Tekang Kbuten 1 - Udél Dwata: Gna Kesfasad ne Lomi Kesfasad

Tehe kedlimun Dwata yóm kentihen

¹ Bè yóm hol tekang kbuten, dlimun Dwata longit ne tonok.

² Yóm tonok, là kóen mtukul kmoen ne laen se dù bang tonem tahen lemwót bè yóm tey él nelem lemimun du, lel yóm tey kifu mget bè klamangen. Lemwót yóm Tulus Dwata tendo heklowong gu tahen.

³ Ne yó udél Dwata, monen, “Dlimunu layag.” Tahu se, tódô sen-gengen se lemayag.

⁴ Ne tey hyu kton Dwata du yóm layag yó. Ominen yó semtólóng yóm layag bè yóm kifu.

⁵ Yó boluyen du yóm layag, “kdaw,” ne yóm kkifuhen, “kifu.” Timbow deng kmoen du yóm yó, ominen kifu ne bud mwas, tu se yóm hol tanay kdaw.

^6-7 Ne yó bud mon Dwata, “Na sen-gawag dé yóm él anì wen lewu gónón nô.” Tahu se, tódô sgawag yóm él. Wen él nô tofi laan, ne wen se él nô tofi ta.

⁸ Yó boluy Dwata du yóm gónón sgawag, “longit.” Timbow deng kmoen du yóm yó, ominen bud kifu ne bud mwas, tu se yóm gewuhen kdaw.

⁹ Ne yó bud mon Dwata, “Na gotu senbusung lu dé yóm kdéen él nô laan longit anì gfan yóm tonok.” Tahu se, tódô uliten du.

¹⁰ Yó boluyen yóm mékéng deng gfan, “tonok,” ne yó boluyen yóm él deng sbusung, “mohin.” Ne tey hyu kton Dwata du yóm deng nmoen yó.

¹¹ Yó bud mon Dwata, “Dlimunu kentihen kay hulu tmowok gu lem tonok, kem bnes ne kem hulu ne kem koyu. Bè ket hulu tmowok sal stólóng kbungu le ne eles wen lem le mò bud tmowok. Senged se bè koyu mungu, sal eles mung bè bungu le yóm lem le mò bud gel tmowok. Ne bè yóm bud gel ktowok le, tódô sulit bè yóm sana kul kmò.” Tahu se, tódô uliten du.

¹² Tódô sut gu lem tonok kentihen tmowok talak tonok. Bè ket tmowok, sal stólóng lem le mò bud tmowok. Ne bè yóm bud ktowok le, tódô sulit bè yóm kul kmò. Ne tey hyu kton Dwata du yóm deng dlimunen yó.

¹³ Timbow deng kmoen du yóm yó, ominen bud kifu ne bud mwas, tu se yóm getluhen kdaw.

¹⁴ Omin Dwata bud mon du, “Dlimunu yó kem mnóng bè longit mò semtólóng yóm kdaw bè yóm kifu, ne mò gónó milô yóm sendaw ne yóm sfalay ne yóm bulón kmò hulu.

¹⁵ Mnóng le gu bè longit anì hol lemayag ete tonok.” Tahu se, tódô uliten du.

¹⁶ Wen lewu yóm bong dlimun Dwata mò mnóng. Dlimunen kdaw mò hlayagen ke kemdaw, ne dlimunen bulón mò hlayagen ke kifu. Ne homong dlimunen snéen yó kem blotik.

¹⁷ Suen bè longit yó kem mnóng yó mò lemayag ete tonok,

¹⁸ mò mnóng kemdaw ne mò mnóng kifu anì wen gónón stólóng yóm layag bè yóm kifu. Ne tey hyu kton Dwata du yóm deng dlimunen yó.

¹⁹ Timbow deng kmoen du yóm yó, ominen bud kifu ne bud mwas, tu se yóm gfaten kdaw.

²⁰ Yó bud mon Dwata, “Dlimunu kentihen mowil lem él mò nô bè yóm él deng bnusungu anì hol wen nô lemen. Ne dlimunu se kentihen gel móyóng te kmawang anì hol wen móyóng ta.”

²¹ Tahu se, dlimun Dwata yó kem klambaden utón nô lem mohin dalang se yó kem kentihen mowil gel nô lem él. Ne yó kem kentihen gel móyóng te kmawang, gotu dlimun Dwata lu. Ne kdê yó kem dlimunen yó, bè yóm bud kból le tódô sulit bè yóm sana kul kmò. Ne tey hyu kton Dwata du yóm deng dlimunen yó.

²² Ne wen oluhen kul, yó monen, “Hol ye mból anì hol wen nô lem él ne nô lem mohin, ne anì hol wen móyóng te kmawang.”

²³ Timbow deng kmoen du yóm yó, ominen bud kifu ne bud mwas, tu se yóm glimuhen kdaw.

²⁴ Yó bud mon Dwata, “Dlimunu tódô lemwót gu bè tonok yó kem kentihen kay ógóf mò nô talak tonok, kem ógóf mò tnomò ne kem ógóf nô lem bnes, kewóten bè yó kem lebangen kkólen bè yó kem leneken. Ne kdê yó kem dlimunu yó, bè yóm bud kból le tódô sulit bè yóm sana kul kmò.” Ne tahu se, tódô uliten du.

²⁵ Duhen yó, deng gotu dlimun Dwata yóm kdê le, ne bè yóm bud kból le, tódô sulit bè yóm sana kul kmò. Ne tey hyu kton Dwata kul.

²⁶ Ne yó bud mon Dwata, “Mò tekuy tau dé, mkél bélê tekuy mò mogot yó kem kentihen mowil lem él, ne kentihen móyóng te kmawang ne kentihen kay ógóf, kem ógóf mò tnomò ne kem ógóf nô lem bnes, kewóten bè yó kem lebangen kkólen bè yó kem leneken.”

²⁷ Tahu se, nmò Dwata tau ne heskélen lu béléen. Nmoen logi ne nmoen libun.

²⁸ Ne wen oluhen kul, monen, “Hol ye mból anì tódô tfeng klamangen benwu yó kem angat lugod ye mò kmamal du. Hogotu kuy kentihen mowil lem él ne kentihen gel móyóng te kmawang ne kentihen ógóf nô talak tonok.

²⁹ Blayu kuy kentihen hulu tmowok te tonok ne kentihen bungu koyu mò ken ye.

³⁰ Okóm bè yó kem ógóf te tonok ne yó kem onuk móyóng te kmawang, deng tey dê kay bnes dlimunu bélê le mò kul ken.” Ne tahu se, tódô uliten du.

³¹ Omin Dwata bud temngel du yóm kdê deng dlimunen yó, ne tey bong hyu ktonen kul. Timbow deng kmoen du yóm yó, ominen bud kifu ne bud mwas, tu se yóm gnemen kdaw.