Tekang Kbuten 40 - Udél Dwata: Gna Kesfasad ne Lomi Kesfasad

Ktulón Jusif lan kna yóm lewu kem tau blanggù

¹ Sotu kdaw bè yó, wen lenbut yóm Faro bè Idyip bè yóm lewu kem tau snaligen. Yóm sotuhen, tau fen gel mkay ninum ebéléen ne yóm sotuhen, tau hol geta bè yó kem gel mò mambang béléen.

² Tey kebut Faro kul yóm lewu kem tau snaligen yó.

³ Tódô heblangguen lu bè yóm sotu gónô blanggù bè gónô yóm kfitan gel mentey du, bè yóm gónón blanggù Jusif.

⁴ Tey kegen le nô bè yóm gónô blanggù yó. Yó nmò yóm kfitan, nmoen Jusif mò tóbóng lówó le.

⁵ Sotu kifu bè yó lem gónô blanggù, wen kna yóm tau tehe gel mkay ninum ne wen se kun kna yóm tau tehe geta bè yó kem gel mò mambang. Bede sal stólóng lanen yóm kna le.

⁶ Timbow hlafus bè yó, kól bélê le Jusif ne tonen yóm tey keblat nawa le.

⁷ Yó mon Jusif mò kul, “Moen du ke alì blat nawa ye kemdaw ni?”

⁸ Mon le se, “Sket kum wen kna me ne laen dù tau bè ni gembek tmulón du kum lanen.” Mon Jusif se mò kul, “Són Dwata gónón lemwót yóm khulung tau tmulón lan kna. Tulón ye dou kun yóm kna ye yó.”

⁹ Tahu se, tulón yóm tau tehe mkay ninum yóm kun kna, monen, “Yó dou kna, tonu tinu grép mteg bè soluhu,

¹⁰ tlu hangahen. Timbow nbuten dmoun, deng sana mung du bulóken ne sen-gengen se mungu ne kendel mélél.

¹¹ Ne deng eles nogotu se yóm kun tegayan Faro. Ominu ma yó kem bungu grép yó ne kenmesu elem yóm tegayanen ne oguhu du.”

¹² Mon Jusif se mò du, “Ni sii lanen yóm knahem yó. Yóm tlu hanga tonem, hnigaden tlu kdaw.

¹³ Tlu ni duen kehewà Faro kóm. Hnifóten uu ne bud huléken uu bè yóm nmoem. Angat bud gel oguhem du yóm tegayanen lómón yóm sana gel nmoem béléen.

¹⁴ Okóm ke dengi gewà ne deng bud hyu klowilem, hol béem abay klifót se ou ne hol gel tulónem ou bè Faro mò lanem tmóbóng dou anì gewae lem nim gónô blanggù ni.

¹⁵ Bè ktahuhen, tódô hnugus kenfô le ou bè kum benwu yó kem tau Hibru ne balù bè ni bè Idyip, tódô knukub le ou hkawang.”

¹⁶ Timbow gungol yóm tau tehe geta bè yó kem gel mò mambang yóm kehyuhen yóm kun lan kna yóm dumuhen, bud monen mò ke Jusif se kun, “Wen se dou kna. Knahu sensodò suduu yóm tlu lideng mambang.

¹⁷ Yóm lideng tofi ta, tódô kdê kay mambang nô lemen, nwitu ebè Faro. Yóm igou smudù du, tódô gotu sentukô yó kem onuk koyu.”

¹⁸ Mon Jusif se mò du, “Yó lanen yóm kóm kna, yóm tlu lideng yó, hnigaden tlu kdaw.

¹⁹ Tlu ni duen kehewà Faro kóm, okóm heklengen liholem. Ominen hetléwéng kóm bè koyu ne gotu senssék onuk koyu ungedem.”

²⁰ Tahu se, na a hto yóm tlu kdaw. Yó se yóm kdaw tehe ksut Faro. Wen tey ken bong nmoen bè yó kem genlalen. Bè yóm kdaw yó, hewà Faro yóm tau tehe gel mkay béléen ninum ne yóm geta bè yó kem gel mò mambang béléen, hdaen lu bè solu yó kem genlalen.

²¹ Ne bud huléken bè sana nmoen yóm tau gel mkay ninum béléen.

²² Okóm fen heklengen lihol yóm geta bè yó kem gel mò mambang. Yóm nmò Faro ni, tódô uliten du yóm tehe tulón Jusif kul.

²³ Okóm yóm tau gel mkay ninum yó, deng mom klifóten Jusif, balù udì ke bud gbel bè nawahen.