Tekang Kbuten 37 - Udél Dwata: Gna Kesfasad ne Lomi Kesfasad

Jusif ne yó kem twoguhen

¹ Tódô khenek Jakub bè benwu Kanan bè yóm benwu tehe maen.

² Ne ni se tutul yó kem fes lówóhen. Wen sotu ngà Jakub logi boluyen Jusif ne deng sfolò hitu ne halayen. Yó gel nmoen, gel mung hótób ubiha ne kambing bè yó kem twoguhen, yó kem ngà yó kem libun nmu maen, le Bilha ne Silpa. Ne gel tulón Jusif ke maen yóm sidek gel nmò yó kem twoguhen.

³ Bè kdê yó kem ngà Jakub, Jusif yóm alì kenbong nawahen abay se ngaen bè yóm deng ktuhahen. Wen nes tahà tilob hetbé Jakub bè Jusif.

⁴ Timbow ton yó kem twoguhen yóm alì kbong nawa mà le ke Jusif senta yóm kbong nawahen kul, deng mom knutó nawa le Jusif, sónmò le hemskong du.

⁵ Sotu kifu bè yó, kemna Jusif. Ne bè yóm ktulónen du bè yó kem dumuhen setwoli yóm knahen, deng mom bud temnù kutó nawa le du.

⁶ Yó kna tulónen kul, monen, “Ngem, wen knahu.

⁷ Knahu gotu benkes tekuy yó kem halay deng kut gnalab bè uma kun. Okóm yóm dou halay benkes, tódô mdà ne fen kudung gu hilolen yó kem kuy halay benkes.”

⁸ Omin le mon du mò ke Jusif yó kem twoguhen, “Ofo kóm kô ke uu geta bélê me mò mogot kum?” Ne mom milud kutó nawa le ke Jusif lemwót bè yóm knahen yó ne bè yóm gel ktifuen kul.

⁹ Sotu kifu bè yó, bud kemna Jusif ne bud tulónen yó kem twoguhen, monen, “Wen bud knahu. Tonu kdaw ne bulón ne sfolò sotu blotik, gotu le kóem hegdufok ebéléu.”

¹⁰ Ne ominen bud tmulón du ke maen yóm knahen yó ne mom nudél maen, monen, “Kna du de yóm knahem yó? Mone gotu me hegdufok ebéléem ne kô, ou ne yéem ne yó kem dumuhem setwoli?”

¹¹ Ya tey kélés nawa le du yó kem twoguhen okóm ke maen kun, sónmoen hemdem du ke tedu lanen yó kem knahen yó.

Kehbalù le ke Jusif ebè Idyip

¹² Sotu kdaw bè yó, nô le ditu bè Sékém yó kem twogu Jusif na le e hótób yó kem ógóf mà le.

¹³ Yó mon Jakub mò ke Jusif, “Ó Jusif, mógówi etu bè Sékém bè yóm gónó le hótób ógóf yó kem twoguhem.” Mon Jusif se, “Yó sen.”

¹⁴ Yó mon maen mò du, “Nam e nauy lu ke laen du hemen le dalang se yó kem ógóf bnentey le. Bede budi mulék anì tngónu.” Tahu se, hewót maen Jusif bè yó bè Datal Hibron.

¹⁵ Tikóng kól bè Sékém Jusif, sónmoen tendo semidok mebel kul yó kem twoguhen. Yóm igoen mebel kul, wen tau mton du ne snólóken Jusif yóm tau yó, monen, “Tedu hnebelem?”

¹⁶ Mon Jusif se, “Hnebelu kem twoguhu, tehe le hótób ógóf dini. Tngónem kô gónó le nô?”

¹⁷ Monen se yóm tau yó, “Deng le lemwót eginu. Gungolu mon le mógów le ebè Dutan kun.” Tahu se, ktes Jusif lu etu bè Dutan ne tonen lu.

¹⁸ Hanà tolo mayuk Jusif, deng sana ton yó kem twoguhen ne gu laanen là deng kól bélê le, deng sana sensatul le yóm kmò khatay le du.

