1João 2 - Tradução Bíblica Pacaas Novos

¹ Xirao' mi' ac i ma' inuhu' pain ca ac ca mana panxita' xuhu' ne ca'. Ma' ta om caracat hwe ta inuhu'. Ane tomi' ca' xuhu' pain i ca' ne: Am ma' ca wari' co caracat ma'. Mam' pe wet xin i ca': Ma' napari' Jeju Cristo co om caracat camain' ma', co tomi' mi' napari' con Cotere'.

² Wirico co pe nain maxixi' pain ca mi' pin caho' capari' pane. Ma' ta xic am pin cain ca caracat nuhu' Iri' Jam ta napari'. Om ca xica' mi' pin caho' capari' pain ca caracat nexi' quem, om na. Mi' pin caho' mi' pin caho' pi' pin tata pain ca caracat nucucun oro wari' pain oro xijein macan' ta.

³ Tomi' ha' iri urun Iri' Jam pain oro ca ara je capari' ne, taxi' ac xijexi' na pain ca querec pin' xun ca'.

⁴ Wari' co tomi' ca' ma', querec pin' inon Iri' Jam ta na. Mo ta om tomi' ha' con pain oro ca ara ra con ma', mixein ac ca na. Xi tomi' ha' pan con Iri' Jam co iri'o' ta.

⁵ Ane tomi' ca' xuhu' pain i ca' ne: Wari' co tomi' ha' nain capijacon Iri' Jam ma', wirico co om noc iri'o' non. Tomi' ha' ac i ma' iri urun Iri' Jam ne, querec pin' ac xijexi' na pain ca win cwere pin xun ca'.

⁶ Wari' co tomi' ca' ma', win cwere inon Iri' Jam ta, am tomi' ac i ma' ca. Na e' na pain ca xut xo' ca quem. Win ca Jeju pain ca xut xo' ca pane.

⁷ Je ca xirao' mi' xuhu' pain ca tomi' querec te xuhu' ca'. Xirao' mi' e' inuhu' pain ca hu nucun Iri' Jam cwa', pain ca om noc caracan xujuhu' ta cuhu' ca'. Om ca xocori ne ca hu nucun quem. Wara hu ac i ma' nuhu' pain cara pane. Wara taraju hwein pain ca xo' pijim' mi' qui' xihwe pain capijacon con Jeju pane.

⁸ Ane xocori ne ca hu nucun ca xirao' mi' xuhu' ca' ne, ac je na. Querec pin' urun Cristo pain ca om noc iri'o' capari', querec pin' xihwe pain ca om noc iri'o' xujuhu' ma' quem. To' om pin ara xi' nain ca jitacat nein xim pain xumuhu' ta. Toha pin nuhu' iri' naran ca iri'o' ta.

⁹ Wari' co tomi' ca' ma', pe cara inain naran nucun Iri' Jam ta, am tomi' ac i ma' paxi' ca pain ca noc con win howa ca ma'. Cain' cain' xira quem? Xi pe cara ara cain ca jitacat nein xim ta.

¹⁰ Wari' co om noc non win howa ca ma', wirico co pe cara nain naran nucun Iri' Jam. Om non carawa ca to' caracat non.

¹¹ Ane om ac i ma' ne con wari' co noc non win howa ca ma'. Pe cara nain ca jitacat nein xim, xut cara nain quem. Om ca taxi' cain ca mao ta' nucun, xi ha' con pain ca querec wa pain ca jitacat nein ta.

¹² Xirao' mi' inuhu' pain ca ac ca mana panxita' xuhu' ne ca'. Xi om ne ca xic am pin ara xine ca caracat nuhu' pain ca mi' pin caho' cuhu' Jeju ta.

¹³ Xirao' mi' inuhu' pain ca wara horon hwe ma' quem. Xi om ne ca querec pin' ara hun co wara ma' ma', pain ca om om wet ne macan' pane. Wahu' pain ca xo' horon hwe ma' quem, xirao' mi' inuhu'. Xi om ne ca to' quiji' pin ara hun Caxicon Jam ta.

¹⁴ Xirao' mi' inuhu' pain ca ac ca mana panxita' xuhu' ne ca'. Xi om ne ca querec pin' ara hun Cotere' ta. Xirao' mi' inuhu' pain ca wara horon hwe ma' quem. Xi om ne ca querec pin' ara hun co wara ma' ma', pain ca om om wet ne macan' pane ta. Wahu' pain ca xo' horon hwe ma' quem, xirao' mi' inuhu'. Xi om ne ca hwara' opa ara hwe ta. Pe ho' nuhu' capijacon Iri' Jam pain xumuhu', to' quiji' pin hun Caxicon Jam quem.

Ca om na ne pain ca win xumu xin ca caracat wa ta

¹⁵ Ta win xumu hwein oro ca om hohot non Iri' Jam pain macan' ca' me, ta win xumu hwein oro ca param ximama' caca oro caracat co to nanain macan' ca' quem. Wari' co win xumu nain oro ca om hohot non Iri' Jam pain macan' ca', om ca win xumu con Cotere'.

¹⁶ Xi maqui' con Cotere' oro ca param ximama' wa ta. Oro ca param ximao ne ca cwere wa ma', oro ca querec param ximao xine oro carawa ma', oro ca xec xec ximao wa pain oro ca cut xine ma' quem, om ca maqui' con Cotere', om na. Maqui' nonon oro co om howa nonon Iri' Jam.

