1Pedro 3 - Tradução Bíblica Pacaas Novos

Ca hu tacacama oro narima' cocon waram taxicacam

^1-2 Wahu' quem oro narima', pain ca ma' cuhu' tarama' ma' quem. Tomi' ha' tomi' ha' xam' jujun taxuhu'. Am ma' caca waram taxuhu' co om howa nanain capijacon Iri' Jam ma'. Je i ma' ira, tomi' ha' cara jujun. Om paxi' tara ca cuc cuc huhun pain ca howa je howa je huhun ma'. Querec pin' iri tuturuhu' pain ca xuruxut xo' nuhu' ne, aram aram howa pin ac caca tara pain ca querec e' cucuhu' pain ca xuruxut xo' nuhu', je pain ca in ac iri'o' hun Iri' Jam ma' quem.

³ Ca awi nuhu' ma', om ca na ne pain ca maqui' e' nein oro carawa ca mam' ara awi pan xujuhu' ma', je pain ca pan xic xin to hwein tununuhu' ma', je pain ca an warawa xin to xujuhu' pain ouro ma', je pain ca to xec xec hun wom co awi tamana ma' quem.

⁴ Ca awi nuhu' ma', maqui' pan tarain xumuhu' ma', pain ca om xec xec nuhu' je pain ca tacana pe ne iri' xumuhu' ma'. Om ca pi' ra ha' ne ca awi nequem narima' co awi ac i ma' ma'. Querec awi tamana non Iri' Jam quem.

⁵ Xi ac i ma' ara cacama oro narima' co howa nonon Iri' Jam pain cara pane, pain ca winim' e' cocon Iri' Jam pain ca ara pin tain cain ca wara tomi' pe nucun pane. Ara awi xequequem pain ca tomi' ha' taxipa' cocon waram taxicacam ta.

⁶ Noro jem Sara cara pane. Tomi' ha' taxipa' non taxicam Abraão. Taramaxicon ne non quem. Mo ta ara xo' taxipa' hwe ma', mo ta om toron ne xumuhu' pain oro ca to' jin' nuhu' ma' quem, ac waram jinacam ac hwe tara ta.

⁷ Wahu' quem, pain ca ma' cuhu' narima' ma' quem. Ma' tara xumuhu' pain ca to ho' xujuhu' ma'. Tomi' querec te jejem pain ca querec wet xo' hwehwem ma'. Querec pin' jejem pain ca om hwara' opa homa cacama ma', je pain ca om an xiho' cucuhu' pain ca hwara' opa nuhu' ma'. Xi mi' ara cacam pain ca om pi' ra ha' ne ca e' wa Iri' Jam ta. Win cuhu' ma'. Ac i ma' jejem manahu', ma' ta om i'ina hwe pain ca tomi' xun hun Iri' Jam ma' quem.

Ca jain jain paxi' iri', xi om ne ca ara xo' ara xin ca awi wa

⁸ Tomi' xim inuhu' pain i ca' quem: Je je ari tara ca coromicat nuhu' pain ca tomi' querec te xujuhu' ta. Quep xiho' xujuhu'. Ta noc camain' xujuhu' me, win ne ca xere xujuhu' ma'. Xiram pa' xujuhu', ta xec xec hwe pain ca quep xiho' xujuhu' me.

⁹ Mo ta quep em' cuhu' wari' ma', mo ta tomi' xirac cuhu', ta win mapa' ne hun me. Tomi' mi' pan jun con Iri' Jam. Xiram pa' ron, quep xiho' ron ta Te Iri' Jam jun. Xi wara param mi' xuhu' pain ca awi wa ta ara cuhu' pain ca xo' howa xine ta qui' cuhu' pane ta.

¹⁰ Je ca xirao' pe xine pain capijacon Iri' Jam quem: Wari' co param nain ca tomi' querec te wa ma', co hohot tarapa' oro carawa ca hwet pa' xim napa' ma', om ta tomi' ximao cain carawa ca om awi, om ta tomi' mixein ca quem.

¹¹ In ca' tarain oro ca om awi wa. Ara e' tarain ca awi wa. Tomi' querec te caracan xijexi' ta totoron oro win ma' ca, om ta mana' caracan camain' xijexi' ta totoron.

