Ubadaya 1 - Udél Dwata: Gna Kesfasad ne Lomi Kesfasad

Ktafak Dwata yó kem tau bè Idom

¹ Ni se htonen ke Ubadaya, yóm Dwata hol dandónen geta, gbak ebè benwu Idom. Deng gungol tekuy yóm tulón lemwót bè Dwata, duhen yóm kwen tau hógówen mò eles tmulón du bè yó kem tólóng benwu yóm udélen, monen, “Yóm kdéen tau eles ye htigel. Sentifun tekuy kem sendalù tekuy na tekuy e nundug yóm benwu Idom.”

² Yó udél Dwata, monen, “Ó Idom, angat henbalingu u benwu hol gdanà bè kdéen ne angat tey kehnê le kóm yóm kdéen tau.

³ Tey keheklabakem abay se hono botu mgemel yóm gónóhem nô, tódô ye nô ta yó kem bulul geta. Yó udél ye, ‘Tau du de tô gmuta tekuy bè ni?’ Bê. Hol bê ye abay tnondo knô ye.

⁴ Anien he ke kegetahen kóyóng banug yóm kóyóng ye, duhen ke smala ye ditu bè tu kem blotik botong gafitu yu, ne gotu genlau yu snéen. Ou se yóm sana Dwata hol gónó mogot nim mudél ni.

⁵ Ke wen tau mnagaw bélê ye kifu, là kô gotu nwa le du kdê kimu ye, olo le ma yóm nóyô le. Dalang se yó kem tau muta bungu grép, sal gel wen tebel le bè yó kem tau élél. Okóm kul yó kem hohon ye, angat tódô gotu himot nwa le yó kem kimu ye, laen kô dù tebel.

⁶ Tódô ket gónô bè Idom gotu snisif le. Ket kimu legen ton le tódô gotu nwa le.

⁷ Kdê yó kem benwu tehe gel tmóbóng kuy, angat bud hnohon le yu. Tódô gbót hdó le yu lem yóm kuy benwu. Fasad le kuy yóm kenek kbenwu ye yóm igò le matul gemlà kuy. Yó kem kuy hol dumu swè, mom lu hmolot kuy ne là kô dilô ye du yóm kmò le du bélê ye.

⁸ Bè yóm kdaw yó,” mon Dwata, “balù sotu ke wen tau hulung hedem tebel bè klamang yóm benwu Idom abay se bè yó kem bulul bè Idom angat gónóhu gotu gemlà kul yó kem tau hulung hedem ne yó kem tau hulung temnef.

⁹ Ne angat tey sidek klikò yó kem sendalù ye bè Timan deng alì layam bè sfatay. Yó nmò yó kem hohon le, gotu hnatay le lu sudeng yóm kdéen tau bè yó bè bulul Idom.”

But gónón megtafak yóm benwu Idom

¹⁰ “Yó gónó le mò du bélê ye yóm yó, lemwót bè yóm alì kehsidek ye yó kem dumu ye setwoli sfu Jakub. Yó mò kuy angat tey sidek kyak ye, tódô ye sulék meglà ne laen kô dù tul sónen.

¹¹ Yó buten yóm keglà ye yó abay se bè yóm kdaw kwen alì gónó le glayam yó kem dumu ye setwoli tau Israél, deng mom tódô bayà ye lu, deng ye mom mdà hlayuk, là kô dog tnóbóng ye kul. Bè yóm kdaw ksut le bélê le yó kem tólóng benwu mundug kul, gotu nuku le yó kem kendengen bè Jirusalim, omin le yó mólól du yóm syudad Jirusalim mlan bè yóm atù nmò le. Yó nmò ye se kuy, lómón ke yu sotu hohon yó kem tau Israél.

¹² Yake béen lómón yó dé nmò ye. Béen dê udél ye bè yóm kdaw kegef le yó kem dumu ye ebè tólóng benwu mayuk. Bê ye mom fen hligal bè yóm kdaw keglà le. Bê ye mom heklabak bè yóm kdaw le alì tmalaw.

¹³ Yake bê ye tehe kendel sut elem yóm syudad le bè yóm kdaw le alì glayam. Béen mom dê mon ye bè yóm deng kegbà klowil yó kem dumu ye. Deng gotu negef ye yóm kdê nô lem yó kem gónô tebel le ne deng ye baling mdengen bè yóm kdaw keglà le. Yake bê ye tehe nmò yóm yó.

¹⁴ Yake bê ye tehe mom hékét bè gónón sesyat lan, ket mlóy ket hnatay ye. Yake bê ye tehe bud kenfô lu yó kem dù tebel, mom blay ye lu ebè yó kem hohon le bè yóm kdaw alì sidek keglayam le.”

Keglà Dwata yóm benwu Idom

¹⁵ Yó udél yóm Dwata hol gónó mogot ebè yó kem tau Idom, monen, “Deng moni ne yóm dou kdaw kkukum yóm kdéen benwu là mimón do. Yóm deng nmò ye bè yó kem tau Israél, yó se bud nmou bélê ye. Angat bud huléku eta ye kdê yó kem sidek deng nmò ye bélê le.

¹⁶ Lómón yóm deng kinum ye yóm ninum héét ta yóm dou bulul lan ye hligal bè yóm deng kegmò ye, angat milud senta yó he khééten yóm bud hinumu kuy bè yóm ktafaku kuy dalang se yó kem tólóng benwu hmilol kuy, bè yóm ktafaku yóm kdê ye. Ngangu hinum kuy efet là bud ye gógów ne efet ye gotu lana lem benwu lómón ke là tehe ye tau.”

Kehetlob Dwata yóm benwu Israél

¹⁷ “Okóm yóm Bulul Sayun angat baling benwu gónó le e mlo yó kem tau Israél deng gewà ne angat baling benwu laen kô du belenen. Angat le gotu bud semfulék yó kem dù tau Israél na le e bud nwa yó kem tehe kul nfun.

¹⁸ Bè yóm kdaw yó, hol lómón ke tey ofi yó kem ból Jakub ne yó kem ból Jusif, okóm yó kem ból Iso hol lómón ke loob deng mékéng. Angat gotu ken yóm tey ofi yó yóm klamangen, balù udì ke wen tau bud tebel. Ou se yóm sana Dwata hol gónó mogot nim mudél ni.

¹⁹ Ominen yó, yó kem dou tau nô bè benwu Négéb fi leged, angat gotu gfun le yó kem bulul bè Idom. Yó kem tau menwu bè but henfek bè benwu Juda fi desdef, angat gfun le yóm datal yó kem tau Flistin dalang se yóm tonok Ifraim ne tonok Samarya. Ne yó kem sfu Bindyamin, angat gfun le yóm tonok bè Gilyad.

²⁰ Yó kem tau Israél deng negef, angat bud nulék le yóm sana kul benwu ne gfun le yóm benwu Funisya efet kól fi bwak bè yóm benwu Sarifat. Ne yó kem tau tehe lemwót bè Jirusalim deng negef le ebè yóm tólóng benwu fi bwak, angat le bud mulék ebè yóm kul benwu ne nô le bè yó kem benwu lemnek bè Négéb fi leged.

²¹ Angat le mneged ebè Bulul Sayun bè Jirusalim yó kem tau gewà na le e knamal kdê yó kem bulul bè Idom. Ne yóm hol geta bélê le mogot yóm klamangen, duhen yóm sana Dwata hol gónó mogot.”