1 Coríntios 1 - Tradução Bíblica Pacaas Novos

¹ Paulo ina pain ca xirao' mi' xuhu' ca'. Tora' napa' Iri' Jam pain ca apóstolo ra capa' pane, pain ca tomi' hwet rain capija ca tomi' xim ta capa' pane. Xi om ne ca param mi' ara capa' pain pane. Wata', wirico coxari' Sóstenes, ca' urut pain ca xirao' mi' urut pahu' ca'.

² Xirao' mi' urut pahu' pain ca cut in xujuhu' pain Corinto ma', pain ca howa hun Iri' Jam ma'. To' hohot pin nuhu', xi om ne ca win cwere ara hun Cristo Jeju ta. To ni ca' jein ca caracat wa pain ca tora' qui' cuhu' pane quem. Ac i ma' wi nuhu' cocon oro wari' co howa nonon Taramaxicon nexi' Jeju Cristo quem, cocon oro wari' pain oro xijein macan' ma', co an hwet nanain wixicon pain ca tomi' cocon ma'. Taramaxicon ne urun Jeju, Taramaxicon ne nonon oro wari' co howa nonon quem.

³ Param urut con Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param urut cocon pain ca mi' cucuhu' pain ca om toron ne xumuhu' quem.

Ca tomi' querec te ton Iri' Jam pahu' ca Paulo

⁴ Tama' tomi' querec te inon Iri' Jam ne pahu'. Xi xiram pa' ara cuhu' pain ca mi' cuhu' pain ca win cwere hun Cristo Jeju ta.

⁵ Mi' nuhu' pain oro caramaxicon, xi win cwere ara hun Jeju ta. Mi' nuhu' pain ca pijim' taxi' wa capijacon, mi' nuhu' pain ca taraju pa' wa oro ca coromicat nucun quem.

⁶ Pe pin ara xi' nuhu' capijacon ca tomi' hwet urut pahu' con Cristo cwa'.

⁷ Je ca mi' cuhu' pain ca taramaja taxi' wa pain oro caramaxicon ma'. Om ca om camain' cuhu' pain. Ha' nuhu' pain ca taramaja taxi' wa pain oro caramaxicon ma', pain ca winim' cara hun Taramaxicon nexi' Jeju Cristo pain ca in qui' ta' nucun.

⁸ Wirico Iri' Jam co to' hwara' opa cara nuhu' pain ca howa nuhu' ma'. Wara to' hwara' opa nuhu' pane, mao ac ne ma' tara pahu'. To' hwara' opa to' hwara' opa maqui' pa' ac cuhu' tara Taramaxicon nexi' Jeju Cristo pain xec nein ca in qui' ta' nucun. Ma' ta om coromicat mi' xihwe pain ca pan teretem wa ta nuhu'.

⁹ To' hwara' opa turuhu' Iri' Jam, xi mixein capari' ta. Ara taxipa' nain oro ca wara tomi' pe nucun. Tomi' nuhu' quem: Jao jao ma' jun Panxita' Jeju Cristo co Taramaxicon ne hwe cwa' nuhu', taxipa' jun ta nuhu'.

Ca coromicat ni ca' xucucun oro co howa to nanain Corinto

¹⁰ Tomi' mip inuhu' pain i ca' quem xere. Wirico Taramaxicon nexi' Jeju Cristo co mi' napa' pain ca tomi' mip xuhu' ca'. Tomi' tomi' pi' pin inuhu': Ac je ac je ari tara ca tomi' nuhu' me. Jao jao ma' xujuhu', ta coromicat ni ca' xujuhu' me, ac je ac je ari tara ca coromicat nuhu'.

¹¹ Tomi' hwet ara xi' nanapa' wari' nequem Cloe pahu' xere. Tomi' mana' caracan xucucun ta nanapa' pahu'.

¹² Ca' na ca tomi' hwet cacapa' pahu': Coromicat ni ca' xucucun ta nunuhu'. Param urut con Paulo ta nana xucucun, param urut con Apolo ta nana xucucun, param urut con Pedro ta nana xucucun, param urut con Cristo ta nana xucucun ma' quem, ac i ma' na ca tomi' hwet cacapa' pahu' ta.

