Tekang Kbuten 35 - Udél Dwata: Gna Kesfasad ne Lomi Kesfasad

Yóm bud kolu Dwata ke Jakub bè Bétél

¹ Yó udél Dwata ebè Jakub, monen, “Ó Jakub, géhéli mili ebè Bétél ne menwuhi bè yó. Budi semsodò botu mò gónóm demsù ebéléu bè yó. Ou se yóm Dwata tehe hegfan béléem bè yóm tehe kehlóyem hlayuk bè twoguhem Iso.”

² Tahu se, lemwót Jakub ne yó udélen ebè yó kem fes lówóhen ne ebè kdê yó kem tau nô béléen, monen, “Gotu kó ye yóm kdéen dwata lennged lemwót bè tólóng benwu deng nô bélê ye. Dyo ye anì mólós ye ne lesek ye yóm nes mólós mò gónó ye hegfan du tek són Dwata yóm hol nimón ye.

³ Mdó tekuy bè ni,” mon Jakub, “ne mógów tekuy etu bè Bétél. Bè yó gónóhu mò du yóm mò gónó demsù ebè Dwata, yóm Dwata tehe tmóbóng dou bè yóm tehe kwen gfau, ne deng eles tendo nô béléu snéen kihu gónóhu e solu.”

⁴ Tahu se, gotu blay le ke Jakub kdéen dwata lennged nô bélê le lemwót bè tólóng benwu ne kdê yó kem tdé le, gotu lebeng Jakub lu laan yóm koyu boluyen ok moni bè Sékém.

⁵ Bè yóm kdó Jakub ne yó kem ngaen logi bè yó bè Sékém, là kô ktes le kul yó kem tau hmilol bè yó abay se wen tey klikò le lemwót bè Dwata.

⁶ Bè yóm kewót le Jakub ne yó kem tauhen, ngang le mógów efet le kól bè yóm benwu boluyen Lus. Ne ni kmoen ni, yó boluyen yóm benwu yó, Bétél, benwu snakuf Kanan.

⁷ Omin Jakub semsodò botu bè yó mò gónón demsù ebè Dwata ne yó boluyen du yóm benwu yó, “Bétél, kun benwu Dwata,” abay se bè yó tehe gónó Dwata hegfan béléen bè yóm tehe kehlóyen hlayuk bè twoguhen.

⁸ Bè yóm knô le bè yó bè Bétél, matay Dibura, yóm libun tehe gel semgyok ke Ribika lemwót bè hanà kudien. Ne lebeng le laan yóm koyu ok fi leged Bétél. Ne yó boluy le du yóm koyu gónón lebeng yó, “Ok Gónó Langag.”

⁹ Bè yóm deng kulék Jakub gu bè Misuputamya yó, bud hegfan béléen Dwata ne bud wen oluhen du.

¹⁰ Yó mon Dwata mò du, “Jakub se yóm boluyem, okóm lenwóten ni yó tles boluyem Israél.” Duhen yó, yó tles boluy Dwata ke Jakub Israél.

¹¹ Ne yó mon Dwata mò du, “Ou se yóm Dwata laen dù là gbeken du. Holi mból anì baling ye sotu but benwu alì mbegel efet dê dumu but tau ne wen kem tau hol geta semfu gu béléem.

¹² Yóm benwu ni, deng tehe hfunu ke téméem Abraham ne maem Isak, ne ni bud hfunu kóm snéen dalang se yó kem angat semfu gu béléem.”

¹³ Timbow deng kudél Dwata ebè Jakub, ominen tmagak du.

¹⁴ Bè yóm gónó Dwata mudél ebéléen yó koni, wen botu hteg Jakub mò heftulón du bè nawahen. Ne wen yóm gel ninum le ne yóm hnolo ulib twélen tahen mò gónón hetfing du ebè Dwata.

¹⁵ Yó boluyen du yóm benwu yó, Bétél.

Katay Rakél

¹⁶ Kewót le Jakub bè yó bè Bétél ne yó kem fes lówóhen, hlós le ebè Ifrat. Bè yóm igò le tolo mayuk bè Ifrat he, kmuleng blutut Rakél ne mima yóm ksut blututen.

¹⁷ Timbow deng alì sidek kdesen yóm blututen, yó monen mò du yóm libun mwa ngà, “Béi hlikò, Rakél, bud logi yóm ngaem.”

¹⁸ Okóm yó hol són alu udél Rakél, monen, “Yó boluyu du yóm ngà ni, Binoni.” Ominen yó matay. Okóm yó kun boluy du maen, Bindyamin.Bè yóm katay Rakél, lebeng le bè yóm kilil lan mógów ebè Ifrat. Yóm kmoen ni, yó boluyen yóm benwu yó, Bitlihim.

¹⁹ Bè yóm katay Rakél, lebeng le bè yóm kilil lan mógów ebè Ifrat. Yóm kmoen ni, yó boluyen yóm benwu yó, Bitlihim.

²⁰ Omin Jakub hemdà sotu botu bè yó mò heftulón du bè nawan. Efet yóm kmoen ni, yóm botu yó ilô yóm gónón lebeng Rakél.

²¹ Bud kewót le Jakub bè yó, slong le bud kmamfù deng le kól bè yóm benwu sentu yóm gónô geta boluyen Idér.

Yó kem ngà Jakub

²² Bè yóm knô le Jakub bè yó bè Idér, lemwót Rubén sentungóen bè yóm sotu libun nmu maen boluyen Bilha. Ya tey sidek kbut Jakub bè yóm kungolen du. Yóm Jakub, wen sfolò lewu ngaen logi.

²³ Yó ngaen bè Liya, duhen Rubén, du se hol ngà Jakub twogu, ominen tmodol Simyun ne Libay ne Juda ne Isakar ne Sibulun.

²⁴ Yó ngaen bè Rakél, duhen Jusif ne Bindyamin.

²⁵ Yó ngaen bè Bilha yóm hesek Rakél, duhen Dan ne Naftali.

²⁶ Yó ngaen bè Silpa yóm hesek Liya, duhen Gad ne Asér. Ni kem ngà logi ni, tehe le sut bè Misuputamya.

Katay Isak

²⁷ Kewót Jakub bè yó mulék ebè maen Isak bè Mamri, yóm benwu moni bè Hibron. Yó se yóm benwu hol kul gónó menwu le Abraham ne Isak.

²⁸ Yó kegenen tau Isak, botong lematu bud wolu folò halayen. Tey deng gsengel ktuhahen bè yóm katayen.

²⁹ Ne lebeng yó kem lewu ngaen, Iso ne Jakub.