Sulat Jud 1 - Udél Dwata: Gna Kesfasad ne Lomi Kesfasad

¹ Ou se Jud gónón lemwót nim sulat ni. Ou se yóm sotu tau mò tóbóng lówó Jisas Krays, ne ou se yóm twoli Jim. Smulate ebélê ye yu kem tau deng tehe tnaba Dwata. Tey kbong nawahen kuy Dwata, yóm Mà tekuy bè longit, ne tey gel kofinen kuy Jisas Krays.

² Yó hem Dwata tendo kmodu kuy ne tendo henek nawa ye ne tendo kembong kuy nawa.

Yó kem tau tmolok sekban

³ Ó kem weu do dumu sogot nawa, deng tey kehedemu du ne yóm tô ksulatu ebélê ye gbak bè yóm deng kegewà tekuy gu lem hatay. Okóm là. Tódô gnómu yóm bong muhen bélê ye ke géhél gendufu yu hol mfi du yóm tahu tolok deng tehe blay Dwata bè yó kem tauhen, yóm tolok là hyu temles du.

⁴ Yó gónóhu mon du nim ni, abay se deng wen ne kem tau hegbool lem blóng tekuy, kem tau laen dù klikò le ke Dwata, ne là dengen gdilô bélê ye yóm kesekban le. Deng tô tenles le yóm tahu tolok gbak ebè yóm któbóng Dwata tau. Yó tolok le, là sideken kun ke mò tekuy samuk, abay se gbek Dwata hmifót du. Ne sotuhen, kenbê le Jisas Krays ke du yóm gónó tekuy mogot. Deng tehe eles hsulat Dwata ekni yóm ktafaken kul.

⁵ Deng gotu tngón ye nim tulónu kuy ni, olohu bud hegtulón du bè nawa ye dé. Tehe yu ekni, deng lenwà yóm gónó tekuy mogot yó kem tau Israél lem tdok yó kem tau Idyip. Timbow legen bè yó, gotu genlà Dwata yó kem tau laen dù kehtahu le béléen.

⁶ Ne sotuhen, yó kem tehe gel hógów Dwata gel nô bè longit ekni, mom hnuda le yóm deng sigang Dwata ta le, ne tódô tnagak le yóm hol gónó le nô. Yó kmò Dwata kul, tódô hnengked nféten lu yóm kdina là gekas du ditu bè yóm benwu alì kmifu laan tonok. Hatan tnafaken lu ke deng hto yóm kdaw kkukumen kul.

⁷ Ne hentulón ye nawa yó kem tau tehe menwu bè yó kem syudad Sodom ne Gomora ne yó kem benwu hmilol kul. Tódô nmò le yóm tehe kul nmò yó kem hógów Dwata monu yó koni bè yóm kmò le samuk. Là són du bè kem libun gónó le mò du, balù bè kem kul dumu logi snéen sana kmò le du. Yó kmò Dwata kul, gotu tnafaken lu bè yóm ofi laen kô dù sónen. Ni se yóm eles hetngónen bélê tekuy anì là nmò tekuy du yóm sidek.

⁸ Senged snéen yó kem tau tmolok sekban ni. Yó gel mon le wen gel kna le kun, ne lemwót bè yóm gel kna le yó, tódô henlel le ne mò samuk. Bà udì ke wen kimón le ke Dwata. Ne yó kem hógów Dwata alì mfasang gel nô bè longit, sana tey kehnê le kul.

⁹ Balù ke Maykél ekni, yóm hol geta bè kdê yó kem hógów Dwata nô bè longit, là kô nmoen du kun yóm hemnê. Bè yóm tehe katay Musis ekni, tey kesegled le lówóhen lewu le Maykél Seitan. Okóm ke Maykél kun, là kóen mò udél hemnê ebè Seitan bè yóm ktifuen du, olon mon du, “Dwata he fen mólów kóm.”

¹⁰ Okóm kul yó kem tau sekban ktolok le yó, balù yóm là deng tngón le du, senged alì kehnê le du. Lómón tô le ógóf, ket ksuten bè nawa le yóm knóyô lówó le, ket kmò le du. Duhen yó se angat mit kul lem hatay laen sónen.

¹¹ Tey angat gfà le yó kem tmolok sekban abay se lolò le yóm tehe kun kmò sidek Kain ekni, hnatayen Abél yóm twolihen, ne yóm tehe kun nmò Balaam, móyô mò du yóm sidek anì wen filak gutahen. Ne sotuhen, mkél le bè yóm tehe katù Kura ke Musis ekni. Tódô genlà Dwata lu.

