Tekang Kbuten 16 - Udél Dwata: Gna Kesfasad ne Lomi Kesfasad

Hagar ne yóm ngaen logi boluyen Ismaél

¹ Yóm Saray yehen Abram, atil se kun. Okóm wen libun Idyip heseken boluyen Hagar.

² Yó mon Saray mò ke Abram, “Lemwót bè yóm là kehngà Dwata dou, yake sentungóem dé yóm libun heseku. Déke mngà anì mò dou.” Tódô nmung Abram yóm mon Saray mò du yó.

³ Tahu se, hedwey Saray ke Abram Hagar. Yóm kedwey Abram ni, deng sfolò halayen ne nô bè Kanan.

⁴ Sentungô Abram Hagar ne mlutut. Bè yóm ketngón Hagar du deng mlutut, deng mom hegmón ne là bud nadaten ke Saray.

⁵ Ne yó mon Saray mò ke Abram, “Kóm salà yóm là bud kadat Hagar dou ni. Igò sem ou du yóm tehe hedwey du kóm, okóm lemwót bè yóm deng keblututen deng mom là bud nadaten dou. Dwata he kmukum du ke mahi du bélê te tahu.”

⁶ Yó balà Abram du, monen, “Kóm hesek se yóm libun yó ne tolo nô lem hólólem. Kihu kóm kmò du.” Tahu se, tey kehsidek Saray ke Hagar, botong mlóy.

⁷ Bè yóm klóy Hagar yó, wen hógów Dwata gu bè longit semlong du bè yóm tbul él bè yóm benwu là hyu menwu du bè yóm lan mógów ebè Sur.

⁸ Yó udélen, monen, “Ó Hagar, yóm hesek Saray, gónóm gu de? Gónóm tô e solu ni du?” Bnalà Hagar, monen, “Mlóye gu bè yóm libun amohu.”

⁹ Monen mò du yóm hógów Dwata, “Budi mulék ebè yóm libun amohem Saray ne holi heglaan béléen.”

¹⁰ Bud mon yóm hógów Dwata, “Angat tey kehwen Dwata bólem, laen kô tau gembek msó kul.

¹¹ Angat wen ngaem logi ne boluyem du Ismaél abay se deng gungol Dwata yóm kkikem lemwót bè yóm alì ksidek kegnómem du.

¹² Okóm yóm ngaem yó, hol lómón ke kudà tabag. Angat ket tau hnohonen ne ket tau se hmohon du. Tódô htólóngen kun ke benwu bè yó kem dumun setwoli.”

¹³ Bè yóm deng kulék yóm hógów Dwata tódô mudél tek sotu Hagar, monen, “Tey, deng tonu Dwata dou, kiholu là matay?” Ne yó boluyen du yóm Dwata mudél ebéléen yó, “Yóm Dwata hol mton dou.”

¹⁴ Yó gónóm mon, yó boluy kem tau du yóm kokol yó, “Kokol yóm Dwata mowil, yóm mton dou.” Yóm kokol yó, nô bè blóng benwu Kadis ne benwu Béréd.

¹⁵ Wen ngà logi Hagar bè Abram ne yó boluy Abram du Ismaél.

¹⁶ Deng wolu folò nem ne halay Abram bè yóm ksut Ismaél.