Tekang Kbuten 9 - Udél Dwata: Gna Kesfasad ne Lomi Kesfasad

Yóm fasad Dwata ke Nuwa

¹ Yó olu Dwata ke Nuwa ne yó kem ngaen logi, monen, “Hol ye bud mból anì bud wen tau talak tonok.

² Hogotu kuy kentihen ógóf ne kentihen onuk koyu ne kentihen utón él. Nbuten ni ne, yóm kdê le yó, wen klikò le kuy.

³ Ne gbek ye mken kul lenwóten bè yóm kdaw ni mò tnù yó kem hulu gel ken ye. Gotu blayu kuy yóm kdéen mò ken ye.

⁴ Són olo là hkenu du kuy, són yóm utón tolo nô lem lówóhen litóen abay se bè yóm litóen gónón nô lowilen.

⁵ Ke wen tau hnatayen ke dumun, hatay snéen tafaku du. Senged se bè ógóf ke wen tau ghatayen, yó tafaku du hatay.

⁶ Abay se bè yóm kmou tau heskélu béléu. Yó gónóm mon, ke wen tau bnonoken ke dumun, yó se bud kun des bnonok.

⁷ Hol ye mból anì bud wen tau talak tonok.”

^8-9 Ne yó bud mon Dwata mò ke Nuwa ne yó kem ngaen logi, “Ni wen fasadu bélê ye dalang se yó kem angat bud lugod ye

¹⁰ ne senged se ebè yóm kentihen mowil talak tonok, yó kem onuk koyu ne yó kem ógóf, ne yóm kentihen mung kuy hewà gu lem yóm kafal.

¹¹ Ni se yóm hol fasadu kuy, laen kô bud dunuk ne gemlà yóm kentihen mowil talak tonok. Là kô bud hdunuku du ne talak tonok.

¹² Nim fasadu kuy ni dalang se bè yóm kentihen mowil talak tonok, hol fasad laen kô dù tul sónen. Ni hol ilóen yóm fasadu kuy ni,

¹³ wen léwés suu bè yó kem lobun te kmawang. Yó se ilô yóm deng fasadu ebè yóm kentihen mowil te tonok, hol fasad laen kô dù tul sónen.

¹⁴ Ke gel hlobunu te kmawang, ne ke gfan bè yó yóm léwés,

¹⁵ yó se mò gónóhu hemtulón du nawa yóm deng fasadu kuy dalang se ebè yóm kdéen ógóf. Hentulónu nawa yóm là bud keheglumfaku du bè kdê yó kem mowil talak tonok yóm dunuk.

¹⁶ Ke sok gel gfan bè lobun yóm léwés, tonu se dou ne yó mò gónóhu hemtulón du nawa yóm deng fasadu ebè yóm kdéen mowil talak tonok, yóm fasad laen dù sónen.

¹⁷ Yó se ilô yóm fasad nmou ebè kdéen mowil talak tonok.”

Nuwa ne yó kem ngaen logi

¹⁸ Bè yóm kehewà Nuwa gu lem yóm kafal, ni se boluy yó kem ngaen logi mung du, Sém ne Ham ne Jafit. Yóm Ham, du se mà Kanan.Ni kem tlu ngà Nuwa logi ni, bélê le gónó le gu semfu yóm kdéen tau talak tonok.

¹⁹ Ni kem tlu ngà Nuwa logi ni, bélê le gónó le gu semfu yóm kdéen tau talak tonok.

²⁰ Yó kun nmò Nuwa, gel mò nmò bè tonok. Du se yóm hol tanay tau mulu grép.

²¹ Bè yóm kinumen yóm tifas yóm grép huluhen, deng mom lengel du, ne tódô hlilil bè gónóen laen dù nesen.

²² Timbow ton Ham yóm mà Kanan, yóm klaen dù nes maen, tódô lemwót ne tulónen yó kem lewu dumuhen sulil-lem logi.

²³ Lemwót le Sém ne Jafit, wen kumù nwa le. Yó kmò le du, senbalà nogot le sfatà kililen, hloyol le te kwang le, nogot le bè seblà abal le. Tódô le mógów hudul elem yóm gónô mà le, ne lenimun le igò le binguy anì là ton le du yóm klaen dù nes mà le.

²⁴ Timbow deng lembó klengel Nuwa ne tngónen yóm nmò Ham béléen, yóm ngaen twoli,

²⁵ yó gónón mon du, “Dwata he hol tmafak ke Kanan. Du angat ghesek bè yó kem twoguhen.

²⁶ Hol dóyón kuy Dwata, yóm gónón mogot Sém. Kanan se angat heseken.

²⁷ Dwata he hol hból ke Jafit. Yó kem kun ból, angat le slomong menwu yó kem kun ból Sém. Bong ke Kanan kun, mò angat ghesek bè Jafit.”

²⁸ Kogol yóm kehdunuk Dwata te tonok, botong 350 halay bud tnù halay Nuwa.

²⁹ Song matay, deng 950 halayen.