¹² Bè yóm gel kestifun ye mken yu kem tau hemtahu, tey là hyuhen yóm tódô kesegbót le mken bélê ye yó kem tau tmolok sekban yó. Laen dù yak le mò du lem blóng ye yóm ungel le. Són hendem le kul knô. Mkél le bè yóm lobun mung bè lenos, balù setlek él ke hetsiken, ne mkél le bè koyu mungu, balù udì ke wen bungu le igoen sem deng gel kól bè yóm bulón le gel mungu. Yó duónen, deng gotu kdut yóm dolil le, ne deng le gotu mlef.

¹³ Ne bud le mkél bè lewók mohin ke lemnos. Sal gel wen bulok gedway ebè kililen. Hol lómón se yó ne kmò yó kem tau yó, sal gel gfan yóm ksidek gel nmò le, yóm gónó le hemyak knô le. Mkél le snéen bè yó kem blotik tabag, laen mdengen lan lolò le. Deng eles wen yóm tey benwu kmifu deng hentifes Dwata bélê le, ne laen kô dù sónen yóm knô le du.

¹⁴ Tehe yu ekni, wen sotu tugod Dwata boluyen Inuk. Nim Inuk ni, hanà tek nem lugod he kewóten bè Adam. Wen tehe htugod Dwata du ekni gbak ebè yó kem tau sekban ktolok le yó, yó monen, “Ngem kól yóm gónó tekuy mogot ne mung du yó kem hilu libu hógówen gu bè longit.

¹⁵ Angat gotu knukumen kdéen tau, ne tnafaken yó kem tau laen dù klikò le ke Dwata lemwót bè yóm sidek nmò le ne yóm sidek kbak le ebéléen.”

¹⁶ Yó kem tau tmolok sekban yó koni, sónmò le semlón, sónmò le dmuón kem dumu tau. Kihu knóyô lówó le, tódô nmò le. Gel le hton salù. Ne ke wen knóyô le, tey le hulung mudél anì guta le.

Kehlau Jud kul anì hol le temgama

¹⁷ Okóm kem dumuhu swè, bê ye abay klifót yóm deng tehe gungol ye lemwót bè yó kem tanay tau tehe gel hógów yóm gónó tekuy mogot Jisas Krays.

¹⁸ Yó tehe gel tulón le kuy, mon le, “Ke móyón hto yóm hol són kdaw, tódô sut se yó kem tau alì hmowon kuy, kem tau són lolò le yóm sidek knóyô lówó le.”

¹⁹ Yó kem tau mon le yó, lu se gónón lemwót kesgólól nawa yó kem tau hemtahu. Tódô nmung le yóm kul knóyô lówó. Là kóen nô bélê le yóm kun Tulus Dwata.

²⁰ Okóm yó dum kuy, kem dou dumu swè, hol sentóbóng ye mò du yóm gónón mbegel kehtahu ye bè Dwata. Ke gel ye mni bè Dwata, hol ye halak bè kun kfasang yóm Tulusen.

²¹ Tódô henlel ye mimón ke Dwata anì hol ye menek bè yóm kbong nawahen kuy igò ye mangat du yóm klowil laen dù sónen guta tekuy mlan bè yóm tey kkoduhen tekuy yóm gónó tekuy mogot Jisas Krays.

²² Ne yó kem dumu tekuy hanà megewu nawa le bè kehtahu le, hol knodu ye lu.

²³ Ne yó kem dumu tau móyón gmung bè salà, géhél kendel skot ye lu dé, abay se hol lómón ke nô le lem ofi. Wen se kem dumu tau deng gebeng lem sidek. Hol knodu ye lu snéen, okóm hol ye temgama anì là gbót ye. Hol knutó nawa ye yó dum sidek gel nmò le.

Kdóyón Jud ke Dwata

²⁴ Yó ne kóó. Hol dóyón tekuy dé Dwata. Tek són du yóm gembek tmóbóng tekuy anì là bud tekuy btang. Tek són du gembek mkó du bélê tekuy yó kem salà tekuy anì laen dù sidek tonen bélê tekuy bè yóm kdaw kwiten tekuy bè soluhen. Ngem he tey kligal tekuy bè yóm angat knô tekuy béléen yó.

²⁵ Yó gónóm mon, bê tekuy nmò sónen yóm tendo kdóyón tekuy ke Dwata. Sónen du se tahu Dwata. Deng hewaen tekuy gu lem hatay hlanen bè yóm gónó tekuy mogot Jisas Krays. Du se yóm hol dandónen geta, yóm kmamal yóm klamangen. Tek són du yóm hol mfasang bè kdéen, ne yóm alì wen kwalisen. Sana kem gnô kun ne ni kem ni hnikót là deng dlimunen du he yóm benwu, ne laen kô tul konolen efet nim kmoen ni, ne laen kô tul sónen snéen.