Sikaraya 3 - Udél Dwata: Gna Kesfasad ne Lomi Kesfasad

Yóm gfat hton Dwata ke Sikaraya

¹ Omin yóm hógów Dwata gel stulón do hton du dou yóm geta bè yó kem gel blóng ebè Dwata boluyen Jéswa, mdà bè solu yóm hógów Dwata. Bè kwanan yóm hógów Dwata yó, mdà bè yó Seitan ne tey dê tifuen ke Jéswa.

² Ne yó udél yóm hógów Dwata yó ebè Seitan, monen, “Ou se Dwata mólów kóm, Seitan. Ou se deng mélék yóm syudad Jirusalim mò dou nfun. Yóm Jéswa kun, hol lómón ke ngà koyu dmilóf skot gu lem ofi.”

³ Yóm igò Jéswa mdà bè solu yóm hógów Dwata yó, tey nusing nesen.

⁴ Duhen yó, yó udél yóm hógów Dwata ebè yó kem dumu mdà bè yó, monen, “Kó ye béléen yóm nes nusingen.” Ominen beklil ebè Jéswa ne monen mò du, “Ngem, deng kóhu béléem yó kem salaem ne ni blayu kóm yóm nes lomi là nusingen nii.”

⁵ Ominu mon du, “Ke yó dum hyu béléem, yake benlay ye yóm ulew là nusingen snéen.” Tahu se, ulew le du yóm là nusingen ne hesek le du yóm nes lomi yóm igoen mdà bè yó yóm hógów Dwata yó koni.

⁶ Ominen wen udél tebelen bè Jéswa yóm hógów Dwata yó, monen,

⁷ “Ni se udél yóm Dwata laen dù là gbeken du, monen, Ke hol nmoem yóm dou kóyô ne ke hol loloem yó kem hlolou kóm, benlayu u kwalis mò mogot yóm dou Gónô dalang se yó kem dumu nmò bè yó. Gbekem tódô mógów ebéléu lómón yóm gel nmò ni kem hógów Dwata mdà bè ni nii.

⁸ Ni mò hol hnungolem, Jéswa, yóm geta bè yó kem tau gel blóng ebéléu, dalang se kuy kem dumu tau gel blóng ebéléu, hol hnungol ye. Yu se hmigad du yó kem hyu móyón sut. Móyón nwitu elem blóng ye yóm dou tóbóng lówó, yóm bnoluy Hanga.

⁹ Ngem, Jéswa, wen botu suu bè soluhem ne wen hitu matahen. Angat wen udél hdanau tahen ne bè tek olo sotu kdaw angat gotu kóhu salà yóm kdéen tau lem yóm benwu ni, udél yóm Dwata laen dù là gbeken du.

¹⁰ Bè yóm kdaw yó, tódô sotu kun tminok ebè yóm kun dumu sebét na le e hligal, hnigal le yóm kenek kbenwu le ne yóm kehyu klowil le, udél yóm Dwata laen dù là gbeken du.”