1Pedro 4 - Tradução Bíblica Pacaas Novos

Xocori ca e' wa

¹ Je ca tomi' xuhu' ca'. Jain jain na Cristo pain ca wari' nucun pane, pain ca ma' ne curucun pane. Je ta wara awori xo' qui' hwe pain ca an xiho' hun pain ca coromicat nucun quem, pain ca om nain ho' pan xucun pain ca jain jain wa pane. Xi ac i ma' ara ca wari' co quereme nain ca jain jain wa pain ca caxi ne curucun ma'. Noc nain ca caracat wa ta.

² Wari' co ac i ma' ma', tomi' ha' cara ac con tara Iri' Jam. Mao ac ne ma' tara pain ca e' e' wet nucun, om ta ara cain ca param pan tem ne ca wari' wa, ara e' tarain ca param pan nucun Iri' Jam.

³ Pain cara pane, ara taxipa' hwein oro ca param ximama' nucucun co om howa nonon Iri' Jam. Quep ximama' taxipa' hwe. Tamanain to taxipa' hwe pain ca win xumu hwein oro ca om awi wa. Tama' toc tamanain to hwein caji tocwa ca mana'. Tamanain to hwe pain ca waraju ximama' nuhu', tamanain to hwe pain ca pe torotop mi' querec te ximama' hwein oro caji pacun ca Iri' Jam xi' ma hwe pane, ca noc tamana pan ca Iri' Jam.

⁴ Cain' cain' xira cocon ne nunuhu' oro co ara ara wet nanain i ma', tomi' xirac tomi' xirac ac cucuhu' na quem. Xi jao jao ma' mami' huhun pain oro ca quep ximama' nucucun pain ca ara pan teretem nucucun ta.

⁵ Je i ma' ira, ame hwe e'. Main maqui' tara xec nein ca coco' quima hwet xun cocon Iri' Jam co wara awori xo' ma', pain ca tomi' xo' xun tococwa pain oro carawa ca ara caca ma'. Co e' e' wet nana ma', co wara cono' nana ma' quem, wap wap ac tococwa tara ta.

⁶ Co wara cono' nana pane, wap paxi' tata pain ca to to wet cacain macan'. Win ne ca mi' pin taxipa' ne ca wari' wa ca'. Ane pijim' mi' tococwa con Jeju ne, ma' ta e' cara ne tamatarahu' ta tata. Win ne ca e' cara ca Iri' Jam ta tata.

⁷ Wixicam pin na xec nein ca pi' pin ta' ne macan' je oro carawa jimao quem. Je ta coromicat xo' qui' hwe ta. Ma' tara xumuhu' quem. Ma' ta ha' cuhu' pain ca tomi' hun Iri' Jam ta.

⁸ Ta noc camain' xujuhu' me, je ca param mip ca Iri' Jam. Ta tomi' querec te e' ne capijahu' me, tomi' querec te iri'o' xujuhu' ta. Tomi' querec te iri'o' iri xijexi' ne, ha' ac capari' tara pain ca mana' mana' om pin xijexi' pain oro ca ara cup xijexi' ta.

⁹ Tomi' querec te jujun oro win ma' nuhu' co hwet nunuhu' pain xuruhu'. Ta tomi' wijimi hwe cocon me.

¹⁰ Wara mi' mi' xam' nuhu' pain oro xijein ca taramaja taxi' wa Iri' Jam. Je ta ara xo' qui' hwein ta. Mam' quep xiho' caracan ac xujuhu' tara pain oro ca taramaja taxi' wa ca mi' cuhu' ma'.

¹¹ Mo ta mi' cuhu' pain ca pijim' wa ma', pijim' xo' ac hwe tara. Xi capijacon Iri' Jam pan ara ne ca pijim' hwe ta. Mo ta mi' cuhu' pain ca quep xiho' hun win ma' nuhu' ma', mam' quep xiho' ac hun tara pain ca hwara' opa nucun Iri' Jam ca mi' taxipa' ca ma'. Ma' ta awi na Iri' Jam ta caca oro wari'. Wirico Jeju Cristo tara co mi' nonon pain ca tomi' ac i ma' caca ma'. Hohot na pain ca tomi' querec te xun pain ca awi tamana cara nucun. Na e' na pain ca tomi' querec te xun pain ca hwara' opa tamana cara nucun ma' quem. Amém, iri'o' na ca tomi' ne ta.

Ca quereme jein ca quep em' xihwe pain ca howa hun Jeju ta tococwa

¹² Je ca tomi' xuhu' pain ca tomi' querec te xuhu' ca'. Mija paxi' na ca quep em' xihwe ma', ma' ta querec pin' xihwe pain ca howa hwara' opa nuhu' ma'. Je i ma' ira, ta wa ina me hwe me, ta tomi' ximama' hwe pain ca para quep em' cacapa' ne hwe me, je xi nain ho' capa' pain ca jain jain tamana wa Iri' Jam ca' hwe quem me.

¹³ Jain jain iri hwe pain ca quep em' xihwe pain ca howa hun Cristo ne, jain jain wi ac hun na. Je ta tomi' querec te qui' hwe pain, ma' ta tomi' querec te tamana hwe pain ca aram aram an hwet mi' xim capari' pain ca hwara' opa nucun pain ca awi tamana nucun quem.

¹⁴ Tomi' xirac iri nunuhu' oro wari' pain ca howa hun Cristo ne, param mi' ac cuhu' na pain ca awi wa Iri' Jam. Xi querec pin' ara xihwe pain ca corom pe ho' cara cuhu' Tamataracon Iri' Jam ca awi tamana ta.

¹⁵ Hohot paxi' na pain ca jain jain hwe pain ca ara hwein ca awi wa ma', ane om hohot camain' ne pain ca jain jain hwe pain ca to' pa' pin hun wari' ma' ne, je pain ca an noc xa hwe ma', je pain ca pan teretem taxipa' hwe ma', je pain ca to' i'ina hun win ma' nuhu' pain ca taramaja nucun ma' quem.

¹⁶ Pain ca jain jain hwe pain ca howa hun Cristo ma' iri na ne, om ta na ne pain ca wixipa' hwe pain. Tomi' querec te e' jun Iri' Jam pain ca querec pin' xihwe pain ca howa hun Cristo ta.

¹⁷ Xi maqui' pin ara ne xec nein ca to' i'ina capari' oro carawa ta. Mi' cain' napari' pain Iri' Jam, ma' ta hwara' opa mip hwe pain ca howa nuhu' ta napari'. Pain ca to' i'ina capari' oro carawa ca', jain jain paxi' iri'. Oro co om tomi' ha' nanain capijacon ca pijim' mi' tococwa con Jeju ma' iri nana ne, ximin pan tatara, mija tara ca jain jain nucucun pain ca wap tamana xun tococwa ta.

¹⁸ Je ca xirao' pe xine pain capijacon Iri' Jam ma': Oro wari' co xuruxut xo' nana ma', co to' witan xun wawa ma', ma' paxi' na ca to' i'ina nonon. Oro caracat co miri'om nonon Iri' Jam ma' iri nana ne, ximin tatara, to' i'ina tamana totoron oro carawa jimao. Ac i ma' na ca xirao' pe xine pain capijacon Iri' Jam.

¹⁹ Je ca tomi' xuhu' ca'. Param mi' iri napari' pain ca jain jain wa Iri' Jam ne, howa cara pan ac xun tara. Wum co quep naparut pane, wum co om mixein camain' pain ca querec wet xo' maparut ta xun. Ara ara cara ac xin tara oro ca awi wa ta.