Tekang Kbuten 7 - Udél Dwata: Gna Kesfasad ne Lomi Kesfasad

Kehdunuk Dwata bè klamangen benwu

¹ Bè yóm deng kdeng yóm kafal hmò Dwata ke Nuwa, bud mudél ebè Nuwa Dwata, monen, “Huseki elem yóm kafal ne, nwitem yó kem fes lówóhem. Bè kdê yó kem tau nô talak tonok, tek són uu yóm tonu mò du yóm tedeng.

² Bè kdê yó kem kay ógóf gel henmóyóu mò dsù ye ebéléu, miti elem yóm kafal ket ne hitu tengeb. Okóm bè yó kem dumu ógóf là henmóyóu du, olon ket ne stengeb nwitem elemen.

³ Ne bè yó kem onuk koyu, budi mit ket hitu tengeb snéen bè ket kayen. Yó gónóm mò du yóm yó anì mowil le ne bud le mból talak tonok yóm kentihen kay ógóf ne yóm kentihen kay onuk koyu.

⁴ Tek hitu kdaw ne duen kehkulónu du. Ne yó kegenen mò du kmulón, botong fat folò butengen anì gotu meglà yóm kdéen mowil deng tehe nmou.”

⁵ Tahu se, gotu nmò Nuwa yóm kdê hmò Dwata du yó.

⁶ Bè yóm kehdunuk Dwata te tonok yó, deng nem latu ne halay Nuwa.

⁷ Yóm khuseken elem yóm kafal nmoen, mung du yehenen ne kem ngaen logi ne yó kem towuhen anì là glumfaken kul yóm tey dunuk yó.

⁸ Kentihen kay ógóf ne kentihen kay onuk koyu, yó kem ógóf gel dsù le ne yó kem là gel dsù le du, gotu le mógów bè Nuwa,

⁹ ket ne stengeb kmò khusek le elem yóm kafal, lómón yóm deng hmò Dwata du.

¹⁰ Timbow deng hitu kdawen bè yó, msut se yóm tey dunuk.

¹¹ Bè yóm ksuten, deng nem latu ne halay Nuwa. Msut yóm dunuk bè yóm gesfoloen hitu kdaw bè yóm gewuhen bulón. Yó kmoen, tódô semfut gu lem tonok yóm tey él nô fi laan tonok ne sen-gengen se sut yóm tey kulón bong.

¹² Tódô knoyungen fat folò buteng mò du kmulón.

¹³ Bè yóm kdaw khusek Nuwa elem yóm kafal yó, mung du yehenen ne yó kem ngaen logi, le Sém ne Ham ne Jafit ne yó kem towuhen.

¹⁴ Ne mung kul kentihen kay ógóf, yó kem ógóf tnomò ne yó kem ógóf nô lem bnes, kewóten bè yó kem lebangen kkólen bè yó kem leneken ne kentihen kay onuk koyu, gotu mung kul.

¹⁵ Ket ne stengeb bè ket kay yó kem mowil te tonok, gotu mung ke Nuwa elem yóm kafal nmoen,

¹⁶ hol lómón yóm deng hmò Dwata du. Timbow deng kól lemen Nuwa, omin Dwata tmikeb du bak dól yóm kafal yó.

¹⁷ Ngangen mò du dmunuk efet fat folò butengen, ya tey kngelem yóm él efet tódô lemtów yóm kafal.

¹⁸ Tódô sónmoen minut nelem yóm él efet tódô mung bè lewók yóm kafal yó.

¹⁹ Ngangen mò du ne yóm él efet là bud tonem du ne yó kem bulul hol geta.

²⁰ Ngangen efet hitu mitru nuléhen ta yó kem bulul geta.

²¹ Tódô kdê yó kem mowil talak tonok gotu le matay. Kdê kem onuk koyu ne kdê kem ógóf ne kdê kem tau gotu le matay.

²² Tódô kentihen mowil talak tonok gotu le matay.

²³ Gotu genlà Dwata kdéen mowil talak tonok, kdéen tau ne kdéen ógóf ne kdéen onuk koyu. Tek són Nuwa dù tebel ne yó kem mung du elem yóm kafalen.

²⁴ Botong lematu bud limu folò butengen kegenen wen él te tonok.