji pacun pane. Om ca na ne pain ca an xiho' xuxun ta.

⁸ Ma' nana co quep ximama' nana pane, cono' 23.000 ac caca na quem. Xica' pe na xec nein ca cono' nucucun pane. Om ca na ne pain ca an xiho' xuxun pain ca quep ximama' caca quem.

⁹ Ma' nana co tomi' taparam' nonon Taramaxicon nexi' pane quem. Xiram pa' paxi' tata, tomi' taparam' ho' tomi' taparam' ho' ac cocon na, quio cono' pin ac cocon na caxicon em'. Om ca na ne pain ca an xiho' xuxun pain ca tomi' taparam' cocon Taramaxicon nexi' quem.

¹⁰ Ma' nana co tomi' wijimi nana pane quem. To' parapa' ac cocon na jam co taramaja mi' non Iri' Jam. Om ca na ne pain ca an xiho' xuxun pain ca tomi' wijimi caca quem.

¹¹ Je ca tomi' xuhu' pain oro ca ara nonon hwanana pane. Para ara cocon quem? Om na, ma' ta ma' ne xumuhu' ta napari' Iri' Jam. Wap ac i ma' inonon oro wari' co om tomi' ha' nanapa' ta napari'. Xirao' jein ta ac tococwa na oro co xirao' pe nanain capijacon quem. Hu napari' pain. Wixicam pin ara xi' na ca pi' pin ta' ne macan' pain oro xec nexi' ca'.

¹² Je ca tomi' xuhu' ca': Mo ta coromicat ca' hwe: Om ta caracat ta', om ta pan' mao ta', xi hwara' opa ara ta' ta, am coromicat ac i ma' hwe ma'. Ma' tara xumuhu' me. Ma' ta om caracat hwe, ma' ta om camara' hwe.

¹³ Taraju wet je e': Pain ca to' i'ina cuhu' oro carawa ma', je cwerein mao na. To' i'ina taxipa' tata oro wari' ma' quem. Ane om an in pan cain capijacon ca wara tomi' pe capari' Iri' Jam ne. Om ca mixein cuhu' Iri' Jam. Narain ho' nuhu' con Caxicon Jam ma', pain ca caracat je caracat je ja' camara' xim cuhu' ma'. Quep xiho' nuhu', to' quereme nuhu' quem. Tomi' querec iri turuhu' Caxicon Jam ma' ne, pain ca caracat je cuhu' ma', quep xiho' pan ac cuhu' tara Iri' Jam. Mi' pan ac cuhu' tara pain ca witan ca' hun Caxicon Jam, ma' ta quereme hwe ma', ma' ta hwara' opa cara hwe ma' quem.

Ca om na ne pain ca toc wa comi memem nucun Taramaxicon nexi' pain ca howa xine oro caji pacun

¹⁴ Je ca tomi' xuhu' pain ca tomi' querec te xuhu' ca' xere. Ta pe torotop pe mi' querec te camain' hwein oro caji pacun ca Iri' Jam xi' ma caca oro wari' ma' me ta. Win ne ca jein ca' hwein oro ca to' jin' nuhu' ma', ac i ma' tara pain ca jein ca' hwein oro caji pacun.

¹⁵ Win ne ca coromicat xo' urut ta hwe ma'. Je ca tomi' ac i ma' xuhu' ca'. Cain' ca coromicat mi' mahu' pain ca tomi' xuhu' ca'? Am iri'o' na ta mahu' pain ca xirao' ne ca', am om iri'o' na ta mahu' pain.

¹⁶ Toc xin comi memem iri iri' ne. Tomi' querec te urut pum pain ca mi' maparut pain iri urun Iri' Jam ne. Querec pin' wi ac irin na quicon Cristo pain ca hohoc pin capari' pain ca caracat nexi'. Jicaracat cao' pin iri irin capam' ma' ne, querec pin' wi ac irin na curucun pain ca mi' pin caho' capari' quem.

¹⁷ Mija paxi' iri', ane xica' pe pin ne cwerexi' ne, ac je na. Win ne ca xica' pe ne capam' ca cao' iri' quem. Cao' wi pin irin ca xica' pe nein capam'.

¹⁸ Noro jujun oro win judeu ta' cwa'. Cao' pin iri nanain cwerein carawa ca mi' tocwa Iri' Jam ne, ac ca mi' wi cocon pain na oro sacerdote quem.

¹⁹ Taraju pa' hwein ca tomi' xuhu' ca' quem? Hwara' opa na carawa ca mi' xine caji pacun ca Iri' Jam xi' ma caca oro wari' ra? Caji pacun ca Iri' Jam xi' ma caca ma' quem? E' na rain?

²⁰ Om na ta. Carawa e' na. Caji pacun e' na. Taraju pa' je e'. Carawa ca mi' cacain oro caji pacun ma', mi' pan nonon pain oro caxicon jam. Om ca mi' cocon pain Iri' Jam, mi' nonon pain oro caxicon jam. Mo ta cao' hwein carawa ca mi' cocon pain oro caxicon jam ma', ac ca tomi' querec te wi huhun na pain ca in ac cocon oro caxicon jam ma' quem. Noc inuhu' pain ca in ac huhun oro caxicon jam quem.

