Tekang Kbuten 38 - Udél Dwata: Gna Kesfasad ne Lomi Kesfasad

Juda ne Tamar

¹ Bè yóm kmoen yó, tnagak Juda yó kem dumun setwoli logi, ne mili etu bè benwu Adulam bè yóm tau boluyen Hira.

² Bè yóm knóen bè yó, wen libun Kanan tonen yóm ngà Suha libun ne yehen le du.

³ Mlutut yóm libun yó ne mngà logi, ne yó boluy Juda du Ir.

⁴ Ominen bud mngà logi bè yó Juda, yó boluyen du Unan.

⁵ Ne tikóng bud mngà logi bè getluhen, yó boluyen du Sila. Bè yóm ksut Sila, tolo le nô bè yóm benwu boluyen Kisib.

⁶ Tikóng deng bong Ir yóm ngaen logi twogu, omin Juda hyehen du bè yóm sotu sawang libun boluyen Tamar.

⁷ Okóm yóm Ir, nmoen yóm tey sidek bè kton Dwata du, ne yó gónó Dwata ma klowilen.

⁸ Ne yóm mon Juda mò ke Unan, yóm dumun sulil-lem Ir, “Yehenem Tamar, lómón yóm deng monen bè hlau tekuy gbak bè dumun sulil-lem yóm tau deng matay. Yóm gna ngaem béléen ke Ir funen.”

⁹ Okóm lemwót bè yóm deng ketngón Unan du angat là kun du funen yóm ngà, yó nmoen ke sentungóen Tamar, là heflósen du yóm él gu béléen, mom hetdaken ebè tonok anì là mngaen mò nfun yóm dumun sulil-lem.

¹⁰ Okóm yóm nmò Unan yó, tey sidek kton Dwata du, ne yó gónó Dwata ma klowilen.

¹¹ Omin Juda mon du mò ke Tamar yóm towuhen, “Muléki ebè kem tuhahem, ne béi tagad myehen efet kbong Sila yóm ngau logi mò bud yehenem.” (Yóm udélen yó, là kóen nô bè nawahen, abay se likò déke bud matay Sila, mkél bè yó kem twoguhen.) Tahu se, mulék ebè kem tuhahen Tamar.

¹² Nahen legen bè yó, matay yehen Juda. Tikóng deng yóm kdaw klangag Juda du, lemwót Juda lewu le ween Hira yóm tau Adulam, mógów le ebè Timna na le e nauy yó kem tau gmunting bul yó kem ubihahen.

¹³ Wen tmulón du ke Tamar yóm deng knô tuónen logi bè Timna, nauyen yó kem tau gmunting bul yó kem ubihahen.

¹⁴ Deng eles tngón Tamar deng bong logi Sila, okóm là kô dog htaba le du mò yehenen. Yó nmoen, tenlesen yóm nes libun bolu leseken anì laen dù dmilô du. Ominen myón bè kilil yóm lan husek elem benwu Inaim yóm lan mógów ebè Timna.

¹⁵ Tikóng ton Juda bè yóm kiusen klohoken, hendemen libun hdóyón, abay se lenimunen lem uyóhen.

¹⁶ Ominen hloni ebéléen, nbóten stungô, là kô dog dilóen du ke towuhen. Yó snólók Tamar béléen, monen, “Hilu de bayadem dou?”

¹⁷ Yó fasad Juda du, monen, “Henwitu uu ngà kambing lemwót bè yó kem ógófu.” Yó bud snólók yóm libun yó, monen, “Gónóhu hemtahu du du yóm angat hol kdohò yóm blayem dou?”

¹⁸ “Tedu se nóyóem du?” mon Juda. Bnalà yóm libun, monen, “Blayem dou yóm tising gónón nô ilóem mung du féten ne yóm tuged nogotem.” Tahu se, blay Juda du yóm hnihen yó, ominen semtungô du ne mlutut Tamar.

¹⁹ Kogolen bè yó, mulék ebè benwuhen Tamar, ne kóhen yóm nes limunen lem uyóhen, ne bud tles leseken yóm nes libun bolu, lómón yóm deng gel nmoen.

²⁰ Tikóng hfeted Juda ke ween Hira yóm tau Adulam, yóm ngà kambing tehe fasaden du, ne anì bud nwahen yó kem deng hlun suen béléen, okóm là kô bud ton Hira ke Tamar.

²¹ Omin Hira smólók yó kem logi menwu bè yó, monen mò kul, “Gónón nô yóm libun hdóyón tehe myón bè yóm kilil lan husek bè nim benwu ni?” Bnalà le se, mon le, “Laen dù libun hdóyón bélê me bè ni.”

²² Duhen yó, bud semfulék ebè Juda Hira, ne tulónen du yóm là ktonen du, ne yóm mon yó kem tau bè yóm benwu yó laen dù libun hdóyón bè benwu le.

²³ Yó mon Juda, “Mò kun ne yó kem deng hlun nô béléen yó. Denge se hemwit ebéléen kambing, okóm là se tonem du. Ke bud hnebel te, déke mom knuli le tu yó kem tau.”

²⁴ Timbow deng tlu bulónen bè yó, wen tmulón du ke Juda deng mlutut Tamar yóm towuhen, ngaen bè kehdóyónen. Hetê Juda, monen, “Nwit ye hewà, ntem ye.”

²⁵ Okóm yóm igò le mit du hewà anì hnatay le, wen udél hwiten ebè tuónen, monen, “Yóm tau fun nim tising wen ilóen nô du ni, ne fun nim tuged ni, du se mà nim ngau. Dilóem kô?”

²⁶ Tódô dilô Juda kun funen ne yó monen, “Kun ktahu se yó, abay se là dnohou du yóm tehe fasadu du bè yóm tô kehyehenu du bè ngau Sila.” Okóm là kô bud sentungô Juda ke Tamar ne.

²⁷ Timbow kól bè yóm kdaw ksut ngà Tamar, lewu yóm ngaen logi.

²⁸ Bè yóm tolo kkuleng le, gna sut henmù yóm sotu ngà. Yó nmò yóm libun mwa ngà, wen tnikel hulô féten bè sigel yóm ngà yó, ne monen, “Du se gna sut.”

²⁹ Okóm bud hulék yóm ngà yó henmuen, ne mom yóm gewuhen yóm gna sut. Yó mon yóm libun mwa ngà, “Étey, kmoem du du ke gnahi hewà se kóm?” Ne yó gónó le moluy du Pérés yóm ngà sut yó.

³⁰ Ominen sut se kun yóm ngà wen tnikel hulô bè henmuen, ne yó boluy le du, Sira.