Tekang Kbuten 27 - Udél Dwata: Gna Kesfasad ne Lomi Kesfasad

Kolu Isak ke Jakub

¹ Deng tey tuha ne Isak, lelen butô. Sotu kdaw bè yó, htabahen Iso yóm ngaen twogu ne monen mò du, “Ó Ngà.” Bnalà Iso se, monen, “Yó du, Mà.”

² Mon Isak se mò du, “Denge tey tuha ne ni ne móyóne mfu.

³ Nwahem bohohem nam e dmulok dou lem bnes.

⁴ Tnógóhem dou yóm utón alì mnóm béléu, ominem mit du edini béléu. Ke deng deng kkenu du, wen oluhu kóm gu laanu là deng matay.”

⁵ Yóm igò Isak mudél ebè Iso hnungol Ribika yóm tuha libunen. Bè yóm kewót Iso dmulok,

⁶ yó mon Ribika mò ke Jakub, “Lomi gungolu yóm udél maem ebè twoguhem koni, monen mò du,

⁷ ‘Dmuloki dou ne tnógóhem dou. Ke deng deng kkenu du, wen oluhu kóm bè solu Dwata bè yóm gu laanu là deng matay.’ ”

⁸ Ne bud mon Ribika mò ke Jakub, “Ne ni Ngà, hnungolem ou ne nmoem nim tulónu kóm ni.

⁹ Mógówi ebè gónó le nô yó kem ógóf tekuy, méléki lewu ngà kambing mabù mò tnétéu bè maem, tnógóhu béléen yóm utón alì nóyóen.

¹⁰ Ke sok deng któgóhu du, ominem mkay du ebè maem. Ne wen oluhen kóm gu laanen là deng matay.”

¹¹ Okóm yó mon Jakub mò ke yéen, “Tngónem se nbul kun ke Iso ne fen là dou.

¹² Déke nigófen ou mà ne tngónen yóm ksukatu du. Ke ni se nmou, là kô noluhen dou, deng mom wen hmulaen dou.”

¹³ Ne yó balà yéen du, monen, “Ou he yó ngà gónón e tódô ke wen hmulà maem kóm. Tódô nmoem yóm tulónu kóm. Lemwóti ne, mahi dou kem ngà kambing.”

¹⁴ Tahu se, lemwót Jakub ne wen kem ngà kambing nwiten ebè yéen mò tnétê le ne tnógó yéen yóm utón alì nóyô maen.

¹⁵ Omin yéen ma yóm nes Iso, yóm nesen alì hyu gel henyuhen bè gónô ne heseken ke Jakub.

¹⁶ Wen kulit kambing suen bè sigel Jakub ne wen se bè liholen bè yóm gónón laen dù bulen.

¹⁷ Ne oguhen ke Jakub yóm utón alì mnóm deng tnógóhen, mung du yóm mambang deng nmoen.

¹⁸ Omin Jakub yó mógów ebè maen ne monen mò du, “Ó Mà.” Mon maen se, “Hó. Ngà kóm de?”

¹⁹ Bnalà Jakub se, monen, “Isohe, yóm ngaem twogu. Deng nmou yóm hmoem dou. Nam btik dé mà, kenem yóm utón deng nwitu ebéléem anì noluhem ou kedeng.”

²⁰ Mon Isak se, “Tey klahil kebelem utón ni du ngà.” Mon Jakub se, “Yóm Dwata gónóm mogot tmóbóng dou mebel du.”

²¹ Yó mon Isak mò ke Jakub, “Yake hlonihi dou edini anì nigófu uu. Holi tahu Iso kô?”

²² Tahu se. Hloni ebè maen Jakub, omin maen migóf du ne monen mò du, “Hol lómón tô udél Jakub yóm udélem okóm yóm sigelem, sigel Iso.”

²³ Là kô dilóen ke Jakub abay se nbul sigelen, hol lómón yóm kun sigel Iso. Ne tô wen oluhen ke Jakub

²⁴ okóm nan bud mon, “Holi tahu Iso kô?” “Ou se du,” mon Jakub.

²⁵ Yó mon Isak mò du, “Oguhem dou yóm utón tnógóhem. Ke deng deng kkenu du wen oluhu kóm.” Tahu se, nwit Jakub ebéléen ne nwiten snéen yóm tifas grép mò ninumen.

²⁶ Ne yó bud mon maen mò du, “Hlonihi dou edini, ngà, nelekem ou.”

