1João 3 - Tradução Bíblica Pacaas Novos

Ca mana panxica Iri' Jam iri'

¹ Taraju pa' xin i ca' e': Om ca noc camain' capari' Cotere' Iri' Jam ta, xi mana panxita' inuhu' ara capari' ta. Te urun ma' ira! Oro wari' co om howa nonon ma', om ca querec pin' cacapari' pain ca mana panxica Iri' Jam iri' ca', xi querec pin' pan cocon quem.

² Je ca tomi' xuhu' pain ca tomi' querec te xuhu' ca'. Mana panxica Iri' Jam iri' pain xocori ca', pain ca to to wet xin macan' ca'. Om ca an hwet mi' querec capari' pain ca cwere mama' xi' iri' pain ca to' jimama' xim capari' ca'. Ane taxi' xin i ca' ne: In qui' iri tara Cristo ne, ac wirico pin ac iri' tara, xi om ne ca querec xun ara xi' pain iri' curucun pain iri' ca e' nucun ta.

³ Oro wari' co winim' nanain xec nein ca mi' xun tococwa pain ca ac wirico Cristo pin caca ma', to ni ca' taxipa' nanain oro ca caracat wa ma'. Win ca Cristo pain ca pe ni ca' cain ca caracat wa ma' quem.

⁴ Oro wari' co caracat taxipa' nana ma', ari nonon Iri' Jam pain oro ca ara je tococwa ma'. Xi ari ara cocon Iri' Jam oro co caracat taxipa' nana ta.

⁵ Taxi' hun Cristo pain ca maqui' nucun pane. Maqui' nain macan', ma' ta to' om pin tain ca caracat nuhu' ta napari'. Taxi' hun pain ca om caracat camain' ca quem.

⁶ Oro wari' co win cwere nonon ma', om ca caracat taxipa' caca. Oro wari' co caracat taxipa' nana ma', om ca taxi' cocon Cristo pain ca param nucun, om ca querec pin' camain' cocon ta.

⁷ Je ca tomi' xuhu' ca', pain ca ac ca mana panxita' xuhu' ne ca'. Ma' tara xumuhu' me. Coromicat xo' je. Om ca na camain' ne pain ca howa hun wari' co tomi' mixein nuhu' ma', pain ca hohot na pain ca caracat hwe ta nuhu' ma'. Wari' co ara xo' taxipa' ma', wirico co hohot non Iri' Jam. Win ca Jeju Cristo pain ca hohot con Cote ca quem.

⁸ Wari' nucun Caxicon Jam na co ma' co caracat taxipa' ma', xi caracat taxipa' pan ara ca Caxicon Jam ta. Wara caracat qui' ara xi' nain ca xo' tomi' ma' ten qui' xine macan' pane. Je ca maqui' cain macan' Panxica Iri' Jam quem. Ma' ta to' om pin tain oro ca ara nucun Caxicon Jam ta na pane.

⁹ Oro wari' co mana panxica Iri' Jam pin nana ma', om ca caracat taxipa' caca, xi ma' ara cocon iri' ca e' nucun Iri' Jam ta. Om ca caracat taxipa' ac caca, xi mana panxica Iri' Jam ara caca ta.

¹⁰ Je i ca' ca to' querec pin' napari' ca jimama' ca' xucucun mana panxica Iri' Jam cocon mana panxica Caxicon Jam: Wari' co om ara xo' taxipa' ma', co noc non win howa ca ma' quem, om ca panxica Iri' Jam ca co ma'.

Ca om noc caracan xujuhu' pain ca mana panxita' xuhu' ca' capari' Iri' Jam

¹¹ Je i ca' capijacon Iri' Jam ca pijim' mi' xihwe pane, ca wara taraju hwe pain ca xo' howa ten qui' hwe pane quem: Tomi' querec te caracan xujuhu' ta napari'.

¹² Om ta an xiho' xun Caim co wari' ne ca Caxicon Jam pain cara pane. To' pa' pin non coxa' ca pane. Para to' pa' pin con quem? Om na, taraju pa' je e'. To' pa' pin non coxa' ca, xi om ne ca pan tem taxipa' pan ara ca ta. Noc non coxa' ca pain ca ara xo' taxipa' ca quem.

