1João 5 - Tradução Bíblica Pacaas Novos

Ca howa xun Panxica Iri' Jam Jeju Cristo

¹ Mana panxica Iri' Jam nana oro wari' co howa nonon Jeju ma', pain ca Cristo ca ma'. Oro wari' co om noc nonon Cotere' Iri' Jam cwa', om ca noc cocon oro win ma' caca co Te nonon quem.

² Om iri na ca noc xun Iri' Jam ne, tomi' ha' iri xin oro ca ara je capari' ne, taxi' ac xijiexi' na pain ca om noc xun oro win ma' nexi' pain ca mana panxica Iri' Jam iri' ca'.

³ Tomi' ha' taxipa' iri urun pain oro ca ara je capari' ne, ac i ma' na ca an hwet pin xin ca om noc xun ca'. Om ca i'ina capari' pain ca tomi' ha' xin oro ca ara je capari' quem.

⁴ Wari' co panxica Iri' Jam ma', ha' ara xi' non pain ca to' quiji' pin cain oro ca om awi wa ca i'ina non pain macan' ca'. Je ca tomi' xuhu' ca': Je i ca' ca mam' to' quiji' pin xin quem, mam' to' quiji' pin irin pain ca howa xun Jeju Cristo ta.

⁵ Ma' co to' quiji' pin nain oro ca om awi wa pain macan' quem? Om na, xica' pe tara co howa non Jeju ma', pain ca Panxica Iri' Jam ca ma', wirico co to' quiji' pin nain ta.

⁶ Wirico Jeju Cristo co maqui' nain macan' pane. Mam' maqui' nain com, mam' maqui' nain wic quem. Om ca mam' maqui' e' cain com ma'. Mam' maqui' nain com je wic ta. Je Tamataracon Iri' Jam ca to' querec pin' napari' con Jeju Cristo ma', pain ca tomi' hwet capari' pain ca mam' maqui' cain com je wic. Iri'o' na ca tomi' hwet nein quem, xi iri'o' taxipa' ara ne ta.

⁷ Ma' 3 na ca tomi' hwet napari' pain ca maqui' con Iri' Jam Jeju Cristo:

⁸ Tamataracon Iri' Jam ma', je com ma', je quicon ma' quem, je ca tomi' hwet capari' con Jeju Cristo. An an ari na ca tomi' mao nein quem.

⁹ Tomi' hwet iri nanapari' pain carawa oro wari' ne, pain ca tomi' iri'o' ina ta cacapari' ma', howa ac xuxun na. Awi na ca tomi' nucucun ta paxi' ururun, ane awi tamana pan ne ca tomi' nucun Iri' Jam pain ca tomi' iri'o' ina pain ca tomi' hwet xuhu' con Jeju Cristo ta capari' ne. Awi tiquin' ca' nain ca tomi' hwet nucucun oro wari'. Xi Iri' Jam pan ara ca co tomi' hwet napari' con Panxica ta.

¹⁰ Wari' co howa non Panxica Iri' Jam ma', howa nain ca tomi' nucun Iri' Jam con Jeju Cristo. Wari' co om howa non Iri' Jam ma' iri na ne, tomi' napat non quem. Mixein na Iri' Jam ta non, xi howa cain ca tomi' nucun con Panxica ta.

¹¹ Je i ca' ca tomi' hwet capari' con Jeju Cristo Iri' Jam: Wata' co mi' nuhu' pain ca e' cara wa ta napari'. Je ca tomi' capari' ca'. E' cara xi' iri' pain ca win cwere xun Panxica Iri' Jam ta.

¹² Wari' co win cwere non Panxica Iri' Jam ma', e' cara ac ca na. Wari' co om win cwere non Panxica Iri' Jam ma' iri na ne, om ca e' cara ca.

Ca ha' capari' Iri' Jam pain ca tomi' xun ca'

¹³ Je ca xirao' mi' xuhu' ca', xirao' mi' inuhu' pain ca howa hun Panxica Iri' Jam ma'. Ma' ta taxi' xujuhu' pain ca e' cara xi' hwe ta inuhu'.

¹⁴ Om ca hehe iri' pain ca tomi' xun Iri' Jam pain ca ara mi' xut pain carawa xun ca'. Xi taxi' ara xun pain ca ha' capari' pain ca ara mi' xut pain xun pain iri' ca param nucun ta.

¹⁵ Taxi' iri urun pain ca ha' capari' pain ca ara mi' xut pain oro ca tomi' xun ne, taxi' ac urun na pain ca ara mi' xim capari' pain.

¹⁶ Mo ta querec xun win howa iri' pain ca caracat ca ma'. Querec iri xun pain ca caracat ca ne, pain ca hohot na pain ca om mi' pin ca pain ca caracat nucun ta wa ma', tomi' mi' ac xun tara con Iri' Jam, mi' ac tocwa tara pain ca e' wa. Pain ca tomi' ac i ma' xuhu' ca', tomi' e' inuhu' cocon oro co caracat nana pain ca hohot na pain ca om cono' caca pain ca caracat nucucun ta wa ma'. Ane ma' ca wari' co caracat ma' ne, pain ca hohot na pain ca mi' pin ca pain ca caracat nucun ta wa ma'. Om ca tomi' xuhu' pain ca tomi' mi' jun con Iri' Jam xuhu' con co caracat ac i ma' ma'.

¹⁷ Caracat caracat pi' pin paxi' nana oro wari' co ara nanain oro ca om awi wa ma'. Ane om aram aram cono' cono' xam' xi' caca pain ca caracat nucucun ne.

¹⁸ Oro co mana panxita' ca Iri' Jam ma', taxi' ururun pain ca om caracat taxipa' caca ma'. Xi narain ho' pan ara tococwa con Caxicon Jam ta. Wirico Panxica Iri' Jam co narain ho' nonon ma'. Om ca quep xirac pan ac cocon Caxicon Jam ta.

¹⁹ Taxi' xijexi' pain ca mana panxita' capari' Iri' Jam. Taxi' ururun oro co caracat taxipa' nana ma' quem, pain ca taramaxicon pe ho' pan cocon Caxicon Jam ma'.

²⁰ Taxi' urun Panxica Iri' Jam pain ca wara maqui' cain macan' pane quem. Mi' napari' pain ca taraju pa' wa, ma' ta querec pin' hun Te Iri' Jam co iri'o' ta napari'. Win cwere urun co ma' co iri'o' quem, win cwere urun Panxica Iri' Jam Jeju Cristo. Wirico Jeju Cristo co iri' co Iri' Jam iri'o' ta. Wirico co e' cara ta.

²¹ Je ca tomi' xuhu' ca', pain ca ac ca mana panxita' xuhu' ne ca'. Ma' tara xumuhu' me, ein jein oro carawa jimao ca Iri' Jam xi' ma wa ma'. Ta howa camain' hwein me ta. Je i ca' ca xirao' ne ca'.