Tekang Kbuten 20 - Udél Dwata: Gna Kesfasad ne Lomi Kesfasad

Abraham ne Abimélék

¹ Kewót Abraham bè yó, subô ebè Négéb, ne nahen hlun nô bè yó bè yóm benwu boluyen Girar, yóm benwu nô bè blóng benwu Kadis ne yóm benwu Sur.

² Yó tulón Abraham yó kem tau bè yó, yóm yehenen Sara libunen. Duhen yó, tinok yóm tau hol geta bè yó boluyen Abimélék Sara anì nwit le ebéléen ebè gónô bongen.

³ Okóm sotu kifu, hegfan bè kna Abimélék Dwata, ne monen mò du, “Dengi matay se kóm, abay se yóm libun nwahem ni, wen yehenen.”

⁴ Okóm là deng sentungô Abimélék ke Sara he. Yó gónón mon du mò ke Dwata, “Hnatayem kô yóm tau laen dù salaen?

⁵ Yó tulón Abraham dou, monen, ‘libunu’ ne bud mon Sara se kun, ‘El, logihu.’ Laen dù salau ne laen se dù sidek deng nmou.”

⁶ Omin Dwata bud mon du mò ke Abimélék, “Tahu se, tngónu laen dù salaem. Yó se gónów là hemlus du kóm ke sentungóem anì là gemsalai béléu.

⁷ Ne ni, hulékem ebè yehenen yóm libun yó, yakà tugodu yóm yehenen, ne du fen mni béléu béléem anì là matayi. Okóm ke là hulékem du, hol tahu se angati matay dalang se yóm kdê tau nô lem gónóem.”

⁸ Hayahen bè yó, hlafus btik Abimélék, gotu htabahen yóm kdê tóbóng lówóhen, ne gotu tulónen kul yóm kdéen, ne ya tey sidek klikò le.

⁹ Omin Abimélék htaba ke Abraham, ne monen mò du, “Tedu de nim deng nmoem bélê me ni? Tedu de deng nmou béléem sidek gónóm mò du bélê me nim ni? Moen ke lómón ni yóm salà hbóem dou dalang se yóm benwu nogotu? Là kóen hyu yóm deng nmoem béléu ni.

¹⁰ Moen de ke nmoem bélê me nim ni?”

¹¹ Bnalà Abraham, monen, “Yó gónóhu mò du nim ni, abay se yó hendemu, ‘Laen kô dù klikò le ke Dwata ni kem tau bè nim benwu ni. Angat hnatay le ou anì gwa le nim yehenu.’

¹² Tahu se, slibun me, ssotu me bè mà fen me stólóng bè yê, ne nwahu mò yehenu.

¹³ Bè yóm tehe kdók Dwata dou, anì hlayuke bè gónô mà, yó monu mò ke Sara, “Yó gónón gfan yóm kbong nawahem dou, balù kihu gónó te e solu, hol monem setwoli te.”

¹⁴ Omin Abimélék hulék ke Sara ebè Abraham, wen kem ubiha ne kem safì ne kem hesek libun ne hesek logi hmungen du.

¹⁵ Yó mon Abimélék mò ke Abraham, “Tenngelem yóm klamang benwu nogotu. Méléki nô kihu nóyô gónóm nô.”

¹⁶ Omin Abimélék beklil ebè Sara, monen mò du, “Ngem, ni wen lemibu botù blówón bukay blayu ke logihem mò gónó le hemtahu du yóm kdê tau mung kóm yóm klaen dù sidek deng nmou béléem ke mò gónóm myak, ne anì là hendem le du béléem snéen yóm sidek.”

¹⁷ Omin Abraham mni bè Dwata, ne hkó Dwata yóm des Abimélék ne yehenen dalang se yó kem libun tóbóng lówóhen anì bud le mngà.

¹⁸ Yakà deng hatil Dwata lu yó kem libun lem gónô Abimélék lemwót bè yóm kwa Abimélék ke Sara yehen Abraham.