Sikaraya 7 - Udél Dwata: Gna Kesfasad ne Lomi Kesfasad

Kóyô Dwata ke tedeng kkukum yó kem tauhen ne ke knodu le kem dumu le

¹ Bè yóm gfaten halay kyón Daryus, wen udél Dwata ebè Sikaraya bè yóm gfaten kdaw bè yóm gesyómen bulón bè yóm halay yó, yóm bulón bnoluy le Kisléb.

² Yó gónó Dwata bud mudél lanen wen kem tau dók yó kem tau bè Bétél ebè Gónô Dwata. Yó tau dók le, duhen le Sarisér ne Regim-mélék, mung kul yó kem tau le anì hegfi le bè Dwata.

³ Ne wen snólók le bè yó kem tau gel blóng ebè yóm sana Dwata laen dù là gbeken du ne bè yó kem tugod Dwata bè yó. Yó snólók le, “Tódô henlel me kô langag ne fasting bè yóm glimuhen bulón bud kehtulón du nawa yóm tehe kegbà yóm Gónô Dwata, lómón yóm deng gel nmò me lem yóm hilu halay?”

⁴ Ne yó udélen ebéléu yóm Dwata laen dù là gbeken du mò balà yóm snólók le yó koni, monen,

⁵ “Snólók ye yó kem dumu ye bè yó ne yó kem tau gel blóng ebéléu, mon ye mò kul, ‘Bè yóm hitu folò halay ye nô bè yóm benwu gónó le megef kuy, mò kmoen se yóm gel kfasting ye ne klangag ye bè yóm glimuhen bulón ne bud bè yóm ghituhen bulón, ou kô yóm gel hendem ye?

⁶ Ne ni kmoen ni bè yóm gel kehligal ye mken ne minum bè dou Gónô, ou kô hendem ye bè yóm kestifun ye yó? Là. Là kô ou du yóm hendem ye, són kuy knô.

⁷ Yóm udélu ebélê ye ni, bud ni se udél tehe htugodu yó kem gna tugodu ekni bè yóm kdaw tehe alì kwen tau sebwól bè Jirusalim ne bè yó kem benwu lemnek bè Juda. Dalang se bè Négéb ne bè yó kem but henfek bè Juda, hono kem benwu tehe tey wen tauhen.’ ”

⁸ Yó bud udél Dwata ebè Sikaraya, monen,

⁹ “Ni se udél yóm Dwata laen dù là gbeken du. Hol nwit ye yóm kukum tedeng. Hegfan ye yóm kkodu ye yó kem dumu ye.

¹⁰ Bê ye abay hen-gnok yó kem libun bolu ne yó kem ngà hikit, dalang se yó kem tau milo elem blóng ye ne yó kem tau élél. Hol bê ye abay mò atul sidek ebè kem dumu ye.

¹¹ Yó kem tehe fù ye ekni, là kô hnungol le du yóm udélu ni. Tey kehgel le kulu le, mom nseng le klingu le anì là gungol le du.

¹² Yóm kehedem le, hol lómón kgelen botu anì là gungol le du yó kem hlau yóm Dwata laen dù là gbeken du, duhen yó kem dumu udélen hlanen bè Tulusen ebè yó kem tehe tugoden ekni. Yó se gónón alì lembut kul yóm Dwata laen dù là gbeken du.”

¹³ Yó udél yóm Dwata laen dù là gbeken du, monen, “Lemwót bè yóm là kóyô le hmungol du yóm ktabahu kul, là se kô hnungolu kul ke tmaba le ebéléu.

¹⁴ Deng gotu senklahu lu lómón ke hfolisu lu ebè yó kem benwu mayuk, ebè yóm benwu là deng kul hnikót tngón du. Yóm benwu le tey hyu ne alì tilob, deng baling benwu laen dù bud tauhen, balù sotu ke wen bud mlan du, deng baling benwu là bud hyu menwu du.”