Tekang Kbuten 22 - Udél Dwata: Gna Kesfasad ne Lomi Kesfasad

Ktilów Dwata ke Abraham

¹ Kogolen bè yó, tnilów Dwata Abraham ke tahu yóm kimónen du, tnabahen, monen, “Ó Abraham.” Mon Abraham se, “Hó. Ni ou.”

² Bud mon Dwata, “Nitem Isak, yóm tek sotu ngaem, yóm alì kenbong nawahem. Mógów ye etu bè benwu Muraya. Angat wen bulul toloku kóm ditu, ne ditu tahen gónóm hmatay du mò dsù hkekebem ebéléu.”

³ Tahu se, hol hlafus bè yó, wen koyu nsô Abraham mò snuken yóm hedsù Dwata du. Ominen lemulón du ta yóm kudà asnu ne niten Isak. Ne wen lewu bè yó kem gel tóbóng lówóhen bud nwiten. Mógów le ebè yóm benwu deng tulón Dwata du.

⁴ Bè yóm deng getlu le kdaw mógów, ton Abraham mayuk yóm bulul tulón Dwata du.

⁵ Ominen mon du bè yó kem tóbóng lówóhen, monen, “Na ye tebel bè ni bè kudà. Na me mógów etuu lewu me nim ngau na me e tmaba ebè Dwata bè yó, bud me mulék edini kedeng.”

⁶ Htihang Abraham ke Isak yóm koyu snuken yóm dsuen ne fen du mit yóm suk ne yóm bala ofi. Yóm igò le mógów,

⁷ yó mon Isak mò ke maen, “Ó Mà.” Bnalà Abraham se, monen, “Boluyen de, ngà?” Mon Isak, “Wen ofi nwit te ne wen snuken okóm nô se yóm ngà ubiha mò dsuem du?”

⁸ Yó balà Abraham du, monen, “Dwata he, ngà, fen bemlay du kut yóm mò dsù te.” Omin le yó hlós.

⁹ Timbow le kól bè yóm benwu deng tulón Dwata ke Abraham, omin Abraham semsodò yóm botu mò gónón demsù, ne senfótólen tahen yó kem koyu nwiten. Ominen mfét ke Isak ne hlasaen ta yó kem koyu deng senfótólen yó.

¹⁰ Ominen ma yóm suk ne hol tô hnatayen se yóm ngaen,

¹¹ sen-gengen se wen hógów Dwata tmaba ebéléen gu bè longit, monen, “Ó Abraham, Abraham.” Mon Abraham se, “Hó. Ni ou.”

¹² Bud mon yóm hógów Dwata, “Hlasaem yóm suk. Béen abay wen nmoem béléen yóm ngà. Ni ne deng tngónu wen klikoem ke Dwata ne tey kimónem du, abay se là kô nalihem du béléen yóm hol tek són ngaem.”

¹³ Ominen tódô wen ubiha logi ton Abraham geskét lem yóm ngà koyu lefungu hangahen. Ne tódô nwahen, ominen hmatay du ne hkekeben ebè Dwata mò dsuen mò tles yóm ngaen tô dsuen.

¹⁴ Yó hlós boluy Abraham du yóm bulul yó, “Dwata fen bemlay.” Efet nim kmoen ni, gel mon yó kem tau, “Bè yóm kun bulul Dwata, du fen bemlay.”

¹⁵ Ominen bud tmaba ebè Abraham bè gewuhen dulék yóm hógów Dwata tmaba gu bè longit yó koni, monen,

¹⁶ “Ni wen hol fasad mget fasadu kóm hlanu bè boluyu. Ou se Dwata mon du nim ni. Lemwót bè yóm deng nmoem ni, yóm là kngalihem du dou yóm tek sotu ngaem, tendo tnóbóngu uu.

¹⁷ Ne angat hol hwenu bólem, lómón kwen le blotik bè longit ne lómón kwen le helek bè kilil mohin. Ne angat le gel matù bè yó kem hohon le.

¹⁸ Lemwót bè yóm tey kimónem dou, angat wen bè yó kem bólem gónóhu hlan du yóm tóbóngu yóm kdéen but tau talak tonok.”

¹⁹ Kogolen bè yó, omin le Abraham mulék ebè yó kem tóbóng lówóhen mangat kul ne bud le slomong mulék ebè Birsiba, yóm benwu gónó Abraham henek nô.

²⁰ Kogolen bè yó, gungol Abraham deng wolu ne kem ngà Milka logi, yóm yehen yóm dumun sulil-lem boluyen Nahor.

²¹ Yó boluy le lenwóten bè twogu, Us, ne Bus ne Kimwél (yóm gónó le gu semfu yó kem tau Aram),

²² ominen Kis ne Hasu ne Pildas ne Jidlaf ne Bituél.

²³ Mngà Bituél, duhen Ribika.

²⁴ Yó bud tnù yó kem wolu ngà Milka logi, bud wen kem ngà Nahor bè yóm libun nmuhen boluyen Ruma. Yó boluy le, Tiba ne Tahas ne Maaka.