Sikaraya 4 - Udél Dwata: Gna Kesfasad ne Lomi Kesfasad

Yóm glimu hton Dwata ke Sikaraya

¹ Ominen bud semfulék ebéléu yóm hógów Dwata gel stulón do ne bentiken o, hol lómón ke denge tungô.

² Bud snólóken o, “Tedu se tonem ni du?” Bnalau se, monu, “Yó tonu, sotu gónó hemyón solok hono tahu blówón, nô tahen yóm tukung bong gónó hemsù hnolo. Hilol kilil yóm tukung bong yó, wen hitu tukung lemnek myón du, bede hono solok ne ket solok wen hitu sumóngen mò gónón mlan sembwanen.

³ Ominen wen tonu lewu koyu ulib sbalà yóm tukung bong.”

⁴ Ominu smólók yóm hógów Dwata yó, “Tedu se ni du, Sér? Tedu hnigad le ni kem ni?”

⁵ Ne bnalaen o, monen, “Là tngónem du kô?” Monu se, “Là Sér, là tngónu du.”

⁶ Ominen mon du mò dou, “Ni se udél Dwata ebè Sirubabél. Yóm nmoem là lemwóten bè kegbek tau duhen ke bè kgis tau, okóm lemwót bè dou Tulus, udél yóm Dwata laen dù là gbeken du.

⁷ Baluen ke kbongen bulul he tô hemseng ke Sirubabél, botong sentunalu. Ominen yó, du hemsù du yóm hol són botu mò hdeng yóm dou Gónô ne yóm igoen mò du, angat le gotu mensag yó kem tau, yó tendo sensulit mon le, ‘Hol dóyón tekuy Dwata yóm deng kdeng yóm kun Gónô.’ ”

⁸ Ominen wen bud udél Dwata ebéléu hlanen bè yóm hógówen yó, monen,

⁹ “Kun tdok Sirubabél se tehe mbut mò du yóm mò hembegel yóm dou Gónô ne angat bud kun tdok snéen hemdeng du. Ke sok deng nim ni, bè yó gónó ye temngón du yóm hógów do ebélê ye, yóm Dwata laen dù là gbeken du.

¹⁰ Hol bê ye abay senlón ke udì yóm ton ye mò buten, yakà hligal Dwata du bè yóm ktonen du yóm kbut kehdà ye du yóm kun Gónô, hligal bè yóm ktonen yóm tuntun nogot Sirubabél. Yóm hitu solok hnigaden yóm hitu mata Dwata, gotu tenngelen yóm klamangen.”

¹¹ Ominu smólók yóm hógów Dwata gel stulón do, “Boluy hnigaden yóm lewu koyu ulib sbalà yóm gónó hemyón solok yóó?

¹² Ne boluy se hnigaden yóm lewu kem hanga koyu ulib gónón lemwà yóm tey hnolo lómón tô blówón mlel gu lem yóm lewu hono tubu blówón yóó.”

¹³ Snólóken o, “Là tngónem du kô?” Bnalau se, monu, “Là Sér, là tngónu du.”

¹⁴ Ominen mon du mò do, “Yó hnigaden nim ni, duhen yóm lewu kem tau deng nélék Dwata mò tóbóng lówóhen, yóm Dwata mogot yóm klamangen benwu.”