Tekang Kbuten 31 - Udél Dwata: Gna Kesfasad ne Lomi Kesfasad

Klóy Jakub gu bè Laban

¹ Gotu gungol Jakub udél yó kem ngà Laban logi, yóm kmon le du, “Deng gotu nwa Jakub yóm kdê ógóf mà. Kdê yó kem kun kendengen yó, hono lemwót bè yó kem ógóf mà.”

² Bud ton Jakub snéen yóm là bud hol kgulit Laban yóm gna kmoen ebéléen.

³ Omin Dwata mon du, “Ó Jakub, budi mulék ebè benwu yó kem fuem ne ebè yó kem dumuhem setwoli. Elese tendo nô béléem.”

⁴ Duhen yó, wen tinok Jakub ebè le Rakél lewu le Liya anì lenebet le bè gónó le nô yó kem ógófen.

⁵ Bè yóm kkól le bè yó, yó mon Jakub mò kul, “Deng dilóu bè mà ye yóm là bud hol kgulit kmoen ebéléu, là mkélen bè yóm gnan. Okóm yóm Dwata tendo kun lolò mà eles tendo nô béléu.

⁶ Tódô tngón ye se yóm khotuhu gelu mò nmò bè mà ye.

⁷ Ewenem yó, mom snukaten ou ne botong sfolò duléken tendo temles yóm kmò ksukéyen dou. Okóm là hlus Dwata du béléen ke hensideken ou.

⁸ Bè yóm tehe kmon mà ye du mò dou, ‘Yó mò sukéyem kdéen kambing buling.’ Tahu se, tódô kdéen kambing gotu mngà buling. Bè yóm tehe bud kmonen du mò dou, ‘Yó mò sukéyem kdéen kambing leglis,’ tahu se, tódô kdéen kambing gotu mngà leglis.

⁹ Deng Dwata se gotu ma du bè mà ye yó kem dumu ógófen ne blayen dou.

¹⁰ Bè yóm tehe bulón le móyô hembô yó kem ógóf, wen knahu. Yó knahu, tódô kdê yó kem kambing logi móyô hembô, sal le leglis ne kabang ne buling.

¹¹ Bè yóm knahu yó, wen hógów Dwata gu bè longit mudél ebéléu, monen, ‘Ó Jakub.’ Monu se, ‘Hó. Ni ou.’

¹² Bud monen mò dou yóm hógów Dwata yó, ‘Ngem, tódô kdéen kambing logi móyô hembô hono leglis ne kabang ne buling. Ou se mò du yóm yó, abay se deng gotu tonu yóm kdê gel nmò Laban béléem.

¹³ Ou se yóm Dwata tehe hegfan béléem bè Bétél, yóm tehe gónóm hemdà botu ne wen hnolo twélem tahen mò heftulón du bè nawam ne deng wen fasad mget nmoem béléu bè yó. Yó ne, htifesi anì budi mulék ebè yóm benwu tehe gónóm sut.’ Yó se yóm hekna Dwata dou,” mon Jakub.

¹⁴ Bè yóm kungol le Rakél du lewu le Liya yóm tulón Jakub yó, yó mon le, “Laen kô dù ólól mà kum se bè yó kem kimuhen.

¹⁵ Hol lómón ke tólóng me tau se kum. Deng hbaluen se mi ne deng gotuhen yóm filak bli lówó me, laen kô dù olò kum du.

¹⁶ Kdê ni kem kendengen nwa Dwata bè mà ni, bè ktahuhen, hono kum se funen ne kem ngà me. Tódô nmoem ne yóm hmò Dwata kóm,” mon le Rakél.

^17-18 Tahu se, tódô htifes Jakub mulék ebè maen bè benwu Kanan. Bè yóm kewót le, hsakayen lu kamél yó kem yehenen ne kem ngaen. Lemwót yó kem ógófen fen htukóen lu gna, ne gotu lulónen ta le yó kem dumu kimu gutahen gu bè Misuputamya.

¹⁹ Bè yóm kewót le yó, là nóen bè yó Laban, tolo hlunen mungus bul yó kem ubihahen. Lemwót bè yóm là knóen bè yó, yó nmò Rakél, hennagawen yóm dwata lennged nô lem gónô maen.