¹³ Je ca tomi' xuhu' ca' xere. Ta wa ina me hwe pain ca noc cucuhu' oro co om howa nonon Iri' Jam me.

¹⁴ Taxi' xijexi' pain ca wara witan ca' xin ca cono' wa. Taxi' xijexi' pain ca e' pin iri' pain iri' ximixi' quem. Xi tomi' querec te taxipa' ara xuxun oro xerexi' co howa nonon Iri' Jam ta. Wari' co noc taxipa' non win ma' ca ma', ac ca mi' pin cara ca na. Om ca witan ca' camain' cain ca mi' pin wa ta.

¹⁵ Wari' co noc taxipa' non win howa ca ma', ac ca to' pa' pin con na. Cain' cain' xira quem? Ma' non ca om pi' ra ha' ne ca e' wa pain ca to' pa' pin con win ma' ca ra? Om na, wara taxi' irin i ma' ta.

¹⁶ Mi' pin caho' iri napari' Jeju Cristo pane ne, to' querec pin' ac capari' na pain ca om noc camain' capari' ta. Om ca nain ho' xucun pari', mi' pin caho' napari'. Ac i ma' xi' quem, om ta narain ho' xijexi' cocon oro xerexi' cwa'. Quep xiho' xijexi', am cono' xi' iri' pain ca quep xiho' xijexi' ca'. Je i ma' ira xi'.

¹⁷ Wari' co ma' non oro carawa ma', mo ta taxi' con win howa ca pain ca ximin ca ma', pain ca om con carawa ma', mo ta om xiram pa' con quem. Ma' tara ca an xiho' cara ac con Iri' Jam pain ca om noc capari' ra? Om na ta.

¹⁸ Je ca tomi' xuhu' ca', pain ca ac ca mana panxita' xuhu' ne ca'. Ta tomi' capijacocon e' xijexi' pain ca tomi' querec te inuhu' ta ximama' xijexi' me. Xiram pa' xijexi', quep xiho' xijexi'. Tomi' querec te iri'o' xijexi' quem.

¹⁹ Tomi' querec te ac i ma' iri xijexi' ne, querec pin' ac xijexi' tara pain ca mana panxita' capari' Iri' Jam co iri'o'. Quereme ac iri' tara pain ca tomi' xun quem.

²⁰ Am wixipa' paxi' iri' pain ca tomi' xun iri' ca', xi om ne ca taxi' pan ara xijexi' pain ca caracat iri' ca'. Taxi' paxi' irin ca coromicat nexi' pain ximixi' ca', ane taxi' taxi' tiquin' ca' capari' pain oro ca coromicat nexi' pain ximixi' Iri' Jam ne. Je ca ha' capari' pain ca quereme iri' pain ca tomi' xun ca'.

²¹ Je ca tomi' xuhu' pain ca tomi' querec te xuhu' ca'. Om iri na ca wixipa' iri' pain ca tomi' xun Iri' Jam ne, pain ca taxi' xijexi' pain ca caracat iri' ca', om ca hehe iri' pain ca tomi' xun ca'.

²² Mi' mi' pi' pin ac capari' tara pain oro ca mi' ne xun quem. Xi om ne ca tomi' ha' taxipa' ara xun pain oro ca ara je capari' ta. Xi om ne ca ara taxipa' e' ara xin oro ca hohot non quem.

²³ Je i ca' ca ara je capari': Howa jun Panxita' Jeju Cristo cwa' napari'. Tomi' querec te taxipa' xujuhu' ta napari' quem. Je ca ara je capari'.

²⁴ Oro wari' co tomi' ha' taxipa' nonon Iri' Jam pain oro ca ara je tococwa ma', wiricoco nana co win cwere nonon ma'. Win cwere cara pan nonon Iri' Jam quem. Taxi' urun pain ca win cwere capari' quem, xi mi' ara capari' pain Tamataracon ta.