Sikaraya 12 - Udél Dwata: Gna Kesfasad ne Lomi Kesfasad

Angat bud kehewà Dwata yó kem tau bè Jirusalim bè yóm hol són kdaw

¹ Yóm udél Dwata ni, gbak ebè yó kem tau Israél. “Ni se udél yóm Dwata mból longit ne mò tud blóngón tonok ne hlowil tau, monen,

² Yóm syudad Jirusalim, angat nmou hol lómón ke ninum lóbô mò hlengel yó kem tólóng benwu hmilol, yó kem benwu deng hógów yó kem sendalù na a mundug yóm syudad Jirusalim, lel le bud mundug yó kem dumu syudad bè Juda.

³ Bè yóm kdaw yó, bud nmou Jirusalim lómón ke botu alì blat. Nô kihu benwu tô mkay du angat wen tey gfaen. Ne yóm kdéen benwu talak tonok angat le gotu stifun na le e nundug Jirusalim.

⁴ Okóm bè yóm kdaw yó, mon Dwata, gotu hlangafu lu yóm kdê kudà le ne yó kem tau smakay kul, hlengelu mata le. Okóm tendo bnenteyu yó kem tau Juda, bede fen hbutóu yóm kdê kudà yó kem hohon le.

⁵ Ominen yó angat hendem yó kem tau malak bè Juda, ‘Tey le kemgis yó kem tau bè Jirusalim lemwót bè ksalig le yóm Dwata laen dù là gbeken du, yóm kul Dwata.’

⁶ Bè yóm kdaw yó, yó kmou yó kem tau malak bè Juda hol lómón ke bala ofi nô lem luduk koyu ne lómón ke dilóf ofi mken lami. Gotu kenen kdéen benwu hmilol du. Okóm kul yó kem tau bè Jirusalim tódô le henek, laen kô dù hemen le.

⁷ Nahu gna hegmò yó kem tau bè Juda gu laanu là deng hegmò yó kem tau bè Jirusalim, anì laen dù gónó le hegeta knô senta Juda yó kem sfu Dabid ne yó kem dumu tau bè Jirusalim.

⁸ Bè yóm kdaw yó, kenlung Dwata lu yó kem tau bè Jirusalim ne balù yó kem tau alì lunog bélê le, angat tey kekgis le lómón tehe kekgis Dabid. Ne yó kem sfu Dabid, angat lómó kmò le lómón ke Dwata ne lómón kmò le yóm hógów Dwata gel tukô gna kul.

⁹ Ni se atulu bè yóm kdaw yó, gotu genlau lu yóm kdê benwu mundug yóm syudad Jirusalim.

¹⁰ Ne suu bè yó kem sfu Dabid ne bè yóm kdéen dumu tau bè Jirusalim yóm nawa kmodu ne yóm óyô mni bè Dwata. Angat le temngel ebéléu, yóm deng tehe tenbek le ne tey sidek klangag le, lómón klangag yóm tuha ke deng matay yóm tek sotu ngà le logi, duhen ke matay yóm ngà le logi twogu.

¹¹ Yóm alì klangag le bè Jirusalim bè yóm kdaw yó, hol lómón yóm tehe alì klangag le ke Hadad Rimun ditu bè datal Megidu.

¹² Yóm kdéen tau bè Israél, angat le gotu langag. Yó kem kun sfu Dabid angat le gotu stifun honon lu, gotu le langag. Dalang se yó kem tuha libun le, tey klangag le se kul bè yóm kul gónó nô sónen lu. Yó kem kun sfu Natan, angat le gotu stifun honon lu, gotu le langag. Dalang se yó kem tuha libun le, tey klangag le se kul bè yóm kul gónó nô sónen lu.

¹³ Yó kem kun sfu Libay, angat le gotu stifun honon lu, gotu le langag. Dalang se yó kem tuha libun le, tey klangag le se kul bè yóm gónó le nô sónen lu. Yó kem kun sfu Simi, angat le gotu stifun honon lu, gotu le langag. Dalang se yó kem tuha libun le, gotu le langag se kul bè yóm gónó le nô sónen lu.

¹⁴ Ket sfu yó kem dù tau tebel bè Juda, angat le gotu stifun honon lu, gotu le langag. Dalang se yó kem tuha libun le, tey klangag le se kul bè yóm gónó le nô sónen lu.”