Tekang Kbuten 2 - Udél Dwata: Gna Kesfasad ne Lomi Kesfasad

¹ Duhen yó, deng gotu deng ne kedlimun Dwata du yóm longit ne yóm tonok ne yóm kdéen ton ta le.

² Bè yóm ghituhen kdaw là buden mò nmò Dwata, deng gotu deng ne kedlimunen du yóm kentihen.

³ Ne wen oluhen du yóm ghituhen kdaw yó, htólóngen mò kun abay se hegnô bè yóm kdaw yó bè yóm kedlimunen du yóm kentihen.

⁴ Yó se tehe kmò kedlimun Dwata du yóm longit ne yóm tonok ne yóm kdéen ton. Bè yóm tehe kedlimun yóm sana Dwata hol gónó mogot yóm longit ne yóm tonok,

Yóm hungul koyu lamang boluyen Idin

⁵ laen kô dù hulu tonem tahen yóm tonok duhen ke laen dù lem hulu lemsob tahen, abay se là deng hkulón Dwata du he, lelen laen deng tau mò hulu.

⁶ Okóm balù yóm là deng kehkulón Dwata du, wen él tembul gu lem tonok mò hméfê du.

⁷ Bè yóm tehe kmò Dwata tau, wen tonok nwahen ne nifilen, henbalingen tau. Ominen myuf lem ilungen yóm nawa mò hlowil du ne tódô mnawa se yóm tau nifilen yó ne sen-gengen se mowil.

⁸ Ne wen hungul koyu nmò Dwata bè yóm benwu boluyen Idin fi dmata kdaw ne bè yó gónón hemnô du yóm tau deng nifilen.

⁹ Tódô kentihen koyu alì tilob mton du gotu htowok Dwata bè yó, hono kem koyu tilob kbungu le. Bè hol gónón sóól yóm hungul nmoen yó, wen sotu koyu mteg bè yó ke gken tau bunguhen tódô hlós mowil. Ne wen bud sotu koyu mteg bè yó ke gken tau bunguhen, tódô tngónen yóm hyu ne tódô tngónen se yóm sidek.

¹⁰ Bè yóm hungul Idin yó, wen él bong mlel gu lemen mò hméfê du. Yóm él yó, fat gónón mesgólól bè senbwak yóm hungul.

¹¹ Yóm tanay lelen, boluyen Pisun, mlel etu lem yóm benwu boluyen Habila.

¹² Bè yóm benwu yó gónón nô yóm tahu blówón laen kô dù bolen ne yóm sotu kay litok koyu alì tilob boohen ne yó kem botu tilob alì mebtes.

¹³ Ne yóm gewu lel yóm él yó, boluyen Gihon, mlel etu lem yóm benwu boluyen Kus.

¹⁴ Ne yóm getluhen, boluyen Tigris, mlel etu fi dmata kdaw yóm benwu Asirya. Ne yóm gfat lelen, boluyen Yufratis.

¹⁵ Ne yó nmò Dwata, hnóen bè yóm hungul Idin yó yóm tau nifilen mò fen mò hulu bè yó ne mò mentey du.

¹⁶ Yó mon Dwata bè yóm tau nifilen yó, “Hyu mken du balù kihu bungu koyu bè nim hungul ni.

¹⁷ Okóm béem abay ken yóm bungu koyu gónóm temngón du yóm hyu ne yóm sidek. Ke sok kenem yóm bunguhen tódói matay.”

¹⁸ Yó bud mon Dwata, “Là hyuhen béléen nim tau nifilu ni ke tek sotuhen. Na mò béléen dumuhen seklóón mò tóbóng lówóhen.”

¹⁹ Tahu se, gotu nwit Dwata ebè yóm tau nifilen yóm kentihen deng tehe dlimunen lemwót bè tonok, kentihen ógóf nô te tonok ne kentihen onuk móyóng te kmawang. Ne hmoen du boluy le. Ne yó se buten yóm kwen kul mdengen boluy yóm kdê le.

²⁰ Tahu se, gotu nmò yóm tau nifil Dwata yó boluy yóm kentihen onuk móyóng te kmawang ne kentihen ógóf nô te tonok. Okóm balù sotu bélê le ke wen dumun seklóón mò tóbóng lówóhen.

²¹ Omin Dwata henga htungô yóm tau yó, ne bè yóm igoen lemnga tódô dilot Dwata béléen sotu tiol lohoken ne kendel hekdimolen yóm ungeden.

²² Tódô henbaling Dwata libun yóm tiol lohoken yó koni, ominen mit du ebè yóm logi.

²³ Ne yó mon yóm logi yó, monen, “Ni dii hol dou dumu seklóón. Dou tiol yóm kun tiol ne dou unged se yóm kun unged. Boluyu du libun abay se bè logi gónón lemwót.”

²⁴ Yó gónóm mon, yóm tau ke myehen gtagaken maen ne yéen ne tódô le setlomin yóm kun tuha libun, ne baling le ssotu yóm lewu le.

²⁵ Bè yóm kdaw yó, tódô mógów hlówó yóm logi ne yóm libun yó, okóm là kô le myak du.