¹³ Wa inuhu' me. Ac ca nacaracam' mi' xujuhu' pain na curucun Cristo! Cain' cain' xihwe quem? Wata' co tatatain mi' wa pain pana pane ra? Wata' co mi' pin caho' nuhu' pane ra? Wuxu ca an hwet caca pain ca ja' cucuhu' pain com ra? Om na ta.

¹⁴ Tomi' querec te inon Iri' Jam pain ca om wata' pan ne co ja' nuhu' pain com ta. Ja' e' inonon pain com Crispo con Gaio ma' pahu', om ca wata' ne co ja' nonon pain com oro xucucun ma' pahu'.

¹⁵ Om xi tomi' ximama' mahu' pain ca howa urut con Paulo, je ca ja' urut com ca' mahu', xi ja' xuhu' pain com ta.

¹⁶ He, xin ne, ma' paxi' na Estéfanas cocon oro ca nari nucun pane, ja' inonon pain com pane quem. Ac ca om ma' ca na xucun wari' co ja' ta' pain com pane, om ca mam' pe wet toton quem.

¹⁷ Xi ja' roron pain com oro wari' capa' Cristo pane ta. Tomi' e' napa' pain ca pijim' hwet rain capija ca to' taxi' nonon oro wari' pain ca to' witan ton toton ta capa' pane. Tomi' ca' napa' quem: Tomi' hwet iri roron pain capija ne, om ca na ne pain ca an xiho' momon oro wari' co tomi' taxi' tamana e' nanain ca coromicat pan nucucun ta napa' quem. Ma' ta om to' om pin main ca hwara' opa nein capija pain ca tomi' hwet mapa' pain ca mi' pin pe tain pana pane napa'.

Ca an hwet pe mi' capari' pain ca hwara' opa nucun Iri' Jam Cristo

¹⁸ Om ara xi' na ca taraju pa' caca oro wari' co pan' ara'am xi' nana ma'. Tomi' hwet iri tata pain capijacon Iri' Jam pain ca mi' pin pe nain pana Cristo ta tococwa ne, pijim' ximama' hwe ta ac cocon na co pijim' nonon ma'. Wari' iri na ne, pain ca to' witan capari' Iri' Jam ca', taraju iri irin capijacon con Cristo ne, querec pin' ac xin na ca hwara' opa nein con. Iri' ca hwara' opa nucun Iri' Jam na ta.

¹⁹ Xi xirao' pe ara xine capijacon Iri' Jam ta. Ca' na con: To' om pin tain ca coromicat nucucun co taraju pa' tamana urut xi' ma nana ma'. To' om pin tain ca taraju pa' nucucun co xirao' taxi' tamana urut xi' ma nana ma' quem. Ac i ma' na ca xirao' pe xine pain capijacon Iri' Jam pane.

²⁰ Je ca tomi' xuhu' ca': Cain' cain' caca oro wari' co taraju pa' tamana urut xi' ma nana ma'? Cain' cain' caca oro wari' co xirao' taxi' tamana urut xi' ma nana ma' quem? Cain' cain' caca oro wari' co tomi' taxi' tamana urut xi' ma nana pain macan' ca' quem? Taraju pa' tamana urut pain ca coromicat xo' nuxut ta iri nana oro co om howa nana ma' ne, om ca an hwet pe pin cain ca tamanain nucucun pain ca om coromicat xo' nucucun Iri' Jam ra? An hwet pe pin cain ma' ira. Querec pin' tata pain ca om coromicat xo' nucucun ta.

²¹ Om ca querec pin' pan ac cocon Iri' Jam oro wari', om ca mam' querec pin' ac cocon pain ca coromicat pan nucucun. Wirico Iri' Jam co narain ho' nonon pain, maqui' nain ximicon pain ca coromicat xo' nucun. Ca' na con: Pijim' ximama' hwe ta paxi' tata co pijim' nanain capija ca'. Je i ma' ira, hohot napa' pain ca pijim' mi' tococwa pain capija oro wari' ta, ma' ta to' witan toton co howa nanapa' ta na.

