Sikaraya 9 - Udél Dwata: Gna Kesfasad ne Lomi Kesfasad

Angat ksut yóm tau hol geta mogot yó kem tau bè Sayun

⁹ Yó bud udél Dwata, monen, “Ó kem tau bè Sayun, hol ye hligal dé. Hol ye hligal mensag dé, kem tau bè Jirusalim. Ngem, sut lem blóng ye yóm tau hol geta bélê ye. Tey tedeng kmoen ne gel gemmò bè yó kem hohonen, lelen hulung heglaan, tódô smakay kudà asnu, snakayen yóm ngà natihen.

¹⁰ Bud mon Dwata, Angat gotu kóhu bè benwu Israél yó kem klitun tók gel nwit le sgida ne angat kóhu bè Jirusalim yó kem kudà gel nwit le ebè gida ne angat gotu genbau yó kem ngom sfatay gel nwit le ebè gida. Yóm tau angat geta bélê ye, du se mit kenek kbenwu bè klamangen. Yó klamang nogoten, tódô lenngeben klamang benwu ne bud lenwóten bè Él Yufratis efet kól bè són tonok.

¹¹ Lemwót bè yóm deng tehe fasadu kuy bè yóm tehe kesfasad tekuy ne lemwót bè yóm litô yóm dsù ye fen hemget du, angat gotu hewau yó kem tau bélê ye deng negef le, lómón kmoen bélê le lómón ke nô le lem tum sol laen dù élen.

¹² Ó kem tau negef, deng wen nefet nawa ye ne ni, hol ye bud semfulék ebè yóm sana kuy benwu, yóm benwu gónón laen dù hemen ye. Wen fasadu kuy kemdaw ni, lewu duléku he bud hulék du ebélê ye yóm tóbóngu kuy bè ket keglayam ye.

¹³ Yóm benwu Juda, lómón ke bohohu. Yó hanaku, duhen Israél ne yó sudengu, duhen Jirusalim. Lu se hesfatayu ebè yó kem tau Grik.”

¹⁴ Dwata se angat hegfan ta yó kem tauhen. Yóm kegtien yó kem hanaken, hol lómón kal ksilà. Angat huni yóm Dwata hol dandónen geta yóm féwen mò tabahen yó kem tauhen. Ominen mundug yó kem hohonen hol lómón ke lenos bong mbel gu leged gu bè yóm benwu là hyu menwu du.

¹⁵ Fen kenlungen yó kem tauhen yóm Dwata laen dù là gbeken du ne gotu genlà le yó kem hohon le gel hmasut kul botu. Tey angat kehsag le bè yóm kesgida le lómón kehsag yó kem tau lengel. Gotu namà le litô yó kem hohon le, tódô molo lómón kolo litô yó kem ógóf gel dsù le, yóm gel snilung le mò twél le ta yóm gónó demsù.

¹⁶ Bè yóm kdaw yó, angat lenwaen yó kem tauhen yóm sana kul Dwata hol gónó mogot, lómón yóm tau semgyok ubiha, sal gel lenwaen yó kem ubihahen ke wen tô hemsidek kul. Yó kem tau Dwata yó, tódô le gotu semkyab lem yóm kun benwu, lómón kesekyab yóm botu sminang gel sù le bè kuruna.

¹⁷ Ya tey angat klendey mton kul. Angat le kemgis yó kem lomi lemnok, logi duhen libun, lemwót bè yóm tey halay le ne tifas grép le hanà lomi.