¹⁹ Yó mon le, “Deng myó yóm tau gel kemna.

²⁰ Yó ne hnatay tekuy, omin kuy mbot du elem tum sotu kokol nelem deng kti. Omin tekuy mon du deng nsék ógóf lóbô lem bnes. Hnénég te kun ke tahu yóm gel knahen.”

²¹ Gungol Rubén yóm sensmon le yó ne bnólówen lu, monen, “Bê. Bê tekuy hnatay.

²² Olo ye tódô mbot du elem tum kokol ngelem deng kti bè yóm benwu laen hol wen tauhen. Bê kuy mom hensidek.” Yó gónón mon du yóm yó mò tô lanen hewà ke Jusif bélê le anì bud huléken ebè mà le.

²³ Timbow deng gefet bè kem twoguhen Jusif, tódô ktos le bè lówóhen yóm nes tahà tilob leseken.

²⁴ Omin le mit du ebè yóm sotu kokol nelem deng kti ne bot le elemen.

²⁵ Bè yóm igò le tolo mken tódô ton le yó kem tau stodol mógów gu ditu, hono kem tau mit udél swa semfu gu bè Ismaél. Bè yóm kógów le yó, lemwót le gu bè Gilyad mógów le ebè Idyip. Sket lenulón le yó kem kamél yóm kdê kay som gel hbalù le ne yó kem litok koyu gel nmò bulung ne nmò yó kem hboo alì tilob boohen.

²⁶ Omin Juda mudél ebè yó kem dumuhen, monen, “Laen dù ofol te lemifut hmatay du yóm kut dumu setwoli.

²⁷ Mom hyu ne ke tódô hbalù tekuy bè yó kem tau Ismaél mit udél swa yóó. Bê tekuy mom mò sidek béléen igoen du hol twoli kuy, kut unged se yó ne kut litô.” Tahu se, tódô kdê le gotu mung du yóm atulen yó.

²⁸ Ne timbow le kól bè yó, yó kem tau gel mit udél swa yó koni, lemwót yó kem twogu Jusif senkteng le Jusif gu lem yóm kokol nelem ne hbalù le bè yó kem tau mit udél swa bè lewu folò botù blówón bukay. Lemwót se kul yó kem tau mit udél swa yó, hlós nit le Jusif ebè Idyip.

²⁹ Timbow tô bud nauy Rubén yóm kokol ngelem tehe gónó le mbot ke Jusif, là kô bud tonen du bè yó. Tódô kenséen yóm nes bè lówóhen botong ksidek kegnómen du.

³⁰ Ominen semfulék ebè yó kem twolihen ne monen mò kul, “Là bud tonu du yóm ngà. Tedu se tô nmou ni du?”

³¹ Omin le sembalì sotu ngà kambing ne leneb le bè litóen yóm nes Jusif.

³² Ne nwit le mulék ebè mà le ne mon le mò du, “Ó Mà, lómón tô nes ngaem Jusif nim ton me nii.”

³³ Ne tódô dilô tuha logi se kun, monen, “Tahu se, kun nes nim ni. Deng wen ógóf lem bnes msék du. Deng tahu wen ógóf msék du yóm ngau Jusif.”

³⁴ Tódô kensê Jakub yóm nes bè lówóhen bè klangagen ne tles leseken nes sakù. Ne tey kegenen tendo lemangag du yóm ngaen yó.

³⁵ Tódô kdê yó kem ngaen logi ne ngaen libun tô mifa du, okóm là kô dog hnungolen kul, monen, “Tódô senflósu ne lemangag du yóm ngau efet katayu.” Tahu se, là kóen mkó bè nawahen yóm klangagen ke Jusif yó.

³⁶ Ne ditu bè Idyip, lemwót yó kem tau mit udél swa yó koni, bud hbalù le Jusif bè Putifar yóm sotu tau genlal yóm Faro bè Idyip. Yó glalen, du kfitan bè yó kem tau gel mentey bè gónô bong yóm Faro.