Tekang Kbuten 41 - Udél Dwata: Gna Kesfasad ne Lomi Kesfasad

Ktulón Jusif lan kna yóm Faro bè Idyip

¹ Timbow deng bud lewu halayen bè yó, wen kna yóm Faro bè Idyip. Yó knahen, mdà bè kilil yóm tey él bong boluyen Nayl.

² Tódô tonen wen hitu kem safì mabù tilob klówó le hesut gu lem él na le e mótób te kembu.

³ Ominen bud mton hitu kem safì kmangkang tmodol hesut huli gu lem yóm él yó. Gotu le sedà bè yóm hitu kem safì mabù mdà bè yó te kembu.

⁴ Lemwót yó kem safì kmangkang, gotu ken le yó kem safì mabù. Omin Faro btik.

⁵ Ne ominen bud tungô ne bud wen knahen. Yó knahen, wen sotu tinu halay tonen botong hitu kanguyen bede tey mfól bunguhen.

⁶ Ominen bud wen hitu kanguy halay tonen msut huli okóm hono kafa lemwót bè yóm tey lenos kinì gu dmata kdaw.

⁷ Lemwót yóm hitu kanguy halay kafa yó, gotu hlo le yóm hitu kanguy halay alì mfól bunguhen. Omin Faro bud btik ne yó he kehetngónen olo knahen yóm yó.

⁸ Timbow hlafus bè yó, sónmoen tafa nawahen. Yó nmoen, gotu hangayen yóm kdéen tau demwata bè klamangen Idyip ne yó kem tau hulung tmulón lan kna. Gotu tulónen kul yó kem knahen okóm balù sotu bélê le ke gembek tmulón du lan yó kem knahen yó.

⁹ Ominen mudél ebè Faro yóm tau gel mkay ninum béléen, monen, “Ni he kegtulónen bè nawaw yóm tehe salau.

¹⁰ Tehe lenbutem mi lewu me yóm geta bè yó kem tau gel mò mambang béléem. Tehe heblangguem mi bè gónô yóm kfitan bè yó kem gel mentey kóm.

¹¹ Bè yóm sotu kifu, segeng me kemna yóm lewu me ne hono stólóng lanen yóm kna me.

¹² Bè yó lem gónô blanggù, wen logi Hibru lomi lemnok dumu me geblanggù. Du se hesek yóm kfitan bè yó kem tau gel mentey kóm. Tulón me du yóm kna me, gotu tulónen kum se yó kem lanen.

¹³ Yóm ktulónen du kum yó, tódô uliten du. Ngem sem nim dou, bud hulékem ou bè yóm sana dou nmò ne yóm geta bè yó kem tau gel mò mambang béléem fen heklengem liholen.”

¹⁴ Bè yóm kungol Faro du yóm yó, tódô kendel hangayen Jusif lem gónô blanggù. Tahu se, kendel heslò hewà le Jusif lem gónô blanggù. Yó nmò Jusif nan gna nki bngeten ne tenlesen nesen, ominen yó mógów ebè Faro.

¹⁵ Timbow kól béléen Jusif, mon Faro mò du, “Wen knahu, okóm laen dù tau gembek tmulón du dou lanen. Deng wen tmulón du dou gbekem tmulón lan kna kun.”

¹⁶ Omin Jusif malà du, monen, “Là. Tek són Dwata gembek tmulón du kóm lan yóm knahem anì hol gsengel nawahem.”

¹⁷ Omin Faro bud mon du, “Yó knahu, mdae bè kilil él Nayl

¹⁸ ne tódô tonu hitu safì mabù tilob klówó le hesut gu lem él na le e mótób te kembu.

¹⁹ Ominu bud mton hitu safì kmangkang hesut huli gu lem él. Yóm tey keklangkang yó kem safì yó, là deng hnikót tonu du he bè klamangen Idyip.

