Tekang Kbuten 30 - Udél Dwata: Gna Kesfasad ne Lomi Kesfasad

¹ Okóm ke Rakél kun, laen dù ngà Jakub béléen ne yó mò du, deng mom mélés nawahen yóm twoguhen, ne yó monen mò ke Jakub, “Benlayem ou ngà. Ke laen dù ngau, mom tódóe hyu he ke tódóe matay.”

² Deng mom lenbut Jakub Rakél ne monen mò du, “Ou kô Dwata? Bè Dwata se gónón lemwót yóm là kngaem.”

³ Ne yó mon Rakél mò ke Jakub, “Ni Bilha, yóm ngà libun heseku, sentungóem dou anì wen ngaem béléen mò dou nfun ne balinge yê se dou mlan béléen.”

⁴ Tahu se, hestungóen ke Jakub Bilha, yóm ngà libun heseken.

⁵ Ne mlutut Bilha ne mngà logi.

⁶ Yó mon Rakél, “Deng nfi Dwata ou. Deng hnungolen yóm knihu béléen, yó gónón bemlay dou ngà logi.” Ne yó gónón moluy du Dan yóm ngà sut yó.

⁷ Bud mlutut Bilha ne bud mngà logi.

⁸ Yó mon Rakél, “Deng tey kwitu sfatay bè yóm twoguhu ne ni he katuu béléen.” Ne yó gónón moluy du Naftali yóm ngà sut yó.

⁹ Timbow tngón Liya yóm là bud kngaen, yó gónón hestungô du ke Jakub yóm kun hesek boluyen Silpa.

¹⁰ Ne mlutut Silpa ne mngà logi.

¹¹ Ne yó mon Liya, “Tey hyu dou bagì.” Ne yó gónón moluy du Gad yóm ngà sut yó.

¹² Bud wen ngà Jakub logi bè Silpa

¹³ ne yó bud mon Liya, “Tey bong ne dou kligal. Ne mon yó kem dumuhu libun, deng hligal ne.” Ne yó gónón moluy du Asér yóm ngà sut yó.

¹⁴ Timbow kól bè yóm bulón le muta, lemwót Rubén yóm ngà Liya twogu, mógów ebè yóm gónó le gel mò hulu ne wen tonen bè yó yóm bnes bulung mngà boluyen mandréks ne nwiten eta bè yéen. Yó mon Rakél mò ke Liya, “Yake benlayem se ou yóm bulung mngà nwit Rubén.”

¹⁵ Mon Liya se mò du, “Là gsengel nawahem du he kô yóm deng tódô kledem du béléu yóm dou tuha logi? Ne ni, bud tô nwahem yóm dou bulung mngà ton ngau?” Mon Rakél se, “Ke benlayem ou yóm bulung mngà ton ngaem, hyu kestungóem ke Jakub kifu ni.”

¹⁶ Tahu se. Na a móyón kimel bè yó, kól mò nmò Jakub. Senlong Liya ne monen mò du, “Stungói dou kifu ni abay se deng bnayadu uu yóm bulung mngà ton ngau.” Tahu se, stungô Jakub ke Liya bè yóm kifu yó.

¹⁷ Bnalà Dwata yóm kni Liya béléen ne bud mlutut ne mngà logi. Glimuhen yó ne yóm ngà Jakub logi béléen.

¹⁸ Ne yó mon Liya, “Deng benlay Dwata ou ofol lanu bemlay du bè yehenu yóm libun heseku.” Ne yó gónón moluy du Isakar yóm ngà sut yó.

¹⁹ Bud mlutut bè yó Liya ne bud mngà logi. Yó se yóm gnem ngà Jakub logi béléen.

²⁰ Ne yó monen, “Deng blay Dwata dou yóm tey basa hyu. Ne ni, henmóyóen ou ne yóm tuha logihu abay se deng nem ngau béléen logi. Ne yó gónón moluy du Sibulun yóm ngà sut yó.”

²¹ Kogolen bè yó, yó he kngà Liya libun ne yó boluyen du Dina.

²² Bè Rakél kun, là kô klifót Dwata du ne bnalaen yóm kun kni ne kóhen béléen yóm katilen anì mngà.

²³ Mlutut Rakél ne mngà logi. Yó udélen, monen, “Laen dù bud gónóhu myak ne ni. Deng wen ngà logi blay Dwata dou.”

²⁴ Yó boluyen yóm ngaen yó, Jusif, abay se monen, “Dwata he hol bud bemlay dou sotu ngà logi.” Là gomongen bè nili yóm bérs 25 kól bè 43. Yó tulónen yóm deng senkotuk le Jakub yóm tuónen Laban bè kmò ksukéyen ke Jakub bè yóm kmoen nmò béléen. Hono ógóf yóm sukéyen du. Ne sónmoen temnù yó kem ógóf Jakub efet baling tau wen kendengenen.