Tekang Kbuten 23 - Udél Dwata: Gna Kesfasad ne Lomi Kesfasad

Katay Sara

¹ Yó kegen Sara tau, botong lematu bud lewu folò hitu halayen.

² Ne matay bè Hibron bè benwu Kanan ne tey klangag Abraham du yóm katayen.

³ Bè yóm igò Abraham tolo modung du tódô mógów ebè yó kem tau Hitayt ne yó monen mò kul,

⁴ “Nim knóu lem blóng ye, olohe tau milo ebélê ye. Ke hyu bélê ye, hebli ye ou tonok mò gónóhu lembeng ke tuha libunu.”

⁵ Bnalà le se, mon le,

⁶ “Bè kum kehedem du, là kói olo tau hkawang, uu se yóm hol datù sensadat. Tey hyu nawa me ke tódô lebengem bè yóm gónó lembeng hol knóón bélê me yóm tuha libunem.”

⁷ Tódô mtud bukol bè solu le Abraham

⁸ ne monen mò kul, “Ke hyu bélê ye yóm kebengu ke tuha libunu dini, hol tulón ye dou ke Ifron yóm ngà Suhar,

⁹ anì hbaluen béléu yóm kilib boluyen Makpila, yóm nô bè kilil tonoken. Hol tulón ye du dou anì hbaluen béléu bè yóm hol tahu btesen. Tódô benlihu bè ni lem blóng ye mò hlós dou nfun mò dou gónó gel lembeng.”

¹⁰ Deng eles myón bè yó Ifron lem blóng yó kem dumuhen tau Hitayt bè yóm gónó le gel stifun bè bak tikeb yóm syudad le. Tódô kdéen tau bè yó gotu mungol du yóm kbalaen ke Abraham, monen,

¹¹ “Ni hnungolem, tódô blayu kóm yóm tonok monem yó gomong du yóm kiliben. Hmungol ni kem dou kwen Hitayt nô bè ni, tódô blayu kóm mò gónóm lembeng ke tuha libunem.”

¹² Omin Abraham tódô bud mtud bukol bè solu yó kem tau Hitayt

¹³ ne wen udélen ebè Ifron, ne gotu gungol yóm kdéen tau nô bè yó. Yó monen, “Ke yóm hyu béléem, hol hnungolem ou. Tódô heblihem dou ne yóm tonokem yó. Henmóyóem yóm blihu du, anì bè yó gónóhu lembeng ke tuha libunu.”

¹⁴ Bnalà Ifron se, monen,

¹⁵ “Mà Bong, yóm tonok yó, tek fat latu botù blówón bukay btesen. Laen kô dù hol btesen bélê te yó kem yó bè kem tau deng setngón nawa. Tódô lebengem bè yó ne tuha libunem.”

¹⁶ Tódô nmung Abraham yóm btes Ifron du yó koni ne tnimbangen lem blóng yó kem tau nô bè yó yóm fat latu botù blówón bukay mon Ifron yó. Lómó kmoen du, lómón yóm gel ktimbang yó kem tau gel bemli.

¹⁷ Kewóten bè yó, Abraham ne tles mfun du yóm tehe tonok Ifron bè Makpila, fi dmata kdaw yóm benwu Mamri. Gomong du yóm kilib gónó lembeng ne yó kem koyu mteg gu bè yó efet kól bè kilil yóm tonok yó.

¹⁸ Tódô kdê yó kem tau Hitayt mung bè yó, gotu temngón du yóm deng kfun Abraham du yóm tonok yó.

¹⁹ Omin Abraham yó lembeng ke tuha libunen Sara bè yóm kilib bè benwu Kanan.

²⁰ Duhen yó, yóm tonok tehe nfun yó kem tau Hitayt ne yóm kilib nô du, deng baling nfun Abraham mò gónón gel lembeng.