²⁰ Lemwót yó kem safì kmangkang gotu ken le yó kem safì mabù

²¹ okóm sana keklangkang le, laen kô ili le. Ne ominu btik.

²² Ne bude tungô bè yó ne bud wen knahu. Knahu wen sotu tinu halay tonu botong hitu kanguyen bede tey mfól bunguhen.

²³ Ominu bud mton hitu kanguy halay hesut huli bede hono kafa lemwót bè yóm tey lenos kinì gu dmata kdaw.

²⁴ Okóm yóm kanguy halay kafa yó, gotu hlo le yóm kanguy halay alì mfól bunguhen. Deng tulónu yó kem tau demwata ni kem knahu ni okóm laen dù bélê le gembek tmulón du dou lanen.”

²⁵ Ne yó mon Jusif mò ke Faro, “Yóm lewu knahem yó, tek sotu tulónen, eles hetngón Dwata kóm yóm angat nmoen.

²⁶ Yóm hitu safì mabù tilob klówó knahem, hnigaden hitu halay. Ne senged se yóm hitu kanguy halay tey mfól bunguhen, bud hitu halay snéen hnigaden. Tek sotu tulónen.

²⁷ Yóm hitu safì kmangkang hesut huli ne yóm hitu kanguy halay kafa, yó hnigaden hitu halayen kegenen mbel bitil bong.

²⁸ Yó se yóm monu mò kóm, eles hetngón Dwata kóm yóm angat nmoen.

²⁹ Lenwóten ni, hitu halayen kegenen gengón nuta bè klamangen Idyip.

³⁰ Okóm kogolen bè yó, hitu halayen se kegenen mbel bitil bong. Lemwót bè yóm tey ksideken yóm bitil bong yó, botong klifót le yó kem halayen tehe tey bong nuta le.

³¹ Yóm halayen alì bong nuta le, balù udì ke gtulón nawa le, bà mon yóm tey sidek alì kbel bitil.

³² Yó gónó Dwata hekna kóm lewu dulék anì tngónem yóm hol kehdohoen du yóm knahem ne là buden legen ne ksuten.

³³ Ne ni, hyu ke elesi mélék sotu tau hulung hedem ne hulung hemlan mò gónóm smalig du yóm klamangen benwu Idyip.

³⁴ Ne budi mélék kem tau, nmoem glal le mò fen semtifun badem bè yó kem nuta tau lem yóm hitu halayen kegenen bong nuta. Yó kmò kbad le kóm yó kem tau, bad limu.

³⁵ Gotu hestifunem kul yó kem yó yóm igoen tolo bong nuta, ne benlayem lu kwalis hdà bediga bè ket syudad glem lem nim benwu nogotem ni mò gónó le semtifun du ne mò gónó le mentey du.

³⁶ Yóm bad hestifunem kul yó, mò ken yó kem tauhem bè yóm igoen mbel bitil bong lem yóm hitu halay bè ni bè Idyip anì yó, laen dù tau matay lemnus.”

Kbaling Jusif gubérnor bè Idyip

³⁷ Tahu se, tey kehyu nawa Faro du ne yó kem genlalen yóm atul Jusif yó.

³⁸ Ne yó monen mò yó kem genlalen, “Laen dù dumu tau ton tekuy ke mkél ke Jusif, yóm tau tendo nô béléen Tulus Dwata.”

³⁹ Ominen mon du mò ke Jusif yóm Faro, “Deng gotu hetngón Dwata kóm yóm kdéen ni. Yó gónóm mon, laen dù tau ke mkél kóm bè yóm khulungem hedem ne khulungem hemlan.

⁴⁰ Nmou uu mò snaligu bè klamang nim benwu nogotu. Ne kdê yó kem tauhu, gotu nimón le uu ke wen hloloem kul. Yóm glal blayu kóm ni, hol smugung béléu.

⁴¹ Ne ni, nmou uu gubérnor bè klamangen Idyip.”

