1Pedro 2 - Tradução Bíblica Pacaas Novos

¹ Je ca tomi' xuhu' ca'. An to an to pi' pin jein oro ca pan teretem wa je oro ca mixein wa ma'. An to pin jein ca ac ca iri'o' xi' ca' tara me hwe ma'. An to pin jein ca noc mi' caracan xujuhu' pain oro ca ara nuhu' ma'. An to pin jein ca tomi' napat xujuhu' ma' quem.

² An xiho' jejem oro hwijima' co xo' camara' nana ma', pain ca tama' param cacamain comi catat. Param tamana jein capijacon Iri' Jam ma', ca ac iri' comi catat ca om em' camain' ma', ca mi' capari' Tamataracon Iri' Jam ma' quem. Ma' ta horon horon tiquin' hwe ta nuhu'. Aram aram maqui' pa' ac cuhu' tara xec nein ca to' witan pin xim cuhu' ma'.

³ Querec pin' ara xi' hun Taramaxicon nexi' pain ca awi nucun ta.

Pacun ca e' ma', cocon oro wari' nucun Iri' Jam quem

⁴ Wixicam pin hun Taramaxicon nexi' Jeju co an xiho' nain pacun ca e' ma', ca to' teren nain xirim. Noc urut pum ta paxi' nonon oro wari' pane, ane tora' pan con Iri' Jam ne. Hohot tamana ara xi' mapa' ta non pane.

⁵ An xiho' hwein pacun ca e' ma' quem. Ac ca mam' quep xihwe na pain xirim ca pe pan ne Tamataracon Iri' Jam. Ac ca taramaja to hwein na pain ca taramaja mi' hun ma' quem. Win caca oro sacerdote ma'. To' sacerdote nuhu' Iri' Jam. Tora' inuhu' pain ca taramaja mi' mahu' ta nuhu', in ac taxipa' xine, an hwet mi' xine pain ca tomi' querec te nuhu' ta nuhu'. Je ca hohot capa' ta nuhu'. Wirico Jeju Cristo co mi' nuhu' pain ca taramaja mi' ac i ma' hun ta.

⁶ Je ca xirao' pe xine pain capijacon Iri' Jam ma' quem. Taraju wet xine. Tora' inon wari' co hohot tamana napa' cwa'. An pe inon pain Sião. Ac iri' pacun ca to' teren nain xirim. Wari' co howa non ma', om ta xat camain' ne ximicon. Ac i ma' na ca xirao' pe nein ma'.

⁷ Je ca tomi' xuhu' ca'. Hohot tamana nuhu' Cristo co an xiho' nain pacun ca to' teren nain xirim ma', xi om ne ca howa ara hun ta. Oro co om howa nonon ma' iri nana ne, an xiho' nonon oro co noc nonon ma'. Win ne ca xirao' pe xine pain capijacon Iri' Jam ma' quem: Pacun ca noc caca caram ma' co quep xin nanain xirim ma', aram aram iri' pacun ca to' teren nain xirim pin na ta. Ac i ma' na ca xirao' pe nein ma'.

⁸ Ma' na xijein capijacon Iri' Jam ca xirao' pe xine quem: Co ma' co an xiho' nain pacun ca noc caca ma', an xiho' nain pacun ca xut tao' pan' non wari' ma' quem. Ac i ma' na ca xirao' pe nein ma'. Je ca tomi' xuhu' ca': Xuruxut tao' pan' camara' tata co om howa nana ma', xi tomi' ha' cacain capijacon Iri' Jam ca pijim' hwet tococwa ma'. Wara coromicat an pe xo' mi' ara xi' nonon pain ca camara' wa Iri' Jam ta.

⁹ Wahu' iri na ne, tora' nuhu' Iri' Jam pain ca wari' ne cuhu' ma'. Ac sacerdote nucun pin hwe pain ca taramaja mi' hun pain ca Iri' Taramaxicon ca ma'. Xica' pe na Iri' Jam co wari' ne nuhu'. Ma' ta tomi' hwet huhun oro wari' pain ca hwara' opa tamana ne ca', pain ca ara mi' toton pain oro ca awi wa ca' nuhu'. Wirico co hwerehwet ca' jein ca jitacat nein xim ta nuhu' pane, wirico co wixicam pin xine pain naran ne ca awi tamana ca' nuhu' pane quem.

¹⁰ Om paxi' na ca wari' ne cuhu' Iri' Jam pain cara pane, ane wari' ne pin cuhu' pain xocori ca' ne. Om paxi' na ca xiram pa' cuhu' pane, ane xiram pa' pin cuhu' pain xocori ca' ne.

Ca xuruxut nexi' pain ca howa xun Jeju Cristo

¹¹ Je ca tomi' xuhu' pain ca tomi' querec te xuhu' ca'. Ac ca tatirim hwe na pain macan' ca', pain ca om to xo' hwe ma'. Je ca hu ca' xuhu' ca': Ein jein oro ca param ne ca cwere wa ca to' i'ina nuhu' ma', ca ac ca mixita cuhu' ne pain ca to' quiji' pin xim cuhu' ma'.

