1João 1 - Tradução Bíblica Pacaas Novos

¹ Xirao' mi' urut pahu' con Jeju Cristo co wara ma', pain ca om om wet ne macan' pane, co ma' ma' wet pain xocori ca' quem. Taraju urut con, querec urut con pain tocoxut. Querec pin' urut con, quep urut con pain muxut quem. Je ca tomi' hwet urut pahu' con. Wirico co capijacon Iri' Jam ma', co an hwet mi' napari' pain ca om pi' ra ha' ne ca e' wa ta.

² Hwet naparut pain macan' pane. An hwet mi' xucun pain ca mi' cain ca e' wa. Querec urut con, wirico co tomi' hwet urut cwa'. Pijim' hwet urut pahu' con, pain ca wirico co mi' nain ca om pi' ra ha' ne ca e' wa ta urut pahu'. Wara pe ho' paxi' non Cote ca pain cara pane, ane an hwet mi' caparut con ne.

³ Tomi' hwet urut pahu' pain oro ca querec urut con, je pain oro ca taraju urut con quem, ma' ta jao jao ma' maparut pain ca taxipa' xijexi' ca'. Win ne ca jao jao ma' urut con Cotere' Iri' Jam con Panxica Jeju Cristo pain ca taxipa' urut cocon ta urut pahu'.

⁴ Je ca xirao' mi' urut pahu' ca', ma' ta tomi' querec te tamana wi xijexi' ta urut pahu'.

Ca xuruxut xin naran nucun Iri' Jam pain ca ara e' xin ca param nucun

⁵ Je i ca' ca pijim' caparut Jeju pane. Tomi' hwet ac urut pahu' pain na quem. Ca' na ca tomi' nucun: Iri' naran na Iri' Jam. Om ca ma' camain' con ca jitacat nein xim.

⁶ Tomi' ca' iri iri' ne, taxipa' inon Iri' Jam ta, am tomi' ac i ma' paxi' xi' pain ca xuruxut xin ca jitacat nein xim ma', pain ca win xumu xin ca caracat wa ma', mixein ac iri' na. Mo ta xuruxut xin ca jitacat nein xim ma', pain ca win xumu xin ca caracat wa ma', mixein ac iri' na. Om ca tomi' ha' xin capijacon Iri' Jam ca iri'o'.

⁷ Xuruxut cara iri irin naran nucun Iri' Jam ma' ne, pain ca win xumu xin oro ca param nucun ma'. Win ne ca pe cain naran ma' quem. Xuruxut ac i ma' iri irin naran nucun ne, tomi' querec te caracan ac xijexi' na pain ca taxipa' xijexi' ca'. Hohoc pin ac capari' na pain ca caracat nexi' quicon Panxica cwa', Jeju cwa'. Ac i ma' na ca to' om to' om pi' pin cain ca caracat nexi' quem.

⁸ Tomi' ca' iri iri' ne, om napa' ca caracat wa ta, am tomi' ac i ma' iri'. Cain' cain' xixi' quem? Om na ximixi', xi coromicat xo' iri' ta. Om ca win cwere capari' Iri' Jam co iri'o' quem.

⁹ Tomi' hwet mi' iri urun pain ca caracat nexi' Iri' Jam ne, xic am pin ac cain na. Xi mixein capari', om ca mixein camain' capari'. Tama' ara xo' na, ara mi' taxipa' napari' pain oro ca tomi' pe mi' capari' quem. To' om to' om pi' pin napari' pain oro ca caracat nexi'.

¹⁰ Tomi' ca' iri iri' ne, om ca caracat camain' ta' ta, am tomi' ac i ma' iri'. Mixein na Iri' Jam ta urun. Tomi' ac i ma' iri iri' ne, om ca pe ho' camain' capari' capijacon pain ximixi' quem.