Tekang Kbuten 39 - Udél Dwata: Gna Kesfasad ne Lomi Kesfasad

Jusif ne yehen Putifar

¹ Bè yóm deng kwit le ke Jusif ebè Idyip yó kem tau Ismaél, bud hbalù le se kul bè yóm sotu tau boluyen Putifar yóm tau genlal yóm Faro bè yó. Yó glalen du, du kfitan bè yó kem tau gel mentey bè yóm gónô bongen.

² Bè yóm kbaling Jusif hesek bè Putifar tendo eles nô béléen Dwata, yó gónón hyu uléken bè ket yóm gel nmoen. Tódô nô bè yó bè gónô yóm tau Idyip amohen.

³ Tódô dilô yóm amohen yóm tendo knô Dwata bè Jusif ne yó gónón hyu uléken bè yóm ket gel nmoen bè yóm amohen.

⁴ Tey hyu nawa Putifar ebè Jusif, ne nmoen tóbóng lówó mò hol gfi béléen. Ne gotu hogoten du yóm kdéen tau mò nmò bè gónóen ne yóm kdê ngom nô lemen.

⁵ Lemwót bè yóm knô Jusif bè yó, tey któbóng Dwata du yóm tau Idyip gónóhen nô, gomong yó kem tau nogoten ne kdê yó kem ngom lem gónóen kkólen bè yó kem huluhen.

⁶ Tódô gotu hogot Putifar ke Jusif kdéen. Balù udì ke wen bud tnafa nawahen, olohen tódô hemdem kkenen. Yóm Jusif, tey knóón logi.

⁷ Timbow deng legen udì bè yó, deng mom niwol yehen Putifar Jusif ne tô nbóten.

⁸ Okóm là kóen móyô Jusif, monen mò du, “Hendemem dé, là bud wen tnafa nawa amohu du bè ni lem gónóen abay se nóe bè ni. Gotu hogoten dou kdéen.

⁹ Yóm kwalisen bè ni lem gónô, lómón yó se yóm dou kwalis, ne laen dù nalihen béléu, tek són uu yóm tuha libunen. Là kô gbeku du yóm sidek monem yó, tey salà bè Dwata yóm yó.”

¹⁰ Tódô ket kdawen gel tô mbót ke Jusif, okóm là kóen móyô Jusif stungô du. Balù kehlonihen ebéléen, là kô nmoen du.

¹¹ Sotu kdaw bè yó, husek elem gónô le Putifar Jusif, nmoen yóm sana kun gel nmò bè yó ne geslaen yóm klaen dù dumu tau gel mò nmò bè yó lem gónô.

¹² Tódô lemwót yehen Putifar nan e kenfô nogot Jusif bè nesen, monen mò du, “Mungi dou elem dfél.” Okóm mlóy Jusif ne hewà ne mlus béléen yóm lafin nesen fi ta, tódô gtebel lem hólól yóm libun.

¹³ Timbow ton yóm libun yó yóm lafin nes Jusif gtebel lem hólólen ne yóm klóyen ebè lewà,

¹⁴ tódô kendel tnabahen yó kem dumu tau gel mò nmò bè yó, monen mò kul, “Hnénég ye dé. Yóm tau Hibru nwit tuha logihu ebè ni, tey kehyaken tekuy. Tódô noloen ou ditu lem dfél, bede laen kô dù gmoen abay se tey klangatu.

¹⁵ Bè yóm kungolen du yóm langatu, tódô mlóy hewà ne gtebelen béléu nim lafin nesen nii.”

¹⁶ Lemwót yóm libun yó, henyuhen yóm nes Jusif efet kól tuha logihen, yóm amo Jusif.

¹⁷ Timbow kól, bud senged se tulónen du, monen, “Yóm tau Hibru hesek nwitem ebè ni, deng noloen ou lem dfél, tô henyaken ou.

¹⁸ Okóm timbowe lemangat, tódô kendel mlóy hewà ne gtebelen béléu yóm lafin nesen fi ta.”

¹⁹ Unihen mungol du yóm amo Jusif yóm tulón tuha libunen, ya tey kebuten.

²⁰ Tódô hekfóen Jusif, tenesen lem yóm sotu gónô blanggù gónón gel tmafak tau yóm tau hol geta bélê le. Ne bè yó gónó Jusif nô.

²¹ Bede là kô tnagak Dwata ke Jusif, tendo tnóbóngen. Ne yó gónón hyu nawan ebè Jusif yóm tau mentey gónô blanggù.

²² Ne deng mom hogoten du yó kem dumu tau blanggù. Són Jusif fen mogot du balù kihu nmò le bè yó lem gónô blanggù.

²³ Là kóen tafa nawahen du yóm hogoten ke Jusif yóm tau mentey gónô blanggù yó abay se tendo nô bè Jusif Dwata. Balù kihu nmoen, sal hyu uléken.