1Pedro 5 - Tradução Bíblica Pacaas Novos

Ca hu tococwa co querec wet nonon co howa nonon Jeju, ca hu tococwa co xo' horon nana ma' quem

¹ Je ca tomi' xuhu' pain ca querec wet huhun oro co howa nonon Jeju ma'. Tomi' mip inuhu', xi om ne ca querec wet pan ara toton oro co howa nonon Jeju pain i ca' ta. Tomi' hwet inonon oro wari' pain ca jain jain nucun Cristo, jao jao ma' ton pain ca an hwet pe xine ca awi nucun pain ca hwara' opa nucun quem.

² Je i ca' ca tomi' mip xuhu' ca'. Querec wet xo' jujun oro co howa nonon Jeju ma', co querec wet jujun ta ca Iri' Jam ma'. Win ca pastor pain ca querec wet xo' cain ovelha nucun ma', ac i ma' je pain ca querec wet xo' huhun co howa nonon Jeju. Om ca na ne pain ca cuc cuc a xirapa' na inon me hun Iri' Jam pain ca querec wet jujun ta cuhu' ma'. Maqui' tarain iri' xumuhu' pain ca querec wet huhun. Je ca param mi' cuhu' Iri' Jam quem. Querec wet xuxun iri je ne, ta cut ta' dinheiro pain ca taramaja ne ca', pain ca querec wet toton ca' hwe me. Taramaja e' je pain ca param pan nuhu' ma', pain ca taramaja mi' e' ton Iri' Jam ta hwe ma'.

³ Om ca na ne pain ca tomi' xec xec ca' huhun co querec wet hwe ma': Wata' co taramaxicon cwa', tomi' ha' e' xine, om ca na camain' ne pain ca tomi' ac i ma' huhun. Xuruxut xo' e' je cocon, ma' ta win caca ne cucuhu' ma'.

⁴ In qui' iri tara Iri' Pastor nexi' ne, co Taramaxicon ne iri' cwa', mi' ac cuhu' tara pain ca awi tamana wa ca om pi' ra ha' ma'.

⁵ Tomi' mip inuhu' pain ca xo' horon hwe ma' quem. Tomi' ha' jujun oro co wara tiquin' mama' cawaxi' nucucun ma'. Tomi' tomi' pi' pin inuhu', an hwet mi' xujuhu' pain ca om xec xec nuhu' ta, xi xirao' pe ara xine pain capijacon Iri' Jam ta. Ca' na ca xirao' pe nein: Ari nonon oro co xec xec nana Iri' Jam ta. Oro co om xec xec nana ma' iri nana ne, xiram pa' tata, quep xiho' tata quem. Ac i ma' na ca xirao' pe xine pain capijacon Iri' Jam.

⁶ Je ca tomi' xuhu' ca'. Ta xec xec camain' hwe pain ca hwara' opa pan ta' ta hwe me. Tomi' ha' e' jun Iri' Jam co hwara' opa pan, pain ca Taramaxicon ne hun ma'. Ma' ta aram aram to' hwara' opa pin cuhu' pain xec nein ca wara coromicat an pe xo' ca pane. Hohot mahu' ta ac cuhu' tara quem.

⁷ Tomi' hwet tomi' hwet pi' pin jun pain Iri' Jam oro ca to' toron nain xumuhu' ma'. Howa jun pain ca quep xiho' xim cuhu' pain, xi om ne ca wirico ara ca co querec wet xo' nuhu' ta.

⁸ Ma' tara xumuhu' con Caxicon Jam ma', co noc nuhu' ma'. Pirao' nuhu', an xiho' non copacao' co xararac ma', co tama' xut in xut in pain ca pirao' cain carawa ca cao' wa ma'. Ac i ma' nuhu' Caxicon Jam quem. Quep xim nuhu'.

⁹ Ari jun Caxicon Jam. Hwara' opa je, howa cara jun Iri' Jam. Xi taxi' ara huhun oro xerexi' co to nanain oro xijein macan' ma', pain ca jain jain caca pain ca to' i'ina tococwa. Win cuhu' ma'.

¹⁰ Ame hwe e', om ta jain jain cara hwe, main pi' pin tara ca jain jain nuhu'. To' hohot pin ac cuhu' tara Iri' Jam. To' hwara' opa turuhu', mi' turuhu' pain ca om naro camain' wa, to' hwara' opa cara ac cuhu' tara. Xi wirico ara ca co xiram pa' taxipa' nuhu'. Wirico co wara param mi' nuhu' pain ca jao jao ma' hun pain ca awi nucun pain ca hwara' opa nucun ca om pi' ra ha' ma', xi om ne ca win cwere ara hun Cristo Jeju ta.

¹¹ Na e' na pain ca tomi' querec te xun pain ca hwara' opa cara nucun ta. Amém, iri'o' na ca tomi' ne ta.

Ca pi' pin ne ca xirao' nucun Pedro

¹² Wirico coxari' Silvano co quep xiho' napa' pain ca xirao' mi' wijimain e' xuhu' ca'. Taxi' inon pain ca win xumu cain ca taramaja nucun pain ca taramaja mi' con Iri' Jam. Je ca tomi' xuhu' pain ca xirao' mi' xuhu' ca', to' hwara' opa xuhu' pain xumuhu' ta inuhu'. Tomi' hwet inuhu' pain ca quep xiho' iri'o' cuhu' Iri' Jam ma', pain ca xiram pa' e' cuhu' ma'. Hwara' opa cara je pain ca howa hun pain quem.

¹³ Mam' pe wet urut pahu' ta nunuhu' oro co howa to nanain Babilônia ca'. Tora' pan nonon Iri' Jam quem. Win cuhu' pane. Mam' pe wet inuhu' ta nuhu' Marcos cwa', co ac panxita' cwa' quem.

¹⁴ An hwet pe mi' xujuhu' pain ca tomi' querec te xujuhu' ma'. Je ca tomi' xuhu' pain ca win cwere hun Cristo ma'. Param inon Iri' Jam pain ca mi' mi' pi' pin cuhu' pain ca om toron ne xumuhu' ta. Je i ca' ca xirao' ne ca'.