²⁰ Bè yóm kewót Jakub yó tódô hlana, là kô tulónen du ke Laban.

²¹ Gotu sentifunen yóm kdê kimuhen ne tódô hetlasik lemwót, nifalen él Yufratis ne tódô hlós ebè yó kem bulul bè benwu Gilyad.

Kektes Laban ke Jakub

²² Tlu kdawen bè yó, tulón le ke Laban yóm deng klóy le Jakub.

²³ Lemwót Laban, gotu niten yó kem tauhen na le e ktes Jakub. Botong hitu kdaw le kemtes du efet ton le lu kmamfù bè yó kem ngà bulul bè benwu Gilyad.

²⁴ Bè yóm kifu yó, hegfan bè kna Laban Dwata, monen mò du, “Ó Laban, hol ten-gamahem yóm kudélem ebè Jakub, béi abay mudél sidek ebéléen.”

²⁵ Bong ke Jakub kun, deng kmamfù bè yóm sotu bulul bè yó bè Gilyad ne fen kmamfù bè yó kem dumu bulul lemnek bè yó le Laban, mung du yó kem dumuhen.

²⁶ Bè yóm keston le, yó udél Laban ebè Jakub, monen, “Tey Tò, moen de ke tódói hlana, tódô nówóngem yó kem ngau libun? Hol lómó kmoem kul kem libun negef bè gida.

²⁷ Moen du ke tódô tensobem ou ne tódói hlana lemwót là dog tulónem du? Ke deng tehe tulónem dou, wen ken nmou bélê ye bè yóm kewót ye ne deng tekuy na hligal semngal ne tembol ne hemglung.

²⁸ Là kô dog nam helek dou kul yó kem téméu ne yó kem ngau libun gu laan le là deng lemwót. Tey sidek nim nmoem béléu ni, Tò.

²⁹ Wen se kwalisu mò sidek béléem, okóm ebuteng hegfan béléu bè knahu yóm Dwata gónón mogot maem. Eles hetgamahen dou anì là mudéle sidek ebéléem.

³⁰ Deng eles tngónu yóm tey khahuem ke maem, okóm moen se du ke hennagawem yó kem dwata lenngedu nô lem gónô?”

³¹ Bnalà Jakub se, monen, “Yó gónóhu là hetngón du kóm yóm kewótu abay se likoe, kô nalihem béléu yó kem ngaem libun.

³² Okóm bè yóm dwata lennged nô lem gónóem, ke wen se tau gónóm mton du bè ni, tódô hnatay kmò du. Hol hnebelem yóm kóm, ne ke tonem, tódô nwahem. Ne ni kem tau te mung kut ni mò fen temksì du.” Là kô tngón Jakub du yóm fen knagaw Rakél du yó kem dwata lennged maen.

³³ Kewót Laban bè yó, tódô smisif mebel gu lem tolda Jakub, ominen mógów ebè gónón nô Liya ne bè gónó le nô yó kem lewu hesek le libun. Okóm là kô tonen du yóm dwata lennged hnebelen. Ominen bud mógów ebè yóm kun gónó nô Rakél.

³⁴ Blaem yóm dwata lennged yó, deng sana bnos Rakél lem yóm sning nô bè syà kamélen ne yó nmoen, myón tahen. Tódô gotu snisif hnebel Laban gu lem tolda Rakél okóm là kô tonen du.

³⁵ Ne yó mon Rakél mò ke maen, “Ó Mà, hol béem abay lenbut ou, là gbeku du mdà bè soluhem abay se tolo wen hen-gifatu.” Yó gónóm mon, là kô dog ton Laban du yó kem dwata lennged hnebelen.

³⁶ Ngangen efet mom kinì kulu Jakub, yó udélen, monen, “Salà du de yóm deng nmou béléem? Udin du de yóm deng nuléhu mò gónóm kemtes dou?

³⁷ Ne ni, bè yóm deng ksisifem mebel du bè kdê yó kem kimuhu, kimu du se tonem? Hlasaem bè ni sen anì ton yó kem tau te. Hkukumem kul mahi du bélê te tahu.

³⁸ Deng lewu folò halayu nô béléem. Yó kem ubihahem ne yó kem kambingem balù sulék ke deng wen gónó le tô là mngà. Ne balù sulék ke denge tmétê bè yó kem ubiha logihem.