²¹ Om ca na ne pain ca toc hwein comi memem nucun Taramaxicon nexi' pain ca toc hwein comi memem nucucun oro caxicon jam. Om ca na ne pain ca cao' hwein carawa nucun Taramaxicon nexi' pain ca cao' hwein carawa nucucun oro caxicon jam quem.

²² Cain' cain' xihwe quem? Tomi' taparam' pin xun hun Taramaxicon nexi' ra? Hwara' opa tiquin' ca' urun xi' ma hwe ra? Om na ta.

Ca hohot ne pain ca om to' i'ina xijexi'

²³ Ma' nana co tomi' ca' nana ma': Hohot paxi' na pain ca ara xin oro ca param iri' ca' na ca tomi' nucucun. Ane om quep xiho' quep xiho' pi' pin capari' oro carawa ca param iri' ne. Hohot paxi' na cocon, ane om to' hwara' opa to' hwara' opa pi' pin capari' oro carawa ca param iri' ne.

²⁴ Om ca na ne pain ca win xumu xin ca param pan nexi'. Na e' na pain ca win xumu xin ca param nucucun oro win ma' nexi', na e' na pain ca quep xiho' xuxun ta.

²⁵ Je ca tomi' xuhu' ca': Hohot na pain ca cao' cao' pi' pin hwein oro cwerein carawa ca vender wa ma'. Mo ta mi' xine pain oro caji pacun ca Iri' Jam xi' ma caca oro wari' ma', mo ta om mi' xine pain, ta tomi' querec hwe pain me. Ma' ta om i'ina ne xumuhu' pain.

²⁶ Xi xirao' pe ca' ara xine capijacon Iri' Jam pane: Wirico Iri' Jam co mene nain macan', wirico co mene mene pi' pin nain oro carawa ca to nain quem. Ac i ma' na ca xirao' pe xine pain capijacon Iri' Jam pane.

²⁷ Mo ta tomi' cuhu' wari' co om howa ma', tomi' ca' turuhu': Harahap je, cao' to ho' xine pain xuru ta tara pain ca tomi' cuhu' ma'. Mo ta param hwein, ma ac hun tara, hwet ac hun tara, cao' cao' pi' pin ac hwein tara carawa ca mi' cuhu' ma'. Cao' e' jein, ta tomi' querec hun pain ca main ca maqui' ne carawa ca' hun me. Ma' ta om i'ina ximama' ne xumuhu' pain.

^28-29 Ane om ac i ma' ne pain ca tomi' ca' cuhu' ne, mo ta tomi' ca' cuhu': Cwerein carawa ca cao' xi' iri' ca', mi' nanain pain caji pacun ca Iri' Jam xi' ma caca oro wari' ma', mo ta tomi' ac i ma' cuhu'. Om ac ne tara ca cao' hwein, xi om ne ca tomi' hwet ara cuhu' pain ta. Ta cao' hwein me, ma' ta om i'ina pan ne ximicon co tomi' hwet nuhu' ma'. Om ca tomi' xuhu' pain ca i'ina tara xumuhu' pan xuhu', taxi' inuhu' pain ca om i'ina ne xumuhu' pain ca cao' hwein ma'. Tomi' mi' e' inuhu' con co ma' co tomi' hwet nuhu' ma'. Ta cao' hwein me ta, ma' ta om i'ina pan ne ximicon pain ca cao' hwein ma'. Am ma' ca oro win ma' nuhu' co tomi' querec ca' ma' quem: Cain' cain' xita' ne? Cao' xitain na ina, xi tomi' caho' capa' pain Iri' Jam ta. Om ca na ne pain ca tac caho' capa' xucun wari' co i'ina pan ximicon ta, ac i ma' paxi' tara ca tomi' nucun.

³⁰ Tomi' ca' ac ca tara quem: Je xi om tomi' em' capa' quem? Xi tomi' querec te pan ara ton Iri' Jam pain ca mi' capa' pain carawa ca cao' ta' ta' ca', ac i ma' paxi' tara ca tomi' nucun.

³¹ Je i ma' ira inuhu'. Oro carawa ca ara xi' hwe ma', pain ca cao' xi' hwe ma', pain ca toc xi' hwe ma' quem, pain ca ara xin hwein oro carawa ma', ara xin iri jein ne, ara ac hwein tara. Ma' ta in ac cocon Iri' Jam oro wari' co querec nanapari' pain ca ara xin ca', ac i ma' tara ca coromicat nuhu' ta.

³² Ta to' i'ina huhun oro wari' me ta. Ta to' i'ina huhun oro judeu me, ta to' i'ina huhun oro co om judeu nana me, ta to' i'ina huhun co win howa hwe pain ca howa hun Iri' Jam me ta.

³³ An xiho' xine quem. Querec wet taxipa' inain ca param pan caca oro wari', ma' ta tomi' querec te cacapa' ta inonon. Quep xiho' toton ina pain oro ca ara pan ta' ca'. Om ca win xumu tain ca param pan ne, miri'om inain cocon. Ma' ta witan pin caca oro wari' ta ina.