⁴² Omin Faro mlus yóm tising bè tdoken, yóm tising gónón nô yóm kun ilô ne lahuhen bè tdok Jusif. Ne wen nes alì tilob heseken du ne bud lahuhen bè lihol Jusif yóm lieg blówón.

⁴³ Ominen hsakay du bè yóm klisa gónón gel smakay yóm tau hol smugung béléen ne hyu wen kem sendalù genlal tukô gna du, bede mensag le, mon le, “Gnawang ye lanen dé. Gnawang ye lanen dé.” Yó se kmoen yóm kehbaling Faro ke Jusif gubérnor bè klamangen Idyip.

⁴⁴ Yó bud monen mò ke Jusif yóm Faro, “Ou se yóm Faro. Okóm nbuten ni, laen dù nmò yó kem tau bè klamangen Idyip ke là mlanen béléem.”

^45-46 Hyu wen boluy tau Idyip boluyen ke Jusif yóm Faro yó. Yó boluyen du, Safinat Paniya. Ne hyehenen du yóm ngà Putifira libun boluyen Asinat. Yó kun gel nmò Putifira, du se sotu tau gel demsù ebè yó kem kul dwata lennged yó kem tau Idyip ne nô bè yóm syudad boluyen Hiliyupulis. Deng tlu folò ne halay Jusif yóm kbut kmoen nmò bè yóm Faro bè Idyip. Lemwót Jusif bè yó bè gónô Faro, gotu nauyen yóm kdéen benwu glem lem Idyip.

⁴⁷ Lem yóm hitu halay alì bong nuta le, ya tey kbungu yóm kdéen hulu.

⁴⁸ Bè ket syudad, sal gel wen hdà Jusif bediga mò gónóhen semtifun yó kem bad yó kem tau mò hulu hmilol kul.

⁴⁹ Tey genged nuta sentifun le, botong là bud gbek Jusif msó kul. Lómón kwenen helek bè kilil mohin.

⁵⁰ Gu laanen là deng mbut mbel bitil bong, deng lewu ne ngà logi Jusif bè Asinat yóm tuha libunen.

⁵¹ Yó mon Jusif, “Deng heklifót Dwata dou ne yó kem tehe gónóhu glayam ne yóm khahuu bè yó kem fes lówó mà.” Ne yó gónón moluy du Manasi yóm ngaen twogu.Yó bud monen, “Deng benlay Dwata ou ngà bè nim benwu gónóhu glayam.” Ne yó gónón moluy du Ifraim yóm gewu ngaen.

⁵² Yó bud monen, “Deng benlay Dwata ou ngà bè nim benwu gónóhu glayam.” Ne yó gónón moluy du Ifraim yóm gewu ngaen.

⁵³ Ngangen ne mfu yóm hitu halay alì kwen nuta bè klamangen Idyip.

⁵⁴ Ominen yó mbut yóm hitu halay kbel bitil bong, tódô uliten du yóm tehe eles kmon Jusif du. Yóm kbel bitil bong yó, botong gomong kdéen tólóng benwu hmilol kul. Okóm bè klamangen Idyip, hanà tolo wen ken le.

⁵⁵ Timbow gefet bè yó kem tau bè Idyip yóm bitil, tek són Faro ne henlóy le. Lemwót yóm Faro, bud dóken lu ebè Jusif, monen mò kul, “Yó se mon Jusif mò kuy, yó se nmò ye.”

⁵⁶ Ngangen ne temnù ksideken yóm bitil bong efet gefet bè klamangen Idyip. Yó nmò Jusif, lenungkaen ne kdéen bediga bè klamangen Idyip ne heblihen ken yó kem tau Idyip.

⁵⁷ Ngangen ne kdéen tau bè klamangen benwu gotu le mógów ebè Idyip na le e bemli ken bè Jusif, abay se deng glumfak bè klamangen benwu yóm tey bitil bong.