Sikaraya 2 - Udél Dwata: Gna Kesfasad ne Lomi Kesfasad

Yóm getlu hton Dwata ke Sikaraya

¹ Timbow bud nkayu ketngelu, tódô tonu yóm tau mogot btes.

² Snólóku, monu, “Gónóm e solu yó du?” Monen se, “Mógówe ebè Jirusalim naw e bentes yóm klamangen ne ktahaen.”

³ Ominen tmagak dou yóm hógów Dwata gel stulón do, senlongen yóm sotu hógów Dwata mógów ebéléen

⁴ ne yó monen mò du yóm mógów ebéléen yó, “Hetlasiki, tulónem tum tau mit btes tu koni, monem mò du, ‘Lemwót bè yóm angat bud alì kwen tau lem yóm syudad Jirusalim, botong là kóyów le lemen. Lemwót yó kem dumu, tódô le nô bè lewà ne yó kem ógóf le ne laen se kô dù hemen le bè yó.

⁵ Yakà ou du yóm ofi beng hmilol yóm syudad Jirusalim ne bud ou yóm klóón tendo nô lemen. Dwata se mon du nim ni.’ ”

Ktaba Dwata yó kem tau deng negef anì bud le mulék

⁶ Yó udél Dwata ebè yó kem kun tau deng negef, monen, “Géhél ye ne, tnagak ye yóm benwu fi bwak deng gónów e semkla kuy.

⁷ Hgéhél ye gu dyo, semfulék ye ebè Jirusalim yu kem tau deng negef le bè Babilun.”

⁸ Yó bud udél yóm hógów Dwata, monen, “Angat megdóyón bélê ye yóm Dwata laen dù là gbeken du, lemwót bè yóm khógówen do ebè tu kem benwu deng tehe megef kimu ye mò tmafak kul, abay se yóm tau deng hemsidek kuy, hol lómón ke deng hensideken yóm hol mebtes bè Dwata.

⁹ Ngem, deng tayalu eta le yóm dou henmù mò tmafak kul ne yó kem kimu le angat negef yó kem hesek le. Ke deng dohò yóm ni, yó he ketngón ye du deng duhen yóm Dwata laen dù là gbeken du, yóm deng hógów do.”

¹⁰ Yó udél Dwata, monen, “Hol ye hligal mensag kem tau bè Jirusalim, yakà móyóne kól elem blóng ye, tódóe nô bélê ye.

¹¹ Bè yóm kdaw kkólu, angat tey dê tólóng tau lemwót bè dumu benwu mung do ne baling le mò dou tau. Nóe lem blóng ye ne bè yó gónó ye temngón du yóm khógówen do yóm Dwata laen dù là gbeken du.

¹² Deng hetfing Dwata mò kun yóm benwu Juda glem bè kun tonok. Ne bud néléken Jirusalim mò hol kun syudad nfun.

¹³ Yóm kkól Dwata bè ni gu bè yóm kun gónó nô hol mólós, hol bê le abay hebnes bè soluhen yóm kdéen tau.”