Sikaraya 8 - Udél Dwata: Gna Kesfasad ne Lomi Kesfasad

Kfasad Dwata yóm bud kehguléken yóm syudad Jirusalim

¹ Ominen bud wen udélen ebéléu yóm Dwata laen dù là gbeken du, monen,

² “Ni se udél yóm Dwata laen dù là gbeken du. Tey alì kbong nawahu du yóm Bulul Sayun, là gbeku du ke là tnóbóngu yó kem tauhen. Lemwót bè yóm kbong nawahu kul, tey kutó nawahu yó kem hohon le.

³ Ne ni bud udél Dwata, monen, Angate semfulék ebè Bulul Sayun, angate nô bè Jirusalim. Ominen yó angat taba le yóm Jirusalim, Syudad Teneb. Ne yó angat taba le yóm kun bulul yóm Dwata laen dù là gbeken du, Bulul Dwata.

⁴ Yó bud udél yóm Dwata laen dù là gbeken du, monen, Yó kem tuha deng tmuged, angat le bud mlan bè yó kem lan bè Jirusalim ne bud le seyón bè yó kem plasahen.

⁵ Ne yó kem lan bè yóm syudad yó, angat tódô hnok ngà logi ne ngà libun là mdengen bè yó.

⁶ Ni se bud udél yóm Dwata laen dù là gbeken du, monen, Déke bè kuy kehedem du, yu kem dù tau tebel yóm kmoen ni, là dohoen yó kem tulónu kuy yó koni. Okóm béléu do, yóm Dwata laen dù là gbeken du, hol tahu dohò se yóm kdéen ni.

⁷ Bud ni se udél yóm Dwata laen dù là gbeken du, monen, Tahu dohò se yóm angat kehewau kul yó kem dou tau deng negef le ebè yó kem benwu fi dmata kdaw ne ebè yó kem benwu fi desdef.

⁸ Bud nwitu lu semfulék anì nô le bè ni bè Jirusalim. Lu se yó kem dou tau ne ou se kul Dwata. Là kóen na a monol yóm nawahu ebélê le ne angat hono tedeng yóm nmou bélê le.

⁹ Ni se bud udél yóm Dwata laen dù là gbeken du, monen, Hol ye hekgis mò nmò anì deng yóm dou Gónô. Deng hónô gungol ye udél le ebélê ye yó kem tugodu bè yóm tehe kmò ye yóm mò hembegel yóm dou Gónô.

¹⁰ Gu laan ye là deng bud mbut hdà du yóm dou Gónô, tey mgel klowil ye abay se laen dù ofol ye mò du, senged se bè yó kem ógóf ye. Ne tendo ye likò bè yó kem hohon ye balù kihu gónó ye e solu, abay se deng senfohonu yóm kdéen tau.

¹¹ Okóm ni, là bud nmou du bè yó kem dù dou tau tebel ne yóm tehe nmou yó, udél yóm Dwata laen dù là gbeken du.

¹² Bè yóm bud kmò ye hulu, tey wen kenek nawa ye. Tey angat bud kbungu le yó kem grép, dalang se yóm tonok ye tey angat ketbasen ne angat gel hkulónu bè klamangen. Yóm kdéen ni, angat gotu blayu ebè yó kem dù dou tau tebel bè Juda ne bè Israél mò tóbóngu kul.

¹³ Ó kem tau bè Juda ne kem tau bè Israél, bè kton le kuy yó kem tau bè tólóng benwu, yu se yó kem tau deng henmulà Dwata. Okóm ni, là ne. Lenwau yu ne hlanu bélê ye yóm któbóngu yó kem dumu tau. Yó gónóm mon, bê ye abay hlikò, hol hgel ye nawa ye, henlel ye mò du yóm dou Gónô.

¹⁴ Yó bud udél yóm Dwata laen dù là gbeken du, monen, Bè yóm tehe alì kehefebut le do yó kem tehe fù ye ekni, deng hol nô bè hendemu yóm angat ktafaku kul. Ne tahu se, là kô tenlesu du hendemu, gotu tnafaku lu.

¹⁵ Duhen ni, bê ye abay hlikò, deng hendemu ne yóm któbóngu yó kem tau bè Jirusalim ne yó kem tau bè Juda ne là kô bud tenlesu du hendemu.

¹⁶ Okóm ni mò hol nmò ye, ke wen gel tulón ye bè kem dumu ye, són tulón ye yóm tahu. Bè gónô skukum, hol hentedeng ye kkukum ye anì menek nawa ye.

¹⁷ Bê ye abay mò atul sidek ebè kem dumu ye. Ne hol tenflok ye yóm gel smafà là tahuhen. Abay se ni kem kdéen ni, tey kekbéu du,” mon Dwata.

¹⁸ Yó bud udélen ebéléu yóm Dwata laen dù là gbeken du, monen,

¹⁹ “Yóm kfasting gel nmò ye bè gfaten bulón ne bè glimuhen bulón duhen ke bè ghituhen bulón ne bè gesfoloen bulón, là bud nmò ye du ne. Yóm gel kestifun ye bè kfasting ye yó ne bè klangag ye, angat baling kdaw kehligal ye mò kem bong kem tau bè Juda. Yó gónóm mon, henlom ye nawa yóm ktahuhen ne yóm gónón menek nawa ye.

²⁰ Yó bud udél yóm Dwata laen dù là gbeken du, monen, Angat tey wen dumu tau mógów ebè Jirusalim lemwót bè tólóng benwu ne lemwót bè tólóng syudad.

²¹ Yó angat udél yó kem tau lem yóm sotu syudad ebè yó kem dumu tau bè yóm dumu syudad, angat mon le, ‘Mógów tekuy ebè Jirusalim na tekuy mni bè Dwata anì tnóbóngen tekuy. Hnebel tekuy yóm Dwata laen dù là gbeken du.’

²² Bè yó kem kdaw yó, tey dê kem tau lemwót bè yó kem tólóng benwu alì mbegel, mógów ebè Jirusalim na le e nebel yóm Dwata laen dù là gbeken du, anì nuyagen lu.

²³ Ni se udél yóm Dwata laen dù là gbeken du, monen, Bè yó kem kdaw yó, wen sfolò tau lemwót bè yó kem tólóng benwu, hono kem tau stólóng udél le, angat le mógów bè yóm sotu Ju ne mon le mò du, ‘Yake hmungem mi béléem, abay se deng gungol me yóm knóen béléem Dwata.’ ”