Tekang Kbuten 8 - Udél Dwata: Gna Kesfasad ne Lomi Kesfasad

Keteflok yóm dunuk

¹ Bè yóm tey kdunuken yó, là kô klifót Dwata kul le Nuwa ne yó kem ógóf tehe nwiten elem yóm kafal. Ne wen lenos hbel Dwata anì nbuten mtón yóm él.

² Tódô teflok yóm tey él semfut gu lem tonok ne bud teflok snéen yóm tey kulón bong.

³ Botong lematu limu folò kdawen kegenen minut mtón yóm él.

⁴ Song htengen yóm kafal yó, deng kól bè yóm gesfoloen hitu kdaw bè yóm ghituhen bulón. Tódô htengen ta yóm sotu bulul bè yó boluyen Bulul Ararat.

⁵ Sónmoen minut mtón elaan se yóm él yó ne bè yóm tanay kdaw bè yóm gesfoloen bulón, tódô gfan tfusù yó kem dumu bulul.

⁶ Tikóng deng bud fat folò butengen bè yó, omin Nuwa yó he hemnas sotu tembó beng yóm kafal.

⁷ Ne hóyóngen yóm wak ne là kóen bud mulék elem yóm kafal. Ngangen mò du tendo gel bliwel móyóng efet bè kekti yóm él.

⁸ Bè yóm tolo lelen móyóng, bud hóyóng Nuwa obun mò gónón temngón du ke deng milef elem tonok yóm él.

⁹ Okóm laen kô dù gónón mdef yóm obun yó abay se tolo wen él bè klamangen. Yó gónón tódô bud mulék ebè yóm kafal. Tódô hefet Nuwa bè sigelen, ne bud suen elem kafal.

¹⁰ Na Nuwa bud mangat hitu kdaw, ominen bud hóyóng yóm obun yó.

¹¹ Ne song bud kól yóm obun deng móyón kifu. Wen nangaen tubed koyu ulib. Ne tódô tngón Nuwa deng milef ne yóm él.

¹² Na Nuwa bud mangat hitu kdaw bè yó, ominen bud hóyóng yóm obun. Bede bè yóm kdaw yó, là kóen bud mulék ebélê le yóm obun.

¹³ Timbow deng nem latu bud sotu halay Nuwa, deng gotu milef ne yóm él bè yóm tanay kdaw bè yóm tanay bulón bè yóm halay yó. Kó Nuwa limun yóm kafal ne temngel gu hmilol ne tonen nbuten mékéng ne yóm tonok.

¹⁴ Tikóng kól bè yóm gewuhen folò hitu kdaw bè yóm gewuhen bulón, yó he tahu hol kékéng gu ta yóm tonok.

¹⁵ Ne bud mudél Dwata ebè Nuwa, monen,

¹⁶ “Hewà ye ne, nitem yehenem ne kem ngaem logi ne yó kem towuhem.

¹⁷ Gotu nitem lu hewà yóm kentihen kay onuk koyu ne kay ógóf deng tehe nwitem anì hol le mngà ne mból talak tonok.”

¹⁸ Ne tahu se, hewà Nuwa mung du yehenen ne yó kem ngaen logi ne yó kem towuhen.

¹⁹ Mung kul yóm kentihen kay ógóf ne kentihen kay onuk koyu deng tehe nwiten elem kafal, bede sal mlan bè ket kayen yóm kmò kehewà le.

Kedsù Nuwa ebè Dwata

²⁰ Tikóng le deng gotu hewà, wen botu sensodò Nuwa mò gónón demsù ebè Dwata. Ne wen nwahen bè ket kay yó kem ógóf ne onuk koyu gel henmóyô Dwata mò dsù le ebéléen ne hkekeben ta yóm gónó demsù yó.

²¹ Yóm boo yóm dsuen yó, tey hyu nawa Dwata du ne yó hendemen, “Là kô bud genlau du ne yóm tonok ne yóm kentihen nô tahen lemwót bè sidek gel nmò tau. Tódô tngónu yóm tau, lemwót bè hanà kudien yóm kwen sidek nô lem hendemen. Là kô naw e bud genlà kul ne yóm kentihen mowil talak tonok lómón yóm deng nmou bélê le ni.

²² Yóm igoen tolo wen benwu, sal gel wen bulón mulu ne wen bulón muta. Wen bulónen tnaw ne wen se bulónen kinì. Wen bulónen mnóng kdaw ne wen se bulónen kmulón. Senflósen wen kdaw ne senflósen wen se kifu.”