¹² Xi om ne ca querec wet ara cocon oro co ara xo' nana Taramaxicon nexi' ta. Querec hohot mahu' ta nonon, taraju wet nonon pain ca tomi' xim urut pum ta cocon quem. Oro co ara pan teretem nana ma' iri nana ne, ari tata. Ari pan nonon Taramaxicon nexi'. Ac i ma' na ca xirao' pe xine pain capijacon Iri' Jam quem.

¹³ Ma' tara wari' co quep em' nuhu' pain ca tama' ara xixi' na hwein ca awi wa ra? Om na ta!

¹⁴ Tara cocon, am ma' paxi' caca co to' jain jain toton nunuhu' pain ca ara hwein ca awi wa ma'. Je i ma' ira, param mi' turuhu' pain ca awi wa Iri' Jam ta. Ta jin' huhun me, ta toron ne xumuhu' cocon me.

¹⁵ Win xumu jun Cristo, in ac e' jun pain iri' xumuhu'. Taramaxicon ne jun. Mo ta tomi' querec cucuhu' oro wari' ma', mo ta para howa hun Iri' Jam ma' cucuhu'. Wara awori xo' taxipa' ac hwe tara pain ca tomi' in hwet xo' huhun pain ca tomi' querec nucucun ma'.

¹⁶ Tomi' in hwet xo' iri jujun ne, tomi' wixite e' ac huhun tara, ta tomi' ximama' huhun me ta. Tomi' hwet e' jujun pain carawa ca taxi' hwe pain ca hohot con Iri' Jam. Ma' ta wixipa' pin caca co tomi' napat nunuhu' pain ca xuruxut xo' nuhu' pain ca howa hun Cristo ta.

¹⁷ Mo ta param mi' capari' pain ca jain jain wa Iri' Jam ma', mo ta jain jain je pain carawa ca awi ca ara xi' hwe ta capari', je i ma' ira, hohot na. Xi hohot ne pain ca jain jain wa pain ca pan tem wa ta.

¹⁸ Xi jain jain ara ca Cristo pain ca mi' pin caho' capari' pain ca caracat nexi' pane ta. Pain ca mi' pin nucun pane, mi' pin na. Om ta mi' pin mami' ca. Om ca caracat camain' ca, xut xo' na, awi na. Ane mi' pin caho' pan capari' pain ca pan teretem nexi' pain ca om xuruxut xo' nexi' ne. Ma' ta o mi' xuhu' con Iri' Jam ta napari'. To' pa' pin iri ta pane ne, mi' pin ac ne na curucun. To' e' mami' iri ta ne, je Tamataracon Iri' Jam ac ne na ca to' e' mami' non quem.

¹⁹ Je Tamataracon Iri' Jam ca ja' ja' non Jeju pain ca hwet tococwa jamicocon oro wari' co wara cono' nana pain cara pane, co tao' to wawa pane. Pijim' ac tococwa na

²⁰ co om tomi' ha' nonon Iri' Jam pain cara pane, pain oro xec nucun Noé pane. Om ca toron ne ximicon Iri' Jam pain ca winim' cara cocon. Winim' cara e' tata pain ca quep qui' cain cote ne mam' horoho wa Noé pane. Ane om ha' caca ne. Ma' paric ca' e' nana co corom mama' nanain mam' horoho wa, ma' 8 e' nana, witan pin ac caca na pain ca horoho mama' cacama pain com pane.

²¹ Com ca to' witan nanam pane, tomi' joc mam' mi' nain com ca ja' iri' pain ca howa nexi' pain xocori ca' quem. Ja' iri irin com ne, om ca hohoc xin homirixi', om na. An hwet e' irin ca wara tomi' xun Iri' Jam pain ca hohoc pin rain ca caracat ne pain xumu me xun ca'. To' witan pin napari', xi om ne ca to' e' mami' ara con Jeju Cristo ta.

²² Wirico Jeju Cristo co mao nain pawin, pe ho' pin ac cain na iri' curucun Iri' Jam ma' quem. Taramaxicon pe ho' pin ac tococwa na oro jam co taramaja mi' nonon Iri' Jam, cocon oro co taramaxicon nana ma', cocon oro xucucun jam co hwara' opa nana ma' quem.