²⁷ Bè yóm igoen hloni ebè maen na a melek du, gungef Isak boo yóm nes leseken ne yó gónón molu du, monen, “Yóm tey klinggel boo yóm ngau, hol lómón ke boo yóm tonok deng tnóbóng Dwata.

²⁸ Dwata he bemlay kóm amù lemwót gu bè longit mò hméfê yóm tonokem anì bong tebasen. Dwata he hol bemlay du kóm yóm mò gel ken ye ne yóm mò gel ninum ye.

²⁹ Yó kem dumu but tau, baling le tóbóng lówóhem ne mtud le bukol bè soluhem. Uu gónó le kmulu yó kem dumuhem setwoli ne mtud le bukol bè soluhem yó kem dumu ngà yéem logi. Yó kem tau hemmulà kóm angat tnafak Dwata lu. Ne yó kem tau tmóbóng kóm bud tnóbóng Dwata lu.”

Kni Iso yóm olu maen du

³⁰ Timbow deng kolu Isak ke Jakub henmung Jakub se lemwót. Unihen lemwót, kól dmulok se Iso, yóm twoguhen.

³¹ Bud tnógóhen se kun yóm utón alì mnóm, ominen mkay du ebè maen. Yó monen mò du, “Ó Mà, nam btik dé, nam ken yóm utón nwitu ebéléem anì noluhem ou.”

³² Bnalà Isak, monen, “Tau kóm de?” Mon Iso se, “Ou se Iso, yóm ngaem twogu.”

³³ Bè yóm kungol Isak du, ya tey sidek kekkelen ne monen, “Ke uu se Iso, tau du se yóm deng mit utón ebéléu koni? Lomi deng kkenu du gu laanem là deng sut ne deng wen oluhu du koni. Ne hlós kun se yó laen kô dù tul sónen.”

³⁴ Timbow gungol Iso yóm udél maen, tódô hendlaen lemangat mkik, yó monen, “Déy gi, Mà, bud noluhem ou se do.”

³⁵ Yó balà Isak du, monen, “Deng gu bè ni twolihem ne deng snukaten ou. Deng gwahen ne yóm tô oluhu kóm.”

³⁶ Mon Iso se, “Deng gewuhen dulék ni ne smukat dou. Kô mon se ke boluyen Jakub. Bè yóm gnan, deng nwahen yóm dou kwalis bè ketwogu ne ni bud nwahen yóm dou olu. Tey, Mà, laen dù bud oluhem dou ne kô?”

³⁷ Bnalà Isak se, monen, “Deng oluhu du, du gónóm mogot ne gotu le baling tóbóng lówóhen yóm kdê dumuhen setwoli. Deng oluhu du yóm tendo kwen gel kenen ne ninumen. Laen dù bud gmou béléem ne ni, Ngà.”

³⁸ Tódô henlós Iso hkodu bè maen, monen, “Tek olon sotu kô oluhem, Mà? Hol noluhem ou sen.” Ominen yó bud mkik.

³⁹ Ne yó mon Isak mò du, “Bong béléem kóm, laen dù amù lemwót bè longit ke hméfê tonokem. Laen dù tonok hyu ke mò nfunem.

⁴⁰ Són olo gónóm mowil, són bè sudengem ne balingi tóbóng lówó yóm twolihem. Okóm bè yóm kdaw katuem du angati gewà lem hólólen.”

⁴¹ Ya tey kutó nawa Iso ke Jakub lemwót bè yóm deng kolu mà le du. Yó hendemen, “Móyónen matay ne yóm mà. Ne ke deng matay, hnatayu Jakub.”

⁴² Okóm timbow tngón Ribika yóm tô atul Iso, yó gónón tmaba ke Jakub ne monen mò du, “Ó Ngà, ni hnungolem ou. Yóm twoguhem, tô natul hnatayen uu mò belesen yóm deng nmoem béléen.

⁴³ Yó nmoem, géhéli lemwót etu bè Haran bè yóm logihu Laban.

⁴⁴ Nam na hlun nô ditu béléen efet lembó kebuten kóm yóm twoguhem

⁴⁵ ne klifóten yóm deng nmoem béléen. Ke deng klifóten angat wen hógówu edyó mò mangay kóm. Là kô gbeku hembala du ke tódô lana béléu yó kem lewu ngau bè yóm sotu kdaw.”

Khógów Isak ke Jakub ebè Laban

⁴⁶ Sotu kdaw bè yó, yó mon Ribika mò ke Isak, “Denge tey tmakas bélê le ne yó kem tólóng libun yehen Iso. Sélét ne ke tô bud myehen bè ni kem libun Hitayt Jakub, ngunte déke tódóe matay.”