Tekang Kbuten 47 - Udél Dwata: Gna Kesfasad ne Lomi Kesfasad

¹ Omin Jusif mit limu bè yó kem dumuhen setwoli etu bè Faro. Yó monen mò du, “Deng le gdek le mà ne yó kem dumuhu setwoli lemwót le gu bè Kanan. Deng gotu nit le yó kem ubiha le ne yó kem dumu ógóf le ne kdê yó kem dumu nfun le. Ne ni, deng le kól bè ni bè Idyip, nô le bè benwu Gusén.”

² Ominen hdilô kul bè Faro yó kem dumun setwoli mung du.

³ Ne snólók Faro lu, monen, “Tedu se kuy gel nmò du?” Mon le se, “Gel me semgyok ubiha, lómón yóm kul gel nmò yó kem tehe fù me.

⁴ Hlun me mógów edini abay se tey bitil bong bè yóm kum benwu bè Kanan. Laen dù gónó me hótób yó kem ógóf me. Ke yó yóm hyu béléem, suem mi bè Gusén.”

⁵ Ne yó mon yóm Faro mò ke Jusif, “Tey hyu yóm kegdek le bè ni le maem ne yó kem dumuhem setwoli.

⁶ Yóm benwu Idyip hol lómón ke kul funen. Suem lu bè Gusén bè yóm gónón alì hyu tonoken. Ke wen bélê le alì hulung semgyok safì, hesegyokem kul yó kem dou safì.”

⁷ Omin Jusif hdilô ke maen bè Faro. Yóm kdà Jakub bè yó, yó monen mò ke Faro, “Dwata he hol tmóbóng kóm.”

⁸ Ne snólók Faro Jakub, monen, “Deng hilu ne halayem?”

⁹ Mon Jakub se, “Yó deng kegenu tau deng lematu bud tlu folò halayu, bede tauhe menwu mógów se dou. Là kóen tahà yóm dou klowil ne tey dê gónón mgel. Là mkélen bè yó kem fuu ekni, tey tahà yóm kul klowil.”

¹⁰ Omin Jakub mbal lemwót, bud monen mò ke Faro, “Dwata he hol tmóbóng kóm.”

¹¹ Tahu se, sù Jusif le maen ne yó kem dumuhen setwoli bè yó bè Idyip, suen lu bè yóm gónón alì hyu tonok moni bè syudad Ramisis, hol lómón yóm deng mon Faro mò du.

¹² Tendo wen ken gel blay Jusif ke maen ne yó kem dumuhen setwoli ne yó kem dumu fes lówó le efet kól bè yóm hol són imot bélê le.

Kbel bitil bong

¹³ Ngangen mò du mbel bitil bong efet laen dù bud ken bè klamangen ne là bud le mgel yó kem tau bè Idyip ne bè Kanan lemwót bè kbitil le.

¹⁴ Bè yóm gel kebli le ken yó kem tau, gotu sentifun Jusif yó kem filak gel bli le ne niten ebè gónô bong yóm Faro.

¹⁵ Timbow deng gotu filak yó kem tau bè Idyip ne tau bè Kanan, gotu le mógów ebè Jusif yó kem tau Idyip ne mon le mò du, “Ó Sér, hol benlayem mi ken. Béem hlus mi matay. Holi mebel kut lan, bà mon deng gotu filak me.”

¹⁶ Bnalà Jusif se lu, monen, “Ke laen se dù bud filak ye mò bli ye ken, nwit ye edini ógóf ye mò luluken.”

¹⁷ Tahu se, gotu nwit le ebè Jusif yó kem ógóf le ne benlayen lu ken mò luluk yó kem kudà le ne kem ubiha le ne kem kambing le ne kem safì le ne kem kudà asnu le. Bè yóm halay yó, gotu lenuluk Jusif ken yóm kdê ógóf le.

¹⁸ Timbow deng mfu yóm halay yó omin le bud mlóy ebè Jusif, mon le mò du, “Ó Sér, laen dù bud bnos me béléem. Deng gotu filak me ne deng gotu kól béléem kdê ógóf me. Laen dù bud dumu bli me béléem són lówó me ne són tonok me.

¹⁹ Béem hlus mi matay, holi mebel kut lan. Ne hol béem bayà se tonok me. Tódô benlihem lówó me ne tonok me mò luluk me ken. Ke yó se nmoem, baling me ghesek bè Faro ne du mfun yó kem tonok me. Benlayem mi ken anì là matay me lemnus ne bud benlayem mi bnék anì wen hulu me bè yó kem dnadu me.”

²⁰ Tahu se, gotu benli Jusif klamang tonok bè Idyip mò nfun Faro. Tódô kdê yó kem tau Idyip gotu hbalù le tonok le, bà mon yóm tey bitil bong. Ne baling ke Faro ne funen yóm kdê tonok le.

²¹ Gotu le baling hesek bè Faro yóm kdéen tau bè klamangen Idyip.

²² Són tonok là benli Jusif du, són yóm kul tonok yó kem tau gel demsù ebè yóm kul dwata lennged bè yó bè Idyip. Là hbalù le du yóm kul tonok abay se tendo wen ken gel blayen kul yóm Faro mò lowil le.

²³ Yó mon Jusif mò yó kem tau, “Ngem, deng benlihu yu mò nfun yóm Faro, gomong tonok ye. Ni wen bnék mò hulu ye bè kem dnadu ye.

²⁴ Ke sok bang ye muta, nbad ye Faro bad limu. Yóm dù tebel bélê ye mò bnék ye ne mò ken ye dalang se yó kem fes lówó ye.”

²⁵ Bnalà le se, mon le, “Deng hlowilem mi, Sér. Tey hyu yóm nmoem bélê me. Tódô me baling hesek bè Faro ne ni.”

²⁶ Duhen yó, wen udin nmò Jusif bè klamangen Idyip, duhen yóm keblay le du bè Faro yóm glimu yóm gel nuta le. Nim udin nmoen ni, là kóen lana efet nim kmoen ni. Són tonok là gfun Faro du, són yóm kul tonok yó kem tau gel demsù ebè yóm kul dwata kéng bè yó bè Idyip.

Yóm eles tinok Jakub bè Jusif

²⁷ Deng le tódô menwu bè Gusén ne yó kem tau Israél, yóm benwu snakuf Idyip. Deng tey wen kendengen le bè yó ne deng tey kból le.

²⁸ Yó kegen Jakub menwu bè Idyip, botong sfolò hitu halayen. Setnù halay deng kegenen tau, lematu bud fat folò hitu halayen.

²⁹ Bè yóm kdaw móyón katayen htabahen Jusif, yóm ngaen ne monen mò du, “Ó Ngà, suem lem blóng hahahu henmuem safaem béléu yóm là kebengem dou bè ni bè Idyip.

³⁰ Yó nóyóu ke hol lebeng ye ou ditu bè yóm tehe gónón lebeng kem fuu. Nit ye hewà bè ni bè Idyip lówóhu, hol lebeng ye ditu bè yóm tehe gónó le lembeng kul.” Mon Jusif se, “Nmou béléem, Mà, yóm monem mò dou yó.”

³¹ Bud mon Jakub, “Smafai kun ke tahu yóm monem mò dou yó.” Tahu se, smafà Jusif. Ne tódô dóyón Jakub Dwata bè yóm gónón nô.