Tekang Kbuten 33 - Udél Dwata: Gna Kesfasad ne Lomi Kesfasad

Keston le Iso ne Jakub

¹ Hanà tolo mayuk, deng sana ton Jakub Iso semlong du ne botong fat latu tau mung du. Yó nmò Jakub, nólólen yó kem ngaen bè le Liya ne Rakél ne bè yó kem lewu libun nmuhen.

² Hegnahen yó kem lewu libun nmuhen ne yó kem ngà le. Bud tmodol Liya ne yó kem kun ngà snéen. Ominen són huli Rakél lewu le Jusif.

³ Bede tukô gna kul Jakub. Bè yóm igò Jakub hloni ebè twoguhen, botong hitu duléken hegdufok ebè tonok.

⁴ Okóm ke Iso kun, tódô mlóy ebè Jakub nan e lenagaf lenkef ne neleken. Ya tey keskik le.

⁵ Timbow deng keskik le, omin Iso temngel hilol, ne tonen yó kem libun ne yó kem ngà, ne snólóken Jakub, monen, “Kem tau kul de ni kem mung kóm ni?” Bnalà Jakub se, monen, “Ni se, hono kem ngà blay Dwata dou lemwót bè yóm tey kehyu nawahen.”

⁶ Omin le kól bè yó se yó kem libun nmu Jakub ne yó kem ngà le ne gotu le hegdufok ebè tonok bè solu Iso.

⁷ Omin Liya kól bè yó se kun ne yó kem kun ngà. Són huli Jusif lewu le yéen Rakél, bud le hegdufok ebè tonok se kul.

⁸ Bud snólók Iso, monen, “Tedu se tu du kem gna geslongu? Muhem kul se kem tu du?” Bnalà Jakub se, monen, “Tu se mò gónón mulék hyu nawahem ebéléu.”

⁹ Okóm yó mon Iso mò du, “Deng tey wen ne dou, Woli. Mò kóm ne yó kem deng gutahem.”

¹⁰ Okóm yó mon Jakub, “Béem mom tô kenbê. Ke deng mulék hyu se nawahem ebéléu, henmóyóem sen yó kem basahu kóm yó. Bè yóm ktonu lem uyóhem ni, hol lómón ke deng tonu lem uyó Dwata lemwót bè yóm tey kehyu yóm nmoem béléu ni.

¹¹ Hol henmóyóem sen nim blayu kóm ni.” mon Jakub. “Tey klinggel nawahen ebéléu yóm Dwata, tódô gotu blayen dou yó kem wen muhu du.” Tódô kem henlel Jakub mubug ke Iso efet henmóyô Iso yó kem basa Jakub du.

¹² Omin Iso mon du, “Yó ne, lemwót tekuy, fene gna bélê ye.”

¹³ Mon Jakub se, “Tngónem se, dou gónó mogot, tey ganag kógów me, là deng le hol kemgis mógów he yó kem ngà. Ne yó kem ubiha ne yó kem safì malak ngà, ke tô henslou kógów le balù tek sendaw, déke gotu le matay yó kem ógóf.

¹⁴ Gnahi kum ne,” mon Jakub, “hganag me huli he. Tódô tógón me bè kganag kógów yó kem ógóf ne yó kem ngà efet gafitu uu bè Idom.”

¹⁵ Mon Iso se, “Ke lómón yó se kmonem du, yake wen bè yó kem dou tau tebelu béléem mò tmóbóng kóm.” Okóm bnalà Jakub, monen, “Dog ne, syan se deng mulék hyu nawahem ebéléu.”

¹⁶ Duhen yó, bè yóm kdaw yó lemwót mulék ebè Idom ke Iso.

¹⁷ Ne fen mógów ebè Sukut kun ke Jakub. Wen gónô hdaen bè yó mò hlun gónóhen nô ne wen kem slung nmoen mò gónó le hgolung yó kem ógófen. Ne yó se gónó le moluy du Sukut yóm benwu yó abay se wen kem slungen.

¹⁸ Bè yóm kulék Jakub gu bè Misuputamya yó ne efet bè yóm kkólen bè syudad Sékém bè benwu Kanan, laen kô dù hemenen. Ne yó gónón kmamfù moni bè yóm syudad Sékém.

¹⁹ Benlihen yóm tonok gónón kmamfù yó bè yóm sotu tau semfu bè Hamor, yóm mà Sékém. Yó blihen du, lematu botù blówón bukay.

²⁰ Omin Jakub semsodò botu bè yó mò gónón demsù ebè Dwata. Yó boluyen du yóm gónón demsù yó, Él Élohi Israél. Yó lanen, “Alì gembek yóm kun Dwata Israél.”