¹² Xuruxut xo' je pain ca to ho' huhun oro wari' co om howa nana ma'. Tomi' em' paxi' tuturuhu', pan teretem nana ta paxi' tuturuhu'. Je i ma' ira, xuruxut xo' je, ma' ta querec pin' cucuhu' pain ca ara hwein oro ca awi wa ta. Aram aram awi na Iri' Jam ta ac caca tara pain xec nein ca in qui' ta' nucun quem.

¹³ Tomi' ha' tomi' ha' pi' pin jujun oro co taramaxicon to ho' nunuhu' pain macan' ca'. Je ca param mi' cuhu' Taramaxicon nexi'. Tomi' ha' jun rei co iri' taramaxicon ma' quem, xi wirico ara ca co hwara' opa tamana tiquin' ca' nonon oro xucucun taramaxicon pain macan' ca'.

¹⁴ Tomi' ha' jujun oro xucucun taramaxicon ma' quem. Wiricoco ara xi' nana co tomi' xo' pan ca rei ma', pain ca taramaja je tococwa ma'. Wap jujun co pan teretem nana ma', awi hwe ta jujun co ara nanain ca awi wa ma', ac i ma' na ca tomi' xo' tococwa pain ca taramaja nucucun.

¹⁵ Xi param mi' ara cuhu' pain ca ara e' hwein ca awi wa Iri' Jam ta. Ma' ta to' hehe pin huhun oro co tomi' napat ximama' nana pain ca om coromicat xo' nucucun.

¹⁶ To' witan paxi' nuhu' Iri' Jam ma', om paxi' na wari' co tama' cuc cuc nuhu' pain ca tomi' ha' e' xine ta cuhu' ma' quem. Ane hohot ne pain ca coromicat xo' hwe ne. Ta coromicat ximama' ca' hwe me: Je i ma' ira, to' witan ara xi' napa' Iri' Jam ta, je ta pan tem ta' ta, ta coromicat ac i ma' camain' hwe me ta. Xuruxut xo' je pain ca ara e' hwein ca param nucun Iri' Jam ma', pain ca taramaja mi' hun ma'.

¹⁷ Tomi' xo' tomi' xo' pi' pin jujun oro wari'. Tomi' querec te xujuhu' pain ca xere xujuhu' ma'. In ac jun Iri' Jam, tomi' ha' jun pain ca ara e' hwein ca param nucun. Querec pin' jun rei co iri' taramaxicon ma', co hwara' opa tamana ma'.

Ca win ta' ne capari' Cristo pain ca quereme cain oro ca quep em' wa pane

¹⁸ Tomi' ca' inuhu' pain ca taramaja mi' e' huhun oro taramaxicon nuhu' ma': Tomi' ha' jujun. Tomi' xo' jujun, ta tomi' ximama' camain' huhun me. Om ta tomi' ha' e' huhun co awi nana ma', co tomi' toto nunuhu' ma'. Tomi' ha' jujun co tomi' mana' nunuhu' ma' quem.

¹⁹ Mo ta quep em' ximama' xihwe, om paxi' tara ca pan teretem hwe, mo ta quep em' ximama' e' xihwe. Mo ta coromicat ca' hwe: Je i ma' ira, taxi' urun Iri' Jam pain ca quep xiho' capari' pain ca wap ximama' cacapari' ca', mo ta coromicat ac i ma' hwe, tomi' querec te ac cuhu' tara Iri' Jam.

²⁰ Ane tomi' xuhu' pain i ca' ne: Mo ta pan teretem hwe, mo ta quep em' xihwe pain ca pan teretem pan nuhu' ma', tomi' querec te nuhu' Iri' Jam pain ca quereme hwein ra? Quep xiho' xuruhu' pain ra? Om na ta! Tomi' querec te e' nuhu' pain ca quereme hwein ca jain jain wa pain ca wap ximama' cucuhu' pain ca ara hwein ca awi wa ta.

²¹ Je ara xi' na ca wara param mi' cuhu' pain ca xo' howa xine ta qui' cuhu' pain cara pane. Mo ta quep em' ximama' xihwe, je i ma' ira je, quereme ac hwein tara ta nuhu'. Xi om ne ca quereme ara ca Cristo pain ca quep em' ximao pan tocwa pain ca mi' pin caho' cuhu' pane ta. Win ta' pane, an xiho' xine pain ca quereme ta' pane nuhu' quem.

²² Om ca caracat camain' ca pane. Om ca mixein camain' ca quem.

²³ Tomi' xirac iri nonon ne, om ca win capija pan cocon quem. Jain jain iri na pain ca quep em' cocon ne, om ca win mahu' ne cocon. Je i ma' ira, wum co taxi' napa' ta non Cote ca co wap xo' taxipa' nonon oro caracat.

²⁴ Wirico co quereme ma', pain ca tatatain pe tocwa pain pana pane. Cut pi' pin nain ca caracat nexi' pain curucun. Ma' ta caracat caracat om pin hwe ta napari'. Ma' ta xuruxut xo' hwe pain ca ara e' hwein ca awi wa ta napari' quem. To' xio pin nuhu', xi om ne ca wap wein pin ara xine curucun pane ta.

²⁵ An xiho' paxi' hwein ovelha ca xuruxut ximama' pane, ane cwirin' pin hwe ne. Coco' tucu in hwet hun co ma' co querec wet nuhu' ma', co narain ho' taxi' nuhu' pain oro ca om awi wa ma'.