1João 4 - Tradução Bíblica Pacaas Novos

Ca pijim' xo' wa pain ca pijim' mixein wa

¹ Je ca tomi' xuhu' pain ca tomi' querec te xuhu' ca'. Ta howa ximama' huhun oro wari' co pijim' nunuhu' me ta. Taraju wet xo' jujun, tomi' querec jujun pain ca pijim' nucucun. Am maqui' con Iri' Jam ca coromicat nucucun ma', am maqui' pan nein ximicocon ca coromicat nucucun ma', tara cocon ta. Je ta coromicat xo' qui' hwe cocon, xi om ne ca mija ara caca co tomi' hwet mixein nonon pain capijacon Iri' Jam oro wari' pain oro xijein macan' ma'.

² Oro co tomi' ca' nana ma': Iri' wari' pin na Jeju Cristo pain ca maqui' cain macan' pane, an tan pan napari' pain ca wari' nexi' ca', mo ta tomi' ac i ma' caca, ha' ac cuhu' tara pain ca querec pin' hwein ca coromicat nein Tamataracon Iri' Jam cocon. Wirico Iri' Jam co mi' nonon pain ca tomi' nucucun.

³ Oro co tomi' jimama' nana ma' iri nana ne, co tomi' ca' nana: Om ca iri' wari' pin ca Jeju Cristo, om ca an tan pan capari' pain ca wari' nexi' ca', mo ta tomi' ac i ma' caca, om ca maqui' con Iri' Jam ca coromicat nucucun. Maqui' pan nain ca coromicat nucun co ma' co ari mip non Cristo ma', co noc tamana non ma'. Wara taraju ara xi' hun pain ca maqui' ta' ca ma'. Wara maqui' pin ca ca' ira, wara mi' pan nain ca coromicat nucun, mi' tata pain oro co pijim' mixein nana ma'.

⁴ Je ca tomi' xuhu' ca', pain ca ac ca mana panxita' xuhu' ne ca'. Wari' nucun Iri' Jam hwe ta. To' quiji' pin huhun oro co pijim' mixein nana ma'. Xi om ne ca hwara' opa ara ne Tamataracon Iri' Jam ca win cwere nuhu' ta. Hwara' opa tiquin' ca' non Caxicon Jam co win cwere nonon oro co om howa nonon Jeju ma'.

⁵ Co pijim' mixein nana ma', om ca howa cocon Jeju. Je ca pijim' an xiho' e' cocon oro co om howa nana ma'. Taraju wet pan nonon oro co om howa nana ma' quem.

⁶ Mana panxica Iri' Jam pan iri'. Taraju wet nanapari' oro wari' co querec pin' nonon Iri' Jam quem. Oro co om querec pin' nonon Iri' Jam ma' iri nana ne, om ca taraju wet cacapari'. Ac i ma' na ca querec pin' xin ca coromicat nucucun co pijim' nana ma'. Co taraju wet nanapari' ma', maqui' nain Tamataracon Iri' Jam ca iri'o' oro ca coromicat nucucun. Co om taraju wet nanapari' ma' iri nana ne, maqui' non Caxicon Jam co pan tem oro ca coromicat nucucun ma' quem.

Ca om noc capari' Iri' Jam, je pain ca mi' capari' pain ca om noc xijexi' quem

⁷ Je ca tomi' xuhu' pain ca tomi' querec te xuhu' ca'. Ta noc xijexi' me, xi wirico Iri' Jam ara ca co mi' napari' pain ca om noc xijexi' ta. Wari' co om noc non win ma' ca ma', wirico co panxica Iri' Jam ta. Querec pin' ac con na quem.

⁸ Wari' co noc non win ma' ca ma', om ca querec pin' con Iri' Jam, xi noc con wari' Iri' Jam ta.

⁹ Mam' napari' con Panxica co xica' xat Iri' Jam pane. Ma' ta e' cara caca pum ta non pari'. Ac i ma' na ca an hwet mi' capari' pain ca om noc camain' capari' ta.

¹⁰ Pain ca om noc xun Iri' Jam ma', tomi' querec te paxi' urun. Ane om noc iri'o' pan capari' ne. Je ca mam' capari' con Panxica pane. Pe rain maxicocon, mi' pin caho' roron, xic am pin rain ca caracat nucucun ta non pari'. Je ca querec pin' xun pain ca om noc iri'o' capari' ta.

¹¹ Je ca tomi' xuhu' pain ca tomi' querec te xuhu' ca'. Ac i ma' na ca om noc capari' Iri' Jam cwa'. Je ta om noc qui' xijexi' ca' quem.

¹² Om paxi' na ca querec tocwa Iri' Jam. Ane taxi' xin i ca' ne: Mo ta om noc caracan xijexi', win cwere cara pan ac capari' na, an hwet pe pin ac xin na ca om noc iri'o' capari' pain ca wari' nexi' ca.

¹³ Taxi' xijexi' pain ca win cwere xun Iri' Jam. Taxi' urun pain ca win cwere capari' quem, xi om ne ca mi' ara capari' pain Tamataracon ta.

¹⁴ Querec urut con Panxica pain ca maqui' cain macan' pane. Tomi' hwet urut cocon oro wari' pain ca mam' capari' con Cote ca quem. Hwet roron oro wari' pain macan' cain, to' witan ca' roron pain ca caracat nucucun ta non pari'.

¹⁵ Wari' co tomi' ca' ma': Panxica Iri' Jam na Jeju ta, mo ta tomi' ac i ma' ca, wirico co win cwere cara ca Iri' Jam. Win cwere cara pan non Iri' Jam quem.

¹⁶ Querec pin' urun Iri' Jam pain ca om noc capari' ca'. Howa urun pain ca om noc ac i ma' capari' quem. Om ca noc camain' cocon oro wari' Iri' Jam, je curucun mao na. Oro co an xiho' nonon Iri' Jam pain ca om noc cocon oro wari' ma', win cwere ac cocon na Iri' Jam. Win cwere pan nonon Iri' Jam ma' quem.

¹⁷ Je ca mi' capari' pain ca an xiho' xun pain ca om noc iri'o' xijexi' ca'. Ma' ta quereme hwe pain xec nein ca wap toton oro wari' pain ca caracat nucucun Iri' Jam ma'. Om ta jin' xun, xi wara an xiho' ara xun pain xocori ca' ta.

¹⁸ Om ca noc capari' Iri' Jam. Je ca om jin' xun ca', xi noc camain' capari' ta. Jin' xuxun xi wap xim capari' ta. Ane om wap xim capari' ne. Je ca tomi' xuhu' ca'. Wari' co jin' non Iri' Jam ma', om ca querec pin' querec con pain ca om noc iri'o' con ma'.

¹⁹ Om ca noc xun Iri' Jam, om ca noc xijexi' quem, xi om ne ca wirico pan ara ca co om noc cain' napari' ta.

²⁰ Wari' co tomi' ca' ma', om ca noc ton Iri' Jam ta, am tomi' ac i ma' paxi' ca pain ca noc con win howa ca ma'. Cain' cain' xira quem? Xi mixein ara ca ta. Noc iri non win howa ca co querec ca ma' ne, om ca ha' con pain ca om noc ac con Iri' Jam co om querec ca ma' quem.

²¹ Je ca ara je capari' quem. Wari' co om noc napa' ma', om ta noc cocon oro win howa ca ta, ac i ma' na ca tomi' capari' Iri' Jam.