²² Ac i ma' na ca coromicat nucucun. Oro judeu ma', param e' nonon Iri' Jam pain ca an hwet cain ca hwara' opa nucun. Ma' ta howa urut ta nana. Oro wari' co om judeu nana ma' iri nana ne, win xumu e' nanain oro ca coromicat pan nucucun.

²³ Warut iri na ne, pijim' hwet urut cocon oro wari' con Cristo co tatatain mi' wa pain pana pane. Pain ca pijim' mi' urut cocon oro judeu ma', noc nanain ca pijim' nuxut. Pain ca pijim' mi' urut cocon oro wari' co om judeu nana ma', pijim' ximama' hwe ta ac ca cacaparut na quem.

²⁴ Wari' pain ca howa xine ta capari' Iri' Jam ca' iri na ne, querec pin' irin ca hwara' opa nucun pain ca to' witan capari' con Cristo. Querec pin' irin ca coromicat xo' nucun pain ca mam' capari' con. Oro wari', warut pain ca judeu urut ca', wahu' pain ca om judeu hwe ma' quem, querec pin' querec pin' pi' pin urun.

²⁵ Ma' ara xi' nana wari' co tamanain na ta nonon Iri' Jam pain ca mam' capari' con Cristo. Ma' nana oro xucucun co om ca hwara' opa ca Iri' Jam ta nana, xi nain ho' con Cristo pain ca mi' pin wa ta cocon ma' quem. Ane hwara' opa pan ca ne. Taxi' tiquin' ca' nonon oro wari' co taraju pa' urut xi' ma nana ma'. Hwara' opa tiquin' ca' nonon co hwara' opa urut xi' ma nana ma' quem.

Ca tora' capari' Iri' Jam

²⁶ Mam' pe wet jein i ca' quem xere, pain ca xo' tora' qui' cuhu' Iri' Jam pane. Ma' paric ca' e' nana co querec pin' caca oro co om howa nana pain ca taraju pa' nucucun pahu'. Ma' paric ca' e' nana co taramaxicon hwara' opa nana pahu'. Ma' paric ca' e' nana co hwara' opa nana ca nari nucucun pahu' quem.

²⁷ Ane tora' pan cuhu' Iri' Jam ne. Oro wari' co om coromicat xo' nana ta caca co om howa nana cwa', je i ma' ira, tora' pan nonon Iri' Jam. Ma' ta wixipa' caca nonon co taraju pa' urut xi' ma nana ma'. Tora' pan tata co om hwara' opa nana. Ma' ta wixipa' caca tata co hwara' opa urut xi' ma nana ma'.

²⁸ Tora' pan tata co om hwara' opa nana ca nari nucucun. Tora' pan tata co noc wawa. Tora' pan tata co om hwara' opa camain' nana. Ma' ta to' om pin toton ta tata co hwara' opa urut xi' ma nana ta na.

²⁹ Ma' ta om tomi' xec xec cacapa' pain ca awi tiquin' ca' inonon oro win ma' ne cwa' caca ta nonon oro wari'.

³⁰ Ane mi' cuhu' pain ca win cwere pin hun Cristo Jeju Iri' Jam ne. Wirico Cristo Jeju co to' taxi' napari' pain ca coromicat xo' nucun Iri' Jam ma', pain ca to' hohot capari' ca', je pain ca wari' ne capari' ca', je pain ca to' witan capari' ca' quem.

³¹ Ma' ta tomi' hwet e' hwein ca tomi' querec te nuhu' pain ca to' witan pin cuhu' Taramaxicon Iri' Jam ta napari'. Win ne ca xirao' pe xine pain capijacon pane. Ca' na con pane: Mo ta tomi' hwet tain cain ca awi wa wari' ma', tomi' hwet e' tarain ca awi nucun Taramaxicon Iri' Jam ta. Ac i ma' na ca xirao' pe xine pain capijacon Iri' Jam.