¹⁷ Main om pin tara oro carawa ca om hohot non Iri' Jam pain macan' ca'. Main om pin tara oro ca param ximama' caca oro co om howa nonon ma' quem. Wari' co ara nain ca param pan nucun Iri' Jam ma' iri na ne, e' cara ac ca tara ta.

Ca hu tococwa cocon oro wari' co noc nonon Cristo

¹⁸ Je ca tomi' xuhu' ca', pain ca ac ca mana panxita' xuhu' ne ca'. Wixicam pin na xec nein ca pi' pin ta' ne macan' ca'. Maqui' nain i ma' wari' co noc tamana non Cristo ma', co ari mip non ma'. Wara taraju hun pain ca maqui' ta' nucun. Wara mija pin nana oro win ma' ca co ari nonon Cristo pain ca noc cocon ma' quem. Je ca taxi' xin ca wixicam pin ne xec nein ca pi' pin ta' ne macan' ca'.

¹⁹ Co ari nonon Cristo pain ca noc cocon ma', cut in wi paxi' nanapari' pane, ane om iri' win ma' ne cacapari' pain ca howa nexi' con Cristo ne. Je ca paca' cacapari' pane. Mo xi iri' win ma' ne cacapari' con Cristo ma', je xi momon cut in cut in cara cacapari' quem. Ane paca' cacapari' ne. Je ca querec pin' tococwa pain ca om win ma' ne cacapari' con Cristo.

²⁰ Wahu' iri na ne, ma' nuhu' Tamataracon Iri' Jam. Wirico co awi tamana ma', co pe ni ca' nain ca caracat wa ma', wirico co mi' nuhu' pain Tamataracon. Je ca querec pin' querec pin' pi' pin hwein oro ca pijim' xo' xine pain capijacon ma'. Querec pin' ac hwein na oro ca pijim' mixein xine ma' quem.

²¹ Pain ca xirao' mi' xuhu' ca', om ca coromicat mi' ca' xuhu': Xirao' mi' toton, xi querec pin' cacain capijacon Iri' Jam ca iri'o' ta, om ca coromicat mi' ac i ma' xuhu' ta. Taxi' inuhu' pain ca querec pin' hwein capijacon Iri' Jam ca iri'o'. Taxi' inuhu' pain ca taraju pa' hwein i ca' quem, pain ca om mixein camain' ne capijacon Iri' Jam ca iri'o'.

²² Je ca tomi' xuhu' ca'. Ma' co mixein ma' quem? Om na, taraju pa' je e'. Wari' co om querec pin' non Cristo pain ca wara tora' pan con Iri' Jam pain ca to' witan roron pain ca caracat nucucun oro wari' ta con pane, wirico co mixein ta. Wirico co ari non Cristo pain ca noc tamana con ma'. Noc non Cotere' Iri' Jam, noc non Panxica quem.

²³ Oro wari' co noc nonon Panxica Iri' Jam ma', om nonon Cotere'. Wari' co Panxica Iri' Jam na Jeju ta, ma' non Cotere' quem.

²⁴ Je ca tomi' xuhu' ca'. Pe ho' tarain xumuhu' oro ca taraju qui' hwe pain ca xo' howa ten qui' hwe pane ta. Pe ho' cara iri turuhu' oro ca taraju hwe pain ca xo' howa qui' hwe pane ne, win cwere ac hun tara Cotere' Iri' Jam con Panxica Jeju Cristo.

²⁵ Je ca wara tomi' pe mi' capari' ca'. Mi' xuhu' pain ca om pi' ra ha' ne ca e' wa ta napari' ta.

²⁶ Je ca xirao' mi' xuhu' ca'. Xirao' mi' inuhu' cocon caram ma' co pijim' mixein xim nunuhu' pain ca howa ni ca' jein capijacon Iri' Jam con Cristo ta nunuhu' ma'.

²⁷ Ane ma' cuhu' Tamataracon Iri' Jam ne. Win cwere nuhu' quem. Ca' na nuhu' pain oro capijacon Iri' Jam ca taxi' je cuhu' ma'. Om ca ximin hwe pain, om ca ma' xirapari' na hun xucun co ca' na nuhu' pain, om na. Ca' na xo' nuhu' pain. Om ca ca' na mixein cuhu', ca' na iri'o' nuhu' pain oro capijacon Iri' Jam ca taxi' je cuhu' ma'. Je ta win cwere qui' hun Cristo ta.

²⁸ Je ca tomi' xuhu' ca', pain ca ac ca mana panxita' xuhu' ne ca'. Win cwere jun Cristo. Ma' ta quereme iri' pain ca aram aram in qui' ta' nucun. Ma' ta om jin' iri', ma' ta om wixipa' iri' pain ca to quima hwet xun quem.

²⁹ Wara taxi' hun pain ca ara xo' nucun ma', pain ca hohot con Iri' Jam pain oro ca ara nucun. Je ca taxi' hwein i ca' quem: Oro wari' co ara xo' taxipa' nana ma', pain ca hohot cocon Iri' Jam pain oro ca ara nucucun ma', wiricoco co mana panxica Iri' Jam nana quem.