³⁹ Ket ubiha gel hnatay yó kem ógóf lem bnes sal tódô ou gel temles du. Là kô dog hegfanu du béléem wadag gónóm temngón du là dou salà du. Ke wen gel hennagaw le kemdaw duhen ke kifu, sal bud gel hetlesem dou.

⁴⁰ Dê duléku ne gmumfak du yóm tey ékét nóng kdaw ne yóm tey ketnawen ke kifu, là kóen gel mdengen ktungóu.

⁴¹ Yó se yóm kdê deng glanu béléem lem yóm lewu folò halay knóu béléem. Botong sfolò fat halayu kegenu mò nmò béléem anì gyehenu yó kem lewu ngaem libun, ne bud nem halayu he na bud mò nmò béléem mò semgyok yó kem ógófem. Lelen yó he, botong sfolò dulékem tendo temles du yóm kmò ksukéyem dou.

⁴² Ke là elesen tendo mung dou yóm Dwata téméu Abraham ne mau Isak, déke tódô gbekem hulék dou hkawang dilóu. Okóm deng ton Dwata yóm kgelen béléu ne tonen snéen yóm alì kmou nmò béléem ne ebuteng heknahen kóm yóm kfihen dou.”

Kesfasad le Jakub Laban

⁴³ Omin Laban malà ke Jakub, monen, “Ni kem libun yehenem ni, hono dou ngà. Yó kem ngà le, hono dou. Ne ni kem ógóf ni, hono bud dou. Bè ktahuhen, tódô kdê ni kem tonem bè ni ni, hono dou. Okóm ni, là kô gmou du ke tô nalihu kóm yó kem ngau libun ne yó kem téméu.

⁴⁴ Yó dé hyu ke sfasad te. Smuduk te botu mò gónó te hemtulón du nawa yóm deng kesfasad te.”

⁴⁵ Tahu se, ma sotu botu Jakub ne hdaen eta mò gel heftulón du bè nawa le yóm senfasad le.

⁴⁶ Ominen mdók yó kem tauhen anì smuduk le botu. Timbow deng kesluduk le botu, omin le gotu mken bè yó klohoken.

⁴⁷ Yó boluy Laban du bè udél Aramik yóm botu luduk le yó, Jigar Saharduta. Ne yó kun boluy du Jakub bè udél Hibru, Galid.

⁴⁸ Yó mon Laban mò ke Jakub, “Nim botu luduk te ni mò tendo hlós heftulón du bè nawa te yóm deng kesfasad te.” Ne yó gónó le moluy du Galid yóm benwu yó.

⁴⁹ Yó bud mon Laban, “Dwata he tendo eles temngel kut bè yóm keskó te bè ni.” Ne yó gónó le moluy du Mispa yóm benwu yó.

⁵⁰ Bud mon Laban, “Ke hensidekem yó kem ngau libun ne ke budi myehen dumu libun baluen ke là tngónu du, hol béem klifót wen Dwata tendo eles temngel kut.

⁵¹ Ni deng wen kem botu senuduk te mò blóng te ne ni se yóm sotu botu hdà te mò heftulón du bè nawa te yóm deng kesfasad te.

⁵² Ni kem deng nmò te ni mò tendo gel hentulón nawa te. Là kô gbeku mius du ni kem botu ni ke tô nundugu uu. Dalang se kóm, là kô gbekem mius du ke tô nundugem ou.

⁵³ Yó hem kul Dwata le Abraham ne Nahor mò fen angat kmukum kut ke nulé te yóm deng senfasad te ni.” Tahu se, tódô lolò Jakub yóm deng senfasad le yó hlanen bè boluy Dwata yóm gónón mogot maen Isak.

⁵⁴ Wen ógóf hnatayen ne dsuen ebè Dwata bè yó ta bulul ne htabahen yó kem dumuhen ebè yóm ken nmoen. Timbow deng kken le, omin le na bud tungô bè yó suloy.

⁵⁵ Ne hol hlafus bè yó, gotu nelek Laban lu yó kem téméen ne yó kem ngaen libun, ominen mbal kul ne mulék ebè benwuhen.