1Pedro 1 - Tradução Bíblica Pacaas Novos

¹ Pedro ina pain ca xirao' mi' xuhu' ca'. Apóstolo ra napa' Jeju Cristo pane, pain ca tomi' hwet roron pain capija oro wari' capa' pane. Xirao' mi' inuhu' pain ca wara tora' cuhu' Iri' Jam pane. Ac ca tatirim to hwein na oro macarahu' ma', pain Ponto, pain Galácia, pain Capadócia, pain Ásia, je pain Bitínia ma' quem.

² Wara querec pin' nuhu' Cotere' Iri' Jam pain cara pane. Tora' nuhu', to' hohot pin nuhu' Tamataracon quem. Ma' ta tomi' ha' hun Jeju Cristo ta nuhu'. Ma' ta hohoc pin cuhu' pain quicon ta nuhu'. Param inon Cotere' Iri' Jam pain ca quep xiho' tamana cuhu' pain ca mi' cuhu' pain ca param nucun. Param inon pain ca mi' hwara' cuhu' pain ca om toron ne xumuhu' quem.

Ca tomi' querec te xun Iri' Jam pain xocori ca e' wa ca mi' capari' ca'

³ Tomi' hwet xin ca awi tamana nucun Iri' Jam co Te ca Taramaxicon nexi' Jeju Cristo ta. Xiram pa' tamana napari'. Mam' mi' napari' pain xocori ca e' wa pain ca to' e' mami' con Jeju Cristo ta. Je ca om tara con ta'a camain' xun pain ca howa xun ca', pain ca winim' xun pain oro ca mi' xim capari' ma'.

⁴ Om ta pi' ra ha' ne oro ca mi' xim capari' ma', om ta em' ac ne, awi cara tara quem. Wara an to xo' mi' nuhu' pain, querec wet xo' nain pain pawin cain.

⁵ Querec wet xo' nuhu' quem, xi om ne ca howa ara hun ta. Mam' querec wet xo' nuhu' pain ca hwara' opa nucun. Querec wet xo' querec wet xo', aram aram maqui' pa' ac cuhu' tara xec nein ca to' witan pin toton cuhu' ma'. Wara awori xo' na, winim' e' nain xec nein ca an hwet mi' toton cuhu' pain ca param nucun ma', pain ca to' witan pin toton cuhu' ma'.

⁶ Je ca tomi' querec te tamana hwe ma'. Tomi' xaxa' paxi' hwe pain xocori ca', xi ma' ara ne oro ca to' i'ina nuhu' ta. Ane om to' i'ina cara xim cuhu' ne, ame hwe e'.

⁷ Noro jein ouro ca om awi cara ma', ca an tom pe xine ma'. Awi paxi' na, ane awi tamana pan capa' ca howa nuhu' ne nuhu' Iri' Jam. Je ca to' i'ina cuhu' oro carawa pain xocori ca' nuhu', ma' ta querec pin' xihwe pain ca howa iri'o' hun Jeju ta nuhu'. Ma' ta awi hwe, tomi' querec te tamana inuhu', hohot tamana mahu' ta xuhu' ca' turuhu' pain xec nein ca aram aram in qui' ta' nucun Jeju Cristo ta.

⁸ Om paxi' na ca querec hun Jeju pane, ane om noc hun ne. Om paxi' na ca querec hun pain xocori ca' quem, ane howa hun ne. Tomi' querec te tamana hwe con. Mija na, om ca tomi' ac xine ca tomi' querec te tamana nuhu' con ta.

⁹ Xi to' witan pin xi' ara xihwe ta. Je ca howa hwe ma'.

¹⁰ Oro profeta co tomi' hwet nanain oro ca tomi' hwet je tococwa pane, pain ca main to' witan e' turuhu' Iri' Jam ta cocon oro wari' pane, i'ina na ximicocon pain ca cain' cain' xira ne caca, je pain ca cain' xi to' witan ac tococwa ne caca pahu', noro noro ac cacain na capijacon Iri' Jam.

¹¹ Taraju pa' xixi' na nanain ca tomi' nein Tamataracon Cristo ca pe ho' nonon pane, pain ca tomi' ca' tococwa pane: Jain jain tamana iri tara Cristo ne, awi tamana ac ne tara oro ca aram aram ara ton non ta, ac i ma' na ca tomi' tococwa pane. Ma' xec ca tomi' mi' ne quem, cain' cain' xira quem ac caca na pain ca noro cacain capijacon Iri' Jam pane.

¹² Tomi' xo' ca' tata oro profeta pane: Tomi' hwet iri hwein oro carawa jimao ca maqui' ta' ma' ne, om ca quep xiho' pan xujuhu', om na. Quep xiho' pan huhun oro xucucun wari' co maqui' xi' nana pa'ao' ta na ca tomi' xo' tococwa pane. Je ca tomi' xuhu' ca'. Wahu' pan co quep xiho' xi' wawa pain ca tomi' hwet nucucun pane. Je ca pijim' hwet xihwe pain xocori ca' quem. Oro co pijim' hwet nunuhu' pain capijacon Iri' Jam con Jeju ma', mam' pijim' hwet nunuhu' pain ca hwara' opa nein Tamataracon Iri' Jam ca mam' capari' pain pawin pane. Capijacon Iri' Jam ca pijim' xihwe ma', jain jain pan nanain oro jam co taramaja mi' nonon ma'. Taraju pa' xixi' na nanain.

Ca xuruxut xo' je pain ca wari' nucun Iri' Jam ta tococwa

¹³ Je ca tomi' xuhu' ca'. Coromicat xo' je. Wara awori xo' je pain ca ara xin hwein ca param nucun Iri' Jam. Ma' tara xumuhu'. Howa mip jun Iri' Jam pain ca xiram pa' xim cuhu' ma', pain ca to' witan e' xim cuhu' pain ca in qui' ta' nucun Jeju Cristo ta.

¹⁴ Tomi' ha' jun Iri' Jam, win ne ca mana panxita' cuhu' ma'. Ta tomi' ha' mami' hwein oro ca param pan teretem nuhu' ca ara taxipa' hwe pane, pain ca om querec pin' querec hun Iri' Jam pane.

¹⁵ To ni ca' jein ca caracat wa pain oro ca ara hwe ta. Win ne ca pe ni ca' cain ca caracat wa Iri' Jam co howa xine nuhu' ma'.

¹⁶ Xi xirao' pe ara xine pain capijacon Iri' Jam ta, ca' na con: To ni ca' jein ca caracat wa ta. Win ta' ca', pain ca pe ni ca' tain ca caracat wa ca' na ca xirao' pe nein.

¹⁷ Tomi' xo' tomi' xo' xam' tarapari' pain oro carawa ca ara iri' Iri' Jam. Om ta tomi' querec te paxica' capari', an an ari tara ca tomi' nucun pain ca tomi' mi' xim capari' pain. Co om ara xo' nain ca ara nucun ma', wap ac tocwa tara. Co querec hohot ca pain ca ara nucun ma' iri na ne, om ta wap tocwa. Je ta in ac qui' hun quem. Tomi' ha' jun pain ca to to wet hwein macan' ca'. Xi Te ara hun ta.

¹⁸ Xi taxi' ara hwein carawa ca mam' to' witan cuhu' Iri' Jam pane ta. Taraju pa' je: To' witan ca' iri nuhu' pain oro ca xuruxut pan teretem ximama' nuhu' ca ca' na cucuhu' oro hwanana nuhu' pane ne, om ac ne na ca mam' to' witan cuhu' pain carawa ca main om pin ta' ma', je prata, je ouro ma' quem, om na.

¹⁹ Mam' to' witan nuhu' pain wic ca awi tamana ma', je quicon Cristo co ac wijimain taramaji ovelha ca om em' camain' ma'.

²⁰ Wara tora' paxi' non Cristo Iri' Jam pain cara pane, pain ca om tomi' ma' querec qui' cain macan' pane. Ane an hwet e' con pain xocori ca' ne. Ma' ta to' witan pin cuhu' ta nuhu'.

²¹ Je ca howa pin hun Iri' Jam ma', xi om ca Cristo co to' e' mami' ca pane, co to' hwara' opa ca pain ca mi' con pain ca in ac in ac pi' pin cocon oro wari' quem. Je ca howa hun Iri' Jam ma'. Howa hun pain ca winim' hun ma', pain ca mi' xim cuhu' pain oro ca wara tomi' pe mi' cuhu' ma'.

²² An to pin hwein ca caracat wa, xi om ne ca tomi' ha' pin ara hwein capijacon Iri' Jam ca iri'o'. Ha' pin nuhu' pain ca om noc iri'o' xujuhu' pain ca xere xujuhu' ma'. Je ca tomi' xuhu' ca', tama' tomi' querec te cara xujuhu'. Ta tomi' querec te e' ne capijahu' me, tomi' querec te iri'o' xujuhu', maqui' tarain iri' xumuhu' pain ca tomi' querec te xujuhu' ma'.

²³ Xi mi' ara cuhu' pain xocori ca e' wa pain ca to' camara' mami' cuhu' Iri' Jam ta. Xocori ca e' nuhu' ma', om ca maqui' con wari' co mi' pin. Maqui' non Iri' Jam co e' cara ma'. Mam' to' camara' nuhu' pain capijacon ca e' ma', ca om pi' ra ha' ma'.

²⁴ Win ne ca xirao' pe xine pain capijacon: Ac oro tononoin nana oro wari'. Oro ca awi paxi' nucucun ma', an xiho' e' nain hwijein tononoin. Cono' hap na, camara' hap na hwijein quem.

²⁵ Ane to wet cara ne capijacon Taramaxicon nexi' ne. Ac i ma' na ca xirao' pe xine pain capijacon Iri' Jam ma'. Je ca tomi' xuhu' ca'. Je i ma' capijacon Iri' Jam con Jeju ma', ca pijim' hwet xihwe pane.