Tekang Kbuten 19 - Udél Dwata: Gna Kesfasad ne Lomi Kesfasad

Alì kegsalà yó kem tau bè Sodom

¹ Deng móyón kifu ne bè yóm kkól le bè Sodom yóm lewu kem hógów Dwata yó. Lemwót Lat, tolo myón bè bak tikeb yóm syudad yó. Unihen mton kul, tódô henmung mdà senlongen lu. Tódô hegdufok ebè tonok bè solu le

² ne monen mò kul, “Ó kem Sér, ke yó dum hyu bélê ye, na ye mung dou ebè gónô. Na ye holob ti ye bè yó ne tungô ye bélê me. Hlafus haya he kehlós ye.” Okóm yó balà le du, mon le, “Bayaem ne, bè ni ne gónó me tungô bè plasa.”

³ Okóm nubug Lat lu ne mung le du ebè gónóen. Yó nmò Lat, hemtifes ken bélê le ne wen mambangen ne kayen bè yó kem tau gdek béléen ne mken le.

⁴ Gu laan le là deng lemwót tungô, deng sana snibut le gónô Lat yó kem logi bè yó bè Sodom. Tódô kdéen kem logi lomi lemnok kkólen bè yó kem tuha, gotu le lemibut bè yó.

⁵ Yó taba le ebè Lat, mon le, “Ó Lat, nô se lu du yó kem logi nô béléem kifu ni? Hewaem lu edini bélê me anì sentungô me lu.”

⁶ Omin Lat hewà, okóm kendel tnikeben yóm bak dólen

⁷ ne monen mò kul, “Ó kem Wè, hol bê ye abay nmò kut yóm nmò sidek yó.

⁸ Ngem, nitu lu hewà ebélê ye yóm lewu kem ngau hanà sawang libun. Tódô nmò ye bélê le kihu kóyô nmò ye. Okóm bè ni du kem tau nô béléu, béen abay wen nmò ye bélê le, tau le mauy bè gónóu, nofinu lu.”

⁹ Okóm mom yó mon le, “Béem tô henseng mi. Olom tau milo ebè ni kóm. Moen ke tô hnauhem mi? Milud he ksideken yóm nmò me béléem ke tô hensengem mi.” Tódô tulud le Lat yó kem tau yó, kóyô le ke genbà le yóm tikeb bak dólen.

¹⁰ Okóm yó nmò yóm lewu kem tau nô lem gónô Lat, tódô kteng le elem gónô Lat ne kendel tnikeb le yóm beng.

¹¹ Omin le gotu hbutô kul yó kem logi nô bè lewà yó koni anì là ton le du yóm bak dól.

Ktebel Lat yóm syudad Sodom

¹² Yó mon le mò ke Lat yóm lewu kem tau nô béléen yó, “Wen kô dumuhem nô bè nim syudad ni? Ke wen dumu ngaem duhen ke towuhem duhen ke yó kem dumuhem eddoli, géhél nitem lu hewà

¹³ abay se genlà me ne nim syudad ni. Deng gungol Dwata yóm sidek tifù le kul ni kem tau nô bè ni, yó gónón hógów kum anì ne me e genbà nim syudad Sodom ni.”

¹⁴ Omin Lat mógów ebè yó kem logi deng leminti yóm lewu kem ngaen libun, monen mò kul, “Géhél tekuy lemwót ne, hewà tekuy bè ni abay se móyón genlà Dwata nim benwu ni.” Okóm ofo kul ke hlowon Lat yóm monen yó.

¹⁵ Timbow minal mwas, tey keheslò le ke Lat yóm lewu kem hógów Dwata yó. Yó mon le, “Hesloi ne, hol géhél nitem hewà bè ni yehenem ne yóm lewu kem ngaem libun anì là gomong le matay ke genlà Dwata yóm syudad ni.”

¹⁶ Okóm ke Lat kun, tô sgangaw nawan lemwót. Okóm tódô lemwót bè yóm kkodu Dwata du, yó nmò yóm lewu kem tau yó, tódô nogot le bè sigelen ne bud nogot le sigel yehenen ne kem ngaen ne nit le lu hewà.

¹⁷ Ominen wen sotu bè yó kem hógów Dwata mon du mò kul, “Hol ye hetlasik mlóy anì là matay ye. Hol bê ye abay temngel semfulék ne hol bê ye abay tlek hegsud bè yó bè datal. Géhél ye mlóy etu lem bulul anì là matay ye.”

¹⁸ Okóm yó bud mon Lat, “Déy, bê, kem Sér.

¹⁹ Tey deng któbóngem dou, glokem hlowil dou. Okóm tey mayuk tu kem bulul tuu. Gu laanu là deng gefet ditu, deng gafiten ou ne yóm heglumfak Dwata yóm syudad yó ne mataye.

²⁰ Tonem kô yóm ngà benwu udì yóó? Malù moni. Yake olon ebè yó dé gónóm hefet dou anì là mataye. Tonem se yóm tey kudien yó.”

²¹ Ne yó balaen ke Lat yóm hógów Dwata yó, monen, “Yó ne, nmungu yóm kóyóem. Là dog homong genlau du ne yóm ngà benwu yó.

²² Bede heslò ye sen, mlóy ye. Là tagad wen nmou ke là deng ye kól bè yó.” Lemwót bè yóm kboluy Lat du benwu udì yóm benwu yó, yó gónó le moluy du Sur.

Keglà yóm benwu Sodom ne Gomora

²³ Deng sut mata kdaw ne yóm kgefet le Lat bè Sur.

²⁴ Omin Dwata yó hkulón du ofi nbol kbuda eta Sodom ne Gomora.

²⁵ Gotu himot genlà Dwata yóm lewu kem syudad yó, gomong genlaen yóm tey datal hmilol kul. Yóm kdéen tau nô lemen, ne kdê yó kem tmowok bè yó, gotu homong Dwata lu.

²⁶ Okóm kun ke yehen Lat, deng mom temngel semfulék ne tódô baling kahì htuhod mdà.

²⁷ Hol hlafus hayahen bè yó, bud semfulék Abraham ebè yóm tehe gónó le sdà Dwata.

²⁸ Temngel etlem Abraham bè Sodom ne Gomora ne ebè klamang yóm datalen, tódô tonen yóm tey kebel mget gu bè klamang yó kem benwu yó.

²⁹ Okóm bè yóm keglà Dwata yó kem syudad nô bè yóm datal gónón menwu Lat, là homongen ke Lat abay se là klifóten du yóm hni Abraham béléen.

Yóm kul gónó gu semfu yó kem tau Muab ne yó kem tau Amunayt

³⁰ Lemwót bè yóm klikò Lat nô bè Sur, yó gónón mneged elem bulul, mung du yóm lewu kem ngaen libun anì na le e nô bè yóm sotu kilib bè yó.

³¹ Sotu kdaw, mon yóm ngaen twogu mò yóm twolihen, “Deng nbuten tuha ne yóm mà te ne laen dù logi bè klamang nim benwu ni mò myehen kut anì wen ngà te.

³² Yake hlengel te mà ne stungô te du anì mngà te béléen.”

³³ Tahu se, bè yóm kifu yó hlengel le mà le, ominen semtungô du yóm ngaen twogu. Lemwót bè yóm alì klengel yóm mà le, yó gónón là temngón du yóm nmoen.

³⁴ Hayahen bè yó, yó bud mon yóm ngaen twogu bè yóm twolihen, “Deng sentungóu mà ebuteng ne nim kifu ni kedeng, bud uu semtungô du okóm na te bud hlengel anì yó, sket kut mngà béléen.”

³⁵ Tahu se, bè yóm kifu yó bud hlengel le mà le, ne ominen semtungô du yóm ngaen twoli. Lemwót bè yóm tey klengel mà le, yó bud gónón là temngón du yóm nmoen.

³⁶ Yó gónó le mlutut yó kem lewu ngà libun lemwót bè mà le.

³⁷ Tikóng mngà yóm twogu ne logi yóm ngaen, yó boluyen du Muab. Du se gónó le gu semfu yóm kdéen tau Muab ni kmoen ni.

³⁸ Ominen bud mngà logi se kun yóm twoli, yó boluyen du Binami. Du se kul gónó gu semfu yó kem tau Amunayt ni kmoen ni.