Tekang Kbuten 15 - Udél Dwata: Gna Kesfasad ne Lomi Kesfasad

Yóm fasad Dwata ke Abram

¹ Kogolen bè yó, tódô hegfan bè Abram Dwata, ne gungol Abram yóm udél Dwata ebéléen, monen, “Ó Abram, hol béi abay hlikò. Tendo kenlungu uu anì laen dù tau hemsidek kóm ne angat wen tey ofol blayu kóm.”

² Okóm yó balà Abram du, monen, “Ó Dwata yóm hol dandónen geta, tedu se tô muhu du yóm ofol blayem dou yó ke laen dù ngau? Tek són angat gemfun du yó kem kendengenu, són Ilisér yóm tau lemwót bè Damaskus.

³ Laen kô dù ngà blayem dou. Yó gónóm mon, angat sotu bè yó kem tau tóbóng lówóhu fen gemfun du yó kem dou kendengen.”

⁴ Bud gungol Abram yóm udél Dwata ebéléen, monen, “Yóm tau tóbóng lówóhem yó, là kô angat gfunen du kun yó kem kendengenem. Hol kóm ngà logi yóm angat mfun du.”

⁵ Omin Dwata mit du hewà, ne monen mò du, “Temngeli ebè longit dé bè yó kem blotik, tilów nsóhem lu. Yóm alì kwen le yó, hol lómón yó se angat kwen yó kem semfu gu béléem.”

⁶ Tódô hentahu Abram yóm mon Dwata mò du yó. Ne lemwót bè yóm kehtahuhen du yóm udél Dwata, yó gónón tedeng kton Dwata du.

⁷ Ne yó bud mon Dwata mò du, “Ou se yóm Dwata hol gónó mogot. Ou se yóm deng semgalak kóm gu bè Ur, yóm benwu snakuf Babilun, nitu uu ebè nim benwu ni mò hol kóm nfun.”

⁸ Okóm yó snólók Abram bè Dwata, monen, “Ó Dwata yóm hol dandónen geta, tedu kmò ketngónu du ke dou se funen nim tonok ni?”

⁹ Yó balà Dwata du, monen, “Miti ebéléu dini sotu safì libun ne sotu kambing ne sotu ubiha logi, yóm deng tlu halay le. Hmungem du sotu obun ne sotu kfati.”

¹⁰ Tahu se, gotu nit Abram ebè Dwata yó kem ógóf hnihen yó koni, ne omin Abram hmatay kul, sket hensóól sendolihen lu, ominen bud semdolol hmasà kul, lewu ktolen du. Okóm yó kem onuk koyu, là dog sendolihen kul.

¹¹ Lemwót yó kem onuk gel mken matay, deng le mom mdef bè lówó yó kem ógóf deng hlasà Abram, okóm gotu hlikò Abram lu.

¹² Timbow nolunen sdef kdaw, gleket bè Abram yóm tey kengahen tungô. Tódô gnómen yóm tey sidek klikoen lemwót bè yóm tey kget kkifuhen.

¹³ Ne yó mon Dwata mò du, “Yó kem sfuhem, angat le milo ebè tólóng benwu. Botong fat latu halay kegen le ghesek ditu, ne tey sidek kehlayam le kul.

¹⁴ Okóm angat tnafaku yóm benwu hmesek kul yó. Ne bè yóm kdaw angat ktebel le yóm benwu yó, angat gotu nwit le yó kem tey kendengen gu ditu.

¹⁵ Okóm kóm, angat gsengel ktuhahem ne menek kegnómem du bè yóm katayem ne hyu kebeng le kóm.

¹⁶ Okóm yó kem sfuhem yó, yó he kulék le edini bè yóm benwu ni ke deng fat bud lugod le bè yó, abay se là tagad hdóhu kul he yó kem tau Amurayt menwu bè yóm benwu ni. Yó he kehdóhu kul ke sok deng gulé yóm sidek nmò le, ne là gbeku du ke là tnafaku kul.”

¹⁷ Timbow deng lemneb kdaw ne deng kifu, tódô ton Abram yóm kkuleng ofi tendo kmebel ne wen solok mung du mlan gu lem blóng yó kem ógóf sendolol hlasaen bè yó.

¹⁸ Bè yóm igoen mton du yóm yó koni, tódô gungol Abram yóm fasad Dwata du, monen, “Yó fasadu kóm, angat blayu bè yó kem bólem yóm klamang yóm tonok ni, lenwóten ditu bè kilil Idyip efet kól ditu bè Él Yufratis,

¹⁹ gomong lemen yóm kul tonok yóm kdéen tau nô tahen, tonok yó kem tau Kinayt ne yó kem tau Kinisayt ne yó kem tau Kadmunayt,

²⁰ ne yó kem tau Hitayt ne yó kem tau Pirisayt ne yó kem tau Rifaim,

²¹ ne yó kem tau Amurayt ne yó kem tau Kanan ne yó kem tau Girgasayt ne yó